varthabharthi

ದಿಲ್ಲಿ ದರ್ಬಾರ್

ದಿಲ್ಲಿ ದರ್ಬಾರ್

ವಾರ್ತಾ ಭಾರತಿ : 19 Mar, 2017

ಮಾತೆಯ ಸಿಂಹ!
ಉತ್ತರ ಪ್ರದೇಶ ವಿಧಾನಸಭಾ ಚುನಾವಣೆಯಲ್ಲಿ ಭರ್ಜರಿ ವಿಜಯ ಸಾಧಿಸಿದ ಬಳಿಕ ಮೊದಲ ಬಾರಿಗೆ ಪ್ರಧಾನಿ ನರೇಂದ್ರ ಮೋದಿ, ರಾಜ್ಯಸಭೆಗೆ ಆಗಮಿಸಿದಾಗ, ಬಿಜೆಪಿ ಸದಸ್ಯರ ಉಲ್ಲಾಸ ಮುಗಿಲು ಮುಟ್ಟಿತು. ಪ್ರಧಾನಿ ಸ್ವಾಗತದ ಘೋಷಣೆಗಳ ಬರಹವೂ ಅವರ ಕೈಯಲ್ಲಿತ್ತು. ಮೋದಿ ಸದನಕ್ಕೆ ಆಗಮಿಸುತ್ತಿದ್ದಂತೆ ಪಕ್ಷದ ಸದಸ್ಯರು, ‘‘ದೇಖೋ ದೇಖೋ ಕೌನ್ ಆಯಾ, ಭಾರತ್ ಮಾ ಕಾ ಶೇರ್ ಆಯಾ’’ ಎಂದು ಘೋಷಣೆ ಕೂಗಿದರು. ಇದಕ್ಕೆ ಪ್ರತಿಯಾಗಿ ಪ್ರಧಾನಿ ನಸುನಕ್ಕು, ಕೈ ಬೀಸಿ ತಮ್ಮ ಆಸನದತ್ತ ತೆರಳಿದರು. ಇದು ಬಿಜೆಪಿಯ ನಾಮಕರಣವೇ ಅಥವಾ ಆ ಕ್ಷಣದಲ್ಲಿ ಹೊರಬಿದ್ದ ಉದ್ಗಾರವೇ ಎನ್ನುವುದು ಸ್ಪಷ್ಟವಾಗಿಲ್ಲ. ಆದರೆ ಒಂದಂತೂ ಸ್ಪಷ್ಟ; ಮೋದಿ ಈಗ ಬಿಜೆಪಿಯ ಸರ್ವೋಚ್ಚ ನಾಯಕ. ಅವರ ಸನಿಹದಲ್ಲಿ ಕೂಡಾ ಯಾವ ಮುಖಂಡರೂ ಇಲ್ಲ.

ಜ್ಯೋತಿಷ್ಯದ ಕೈಯಲ್ಲಿ ಬಬ್ಬರ್
ಉತ್ತರ ಪ್ರದೇಶ ವಿಧಾನಸಭಾ ಚುನಾವಣೆಯ ಕೊನೆಯ ಹಂತದ ಮತದಾನಕ್ಕೂ ಮುನ್ನ ವಾರಣಾಸಿ ಎಲ್ಲ ರಾಜಕೀಯ ಶಕ್ತಿಯ ಕ್ರೋಡೀಕರಣಕ್ಕೆ ವೇದಿಕೆಯಾಯಿತು. ಪ್ರಧಾನಿ ನರೇಂದ್ರ ಮೋದಿ ಹಾಗೂ ಹಲವಾರು ಮಂದಿ ಕೇಂದ್ರ ಸಚಿವರ ಗಡಣವೇ ಅಲ್ಲಿ ಸೇರಿತ್ತು. ಇದನ್ನು ಕೆಲ ಕಾಂಗ್ರೆಸ್ ಸದಸ್ಯರು ಲಘುವಾಗಿ ಪರಿಗಣಿಸಿದರು. ಐಷಾರಾಮಿ ಹೊಟೇಲ್‌ಗಳಲ್ಲಿ ಉಳಿದುಕೊಂಡು ಬೈಟ್ ನೀಡುವುದಕ್ಕಷ್ಟೇ ಸೀಮಿತರಾದರು. ಮತ್ತೆ ಕೆಲವರು ಜ್ಯೋತಿಷಿಗಳ ಮೊರೆ ಹೋದರು. ರಾಜ್ಯ ಕಾಂಗ್ರೆಸ್ ಮುಖ್ಯಸ್ಥ ರಾಜ್ ಬಬ್ಬರ್ ಕೂಡಾ ಹೀಗೆ ಭವಿಷ್ಯಕ್ಕೆ ಮೊರೆ ಇಟ್ಟವರಲ್ಲೊಬ್ಬರು. ಜ್ಯೋತಿಷಿಗಳ ಸಲಹೆ ಕೇಳುತ್ತಿದ್ದಾಗ, ಅವರಿಗೆ ರಾಜಯೋಗದ ಭವಿಷ್ಯ ಇದೆ ಎಂದು ಜ್ಯೋತಿಷಿ ಹೇಳುತ್ತಿದ್ದರು. ಆದರೆ ಅವರ ಕನಸು ನುಚ್ಚುನೂರಾಯಿತು. ಕಾಂಗ್ರೆಸ್ ಉತ್ತರ ಪ್ರದೇಶದಲ್ಲಿ ಹೀನಾಯವಾಗಿ ಸೋಲಲು ಏನು ಕಾರಣ ಎಂದು ಕಂಡುಕೊಳ್ಳುವುದಾದರೆ ಭೀಕರ ಸೋಲಿಗೆ ಇದೂ ಒಂದು ಕಾರಣ.

ಮತ್ತೆ ಕಿಶೋರ್‌ಗೆ ಮೊರೆ!
 ಉತ್ತರ ಪ್ರದೇಶದ ಮಾಜಿ ಸಿಎಂಗಳಾದ ಅಖಿಲೇಶ್ ಯಾದವ್ ಹಾಗೂ ಮಾಯಾವತಿ ಅವರ ಆಪ್ತರ ಪ್ರಕಾರ, ಸಮಾಜವಾದಿ ಹಾಗೂ ಬಹುಜನ ಸಮಾಜ ಪಕ್ಷದ ಈ ಮುಖಂಡರು ಹೊಸ ರಾಜಕೀಯ ಸಮೀಕರಣಕ್ಕೆ ಮುಂದಾಗಿದ್ದಾರೆ. 2019ರ ಸಾರ್ವತ್ರಿಕ ಚುನಾವಣೆಯಲ್ಲಿ ಪರಸ್ಪರ ಕೈಜೋಡಿಸುವ ಸಾಧ್ಯತೆಗಳ ಬಗ್ಗೆ ಚಿಂತನೆ ನಡೆಸಿದ್ದಾರೆ. ಕೇಂದ್ರದ ಮಟ್ಟದಲ್ಲಿ ಮಹಾಮೈತ್ರಿ ರೂಪುಗೊಳ್ಳುವ ಮಾತುಗಳು ಕೇಳಿಬರುತ್ತಿವೆ. ಉತ್ತರ ಪ್ರದೇಶದಲ್ಲಿ ಬಿಜೆಪಿ ಅಭೂತಪೂರ್ವ ವಿಜಯ ಸಾಧಿಸಿರುವ ಮೋದಿ ಹಾಗೂ ಬಿಜೆಪಿಯನ್ನು ಮಟ್ಟಹಾಕಬೇಕಿದ್ದರೆ, ಇಂಥ ಸಂಘಟಿತ ಶಕ್ತಿಯೊಂದೇ ದಾರಿ ಎನ್ನುವುದು ಅಖಿಲೇಶ್ ಮಾತ್ರವಲ್ಲದೆ, ಕಾಂಗ್ರೆಸ್ ಹಾಗೂ ಬಿಎಸ್ಪಿಯ ಕೆಲ ಮುಖಂಡರ ಅಭಿಪ್ರಾಯ. ಲಕ್ನೋದಲ್ಲಿ ಹರಡಿರುವ ವದಂತಿಗಳನ್ನು ನಂಬುವುದಾದರೆ, ಕಾಂಗ್ರೆಸ್‌ಗೆ ಉತ್ತರ ಪ್ರದೇಶದಲ್ಲಿ ಸಹಾಯ ಮಾಡಲು ಬಂದು ಕೈಸುಟ್ಟುಕೊಂಡಿರುವ ಚುನಾವಣಾ ತಂತ್ರಗಾರ ಪ್ರಶಾಂತ್ ಕಿಶೋರ್ ಇದೀಗ ಕೇಸರಿ ಸುನಾಮಿ ವಿರುದ್ಧದ ಹೋರಾಟಕ್ಕೆ ವಿರೋಧ ಪಕ್ಷಗಳನ್ನು ಸಂಘಟಿಸಲು ತೆರೆಮರೆಯ ಕಸರತ್ತು ನಡೆಸಿದ್ದಾರೆ. ಈ ಬಾರಿ ಎಸ್ಪಿ-ಕಾಂಗ್ರೆಸ್ ಮೈತ್ರಿ ಯಶಸ್ವಿಯಾಗದ ಹಿನ್ನೆಲೆಯಲ್ಲಿ ಉದ್ದೇಶಿತ ಮಹಾಮೈತ್ರಿ ಕೂಡಾ ಫಲ ನೀಡುತ್ತದೆ ಎಂಬ ವಿಶ್ವಾಸ ಯಾರಲ್ಲೂ ಉಳಿದಿಲ್ಲ. ಆದರೆ ಅಧಿಕಾರದಿಂದ ಹೊರಗಿರುವ ರಾಜಕಾರಣಿಗಳ ಮನಸ್ಸಿನಲ್ಲಿ ನಿರೀಕ್ಷೆ ಮೊಳಕೆಯೊಡೆಯಲಿ.

ನಿತೀಶ್ ಹೊಸ ಅಜೆಂಡಾ
ಬಿಹಾರದ ಮುಖ್ಯಮಂತ್ರಿ ನಿತೀಶ್ ಕುಮಾರ್ ಹಾಗೂ ಒಡಿಶಾ ಸಿಎಂ ನವೀನ್ ಪಟ್ನಾಯಕ್ ಅವರು ಮುಂಬರುವ ರಾಷ್ಟ್ರಪತಿ ಚುನಾವಣೆ ಬಗ್ಗೆ ಚರ್ಚೆ ನಡೆಸಿದ್ದಾರೆ. ಮುಂದಿನ ಜುಲೈ ತಿಂಗಳಲ್ಲಿ ನಡೆಯುವ ಚುನಾವಣೆಯಲ್ಲಿ ಗೆಲ್ಲುವ ವ್ಯಕ್ತಿ ರಾಷ್ಟ್ರೀಯ ಸ್ವಯಂಸೇವಕ ಸಂಘದ ಜತೆ ಯಾವ ಸಂಪರ್ಕವನ್ನೂ ಹೊಂದಿರಬಾರದು ಎಂಬ ಬಗ್ಗೆ ಉಭಯ ಮುಖಂಡರು ಒಪ್ಪಂದಕ್ಕೆ ಬಂದಿದ್ದಾರೆ ಎಂದು ಖಚಿತ ಮೂಲಗಳಿಂದ ತಿಳಿದುಬಂದಿದೆ. ಈ ಹಿನ್ನೆಲೆಯಲ್ಲಿ ನಿತೀಶ್ ಕುಮಾರ್, ಎನ್‌ಡಿಎ ಮೈತ್ರಿಕೂಟದ ಹೊರಗಿನ ಪಕ್ಷಗಳನ್ನು ಒಂದೇ ಸೂರಿನಡಿ ತರುವ ಬಗ್ಗೆ ಚಿಂತನೆ ನಡೆಸಿದ್ದಾರೆ. ಇದರಿಂದ ರಾಷ್ಟ್ರಪತಿ ಚುನಾವಣೆಗೆ ತುರುಸಿನ ಸ್ಪರ್ಧೆ ಏರ್ಪಡುವ ಸಾಧ್ಯತೆಗಳಿರುವ ಹಿನ್ನೆಲೆಯಲ್ಲಿ ಪ್ರಧಾನಿ ಮೋದಿ ಒಮ್ಮತದ ಅಭ್ಯರ್ಥಿಯನ್ನು ಕಣಕ್ಕಿಳಿಸುವಂತೆ ಮಾಡುವುದು ಅನಿವಾರ್ಯ ಎನ್ನುವುದು ಅವರ ಲೆಕ್ಕಾಚಾರ. ಆದರೆ ಉತ್ತರ ಪ್ರದೇಶದಲ್ಲಿ ಬಿಜೆಪಿ ಅಭೂತಪೂರ್ವ ಜಯ ಸಾಧಿಸುವುದರೊಂದಿಗೆ ಮಹಾಘಟಬಂಧನದ ಆಸೆಗೆ ತಣ್ಣೀರೆರೆಚಿದಂತಾಗಿದೆ. ಇದೀಗ ಹೊಸ ತಂತ್ರಗಾರಿಕೆಗಾಗಿ ಎಲ್ಲರ ಚಿತ್ತ ನಿತೀಶ್ ಅವರತ್ತ ಎಂಬಂತಾಗಿದೆ.

ಮೆಹಬೂಬ ವಂಶಾಡಳಿತ
ಜಮ್ಮು ಮತ್ತು ಕಾಶ್ಮೀರದಿಂದ ಲೋಕಸಭೆಯ ಎರಡು ಸ್ಥಾನಗಳಿಗೆ ಮುಂದಿನ ತಿಂಗಳು ನಡೆಯುವ ಉಪಚುನಾವಣೆಯಲ್ಲಿ ನ್ಯಾಶನಲ್ ಕಾನ್ಫರೆನ್ಸ್ ಹಾಗೂ ಕಾಂಗ್ರೆಸ್ ಕೈಜೋಡಿಸಿರುವುದು ಸಿಎಂ ಮೆಹಬೂಬ ಮುಫ್ತಿ ಅವರ ಸಹೋದರ ತಸಾದುಕ್ ಹುಸೈನ್ ಅವರ ರಾಜಕೀಯ ರಂಗಪ್ರವೇಶಕ್ಕೆ ಸವಾಲಾಗಿ ಪರಿಣಮಿಸಿದೆ. ತಸಾದುಕ್ ಇತ್ತೀಚೆಗೆ ಪಕ್ಷ ಸೇರಿದ್ದಾರೆ. ಕಾಂಗ್ರೆಸ್ ಹಾಗೂ ನ್ಯಾಶನಲ್ ಕಾನ್ಫರೆನ್ಸ್ ನಡುವೆ ಆಗಿರುವ ಒಪ್ಪಂದದ ಪ್ರಕಾರ, ನ್ಯಾಶನಲ್ ಕಾನ್ಫರೆನ್ಸ್ ಅಧ್ಯಕ್ಷ ಫಾರೂಕ್ ಅಬ್ದುಲ್ಲಾ ಶ್ರೀನಗರ (ಕೇಂದ್ರ ಕಾಶ್ಮೀರ) ಕ್ಷೇತ್ರದಿಂದ ಕಣಕ್ಕೆ ಇಳಿಯಲಿದ್ದರೆ, ಕಾಂಗ್ರೆಸ್ ಮುಖ್ಯಸ್ಥ ಗುಲಾಂ ಅಹ್ಮದ್ ಮಿರ್ ಅನಂತನಾಗ್ (ದಕ್ಷಿಣ ಕಾಶ್ಮೀರ) ಕ್ಷೇತ್ರದಿಂದ ಅದೃಷ್ಟ ಪರೀಕ್ಷೆಗೆ ಮುಂದಾಗಿದ್ದಾರೆ. ‘ಓಂಕಾರ’, ‘ಕಮೀನೆ’ಯಂತಹ ಚಿತ್ರ ಖ್ಯಾತಿಯ ಬಾಲಿವುಡ್ ಛಾಯಾಗ್ರಾಹಕರಾಗಿರುವ ತಸಾದುಕ್, ಆಡಳಿತಾರೂಢ ಪೀಪಲ್ಸ್ ಡೆಮಾಕ್ರಟಿಕ್ ಪಾರ್ಟಿಯ ಹುರಿಯಾಳು. ಕಾಂಗ್ರೆಸ್‌ನ ವಂಶಪಾರಂಪರ್ಯ ರಾಜಕಾರಣ ವಿರುದ್ಧ ಉಗ್ರವಾಗಿ ಟೀಕಿಸುತ್ತಿದ್ದ ಬಿಜೆಪಿ, ಮೆಹಬೂಬಾ ಮುಫ್ತಿ ತಮ್ಮ ತಂದೆಯ ಬಳಿಕ ಅಧಿಕಾರದ ಗದ್ದುಗೆ ಹಿಡಿದಾಗ ಮೌನವಾಗಿತ್ತು. ‘‘ವಂಶಪಾರಂಪರ್ಯ ಆಡಳಿತ ಎಂದರೆ ಗಾಂಧಿ ಕುಟುಂಬದ ಆಧಿಪತ್ಯ. ಉಳಿದ ಎಲ್ಲರೂ ಪ್ರಜಾಪ್ರಭುತ್ವವಾದಿಗಳು’’ ಎಂದು ಸಂಸತ್ತಿನಲ್ಲಿ ಆಡಿಕೊಳ್ಳುತ್ತಿದ್ದುದು ಬಿಜೆಪಿ ಸಂಸದರೊಬ್ಬರ ಕಿವಿಗೆ ಬಿತ್ತಂತೆ.

 

Comments (Click here to Expand)