varthabharthi

ಕಲೆ - ಸಾಹಿತ್ಯ

ಗುಲಾಬಿ ಕೆನ್ನೆಗಳು ಅರಳುತ್ತವೆ

ವಾರ್ತಾ ಭಾರತಿ : 10 Oct, 2016
ಕಳಕೇಶ್ ಗೊರವರ, ರಾಜೂರ

 1

ಅವರು,

ಜಾತಿಯ ಅಲಗು ತಿವಿದು

ಹುಬ್ಬೇರಿಸಿದರು.

ನಾವು,

 ಒಂದೇ ಒಂದು ಪದ ಮಾತನಾಡಲಿಲ್ಲ

2

ಅವರು,

ನಮ್ಮ ಅಂಡಿನ ಮೇಲೆ

ದಣಿವಿಲ್ಲದೆ ಒದೆಯುವಾಗ

ಅವಡುಗಚ್ಚಿ ಸಹಿಸಿಕೊಂಡೆವು

ಅವು,

ನಾವೇ ಹೊಲಿದ ಚಪ್ಪಲಿಗಳೆಂದು

3

ಮುಗ್ಧ ರಕ್ತದ ಹನಿಗಳು ತೊಟ್ಟಿಕ್ಕುವುದು,

ಅವರು, ದೇಶ ಪ್ರೇಮದ ಸೋಗಿನಲಿ

ಬಿಳಿ ಅಂಗಿಯ ಚುಂಗು ಹಿಡಿಯುವುದು

ಇದ್ಯಾವುದೂ ಹೊಸತಲ್ಲ

ಮನುಕುಲದಷ್ಟು ಪುರಾತನ

4

ಅವರ,

ಹಿಂಸೆಯ ವ್ಯಾಪಾರ ಬೀದಿಯಲಿ

ನಮ್ಮ ಕನಸಿನ ಕೂಸುಗಳು

ಬಿಡಿಗಾಸಿಗೆ ಬಿಕರಿಯಾಗುತ್ತವೆ.

5

ನಮ್ಮೊಳಗೆ

ಹಸಿವು, ಅವಮಾನಗಳು

ಹಾಸಿ ಹೊದ್ದು ಮಲಗಿವೆ.

ಅದೆಷ್ಟು ಲಗಾಮು ಹಾಕಿದರೂ

ಅವು ನಿಬಂಧನೆಗಳ ಉಲ್ಲಂಘಿಸುತ್ತವೆ.

6

ಇವತ್ತಲ್ಲದಿದ್ದರೂ ನಾಳೆ

ಫ್ಯಾಶಿಸ್ಟರೆದೆಗಳು ನಡುಗುತ್ತವೆ

ಕೀಳರಿಮೆಗೆ ಮುದುಡಿದ

ಗುಲಾಬಿ ಕೆನ್ನೆಗಳು ಅರಳುತ್ತವೆ.

‘ವಾರ್ತಾ ಭಾರತಿ’ ನಿಮಗೆ ಆಪ್ತವೇ ? ಇದರ ಸುದ್ದಿಗಳು ಮತ್ತು ವಿಚಾರಗಳು ಎಲ್ಲರಿಗೆ ಉಚಿತವಾಗಿ ತಲುಪುತ್ತಿರಬೇಕೇ? 

ಬೆಂಬಲಿಸಲು ಇಲ್ಲಿ  ಕ್ಲಿಕ್ ಮಾಡಿ

Comments (Click here to Expand)