ಪ್ರತಿ ವರ್ಷ ಸ್ವಿಝರ್ ಲ್ಯಾಂಡ್ ನ ಚರಂಡಿಗಳಲ್ಲಿ ಹಾದುಹೋಗುವ ಚಿನ್ನ ಎಷ್ಟು ಗೊತ್ತೇ?
ವಿಜಯ ನಗರ ಸಾಮ್ರಾಜ್ಯದ ವೈಭವದ ಕತೆ ಕೇಳಿದ್ದೀರಾ?.. ಹಾಗಾದರೆ ಇದನ್ನು ಓದಿ
ವಿಜಯನಗರ ಕಾಲದ ವೈಭವವನ್ನು ಎಲ್ಲರೂ ಕೇಳಿದವರೇ, ವಿಜಯನಗರ ಸಾಮ್ರಾಜ್ಯದ ಆಡಳಿತ ಕಾಲದಲ್ಲಿ ಬೀದಿ ಬದಿಗಳಲ್ಲಿ ಚಿನ್ನ, ಮುತ್ತು ರತ್ನ, ಹವಳ, ವಜ್ರಗಳನ್ನು ಬೀದಿಬದಿಗಳಲ್ಲಿ ಮಾರಲಾಗುತ್ತಿತ್ತು, ಪ್ರಾಚೀನ ಭಾರತವು ಅತ್ಯಂತ ಶ್ರೀಮಂತವಾಗಿತ್ತು ಎನ್ನುವುದನ್ನು ನಾವು ಇತಿಹಾಸದಿಂದ ತಿಳಿದುಕೊಂಡಿದ್ದೇವೆ. ಆದರೆ ಸ್ವಿಝರ್ ಲ್ಯಾಂಡ್ ನ ಚರಂಡಿಗಳಲ್ಲಿ ಹಾದು ಹೋಗುತ್ತದೆ ಎನ್ನಲಾದ ಚಿನ್ನದ ಪ್ರಮಾಣವು ಒಂದು ಕ್ಷಣ ವಿಜನಯಗರ ಸಾಮ್ರಾಜ್ಯದ ವೈಭವವನ್ನು ನೆನಪಿಸುತ್ತದೆ.
ಏಕೆಂದರೆ ವರ್ಷವೊಂದಕ್ಕೆ ಸ್ವಿಝರ್ ಲ್ಯಾಂಡ್ ನ ಚರಂಡಿಗಳಲ್ಲಿ 11,72,88,180 ರೂ. ಮೌಲ್ಯದ 43 ಕೆ.ಜಿ. ಚಿನ್ನ ಹರಿದು ಹೋಗುತ್ತದಂತೆ..!. ಈ ವಿಚಾರವನ್ನು ಸ್ವಿಝರ್ ಲ್ಯಾಂಡ್ ನ ವಿಜ್ಞಾನಿಗಳು ಕಂಡುಕೊಂಡಿದ್ದಾರೆ. ದೇಶದ ತ್ಯಾಜ್ಯ ಸಂಸ್ಕರಣಾ ಘಟಕಗಳಿಂದ ಹೊರಬರುವ ಕೆಸರಿನಿಂದಾಗಿ ಭಾರೀ ಪ್ರಮಾಣದ ಚಿನ್ನ ವ್ಯರ್ಥವಾಗುತ್ತಿದೆ ಎಂದು ಅಕ್ವಾಟಿಕ್ ಸೈನ್ಸ್ ಆ್ಯಂಡ್ ಟೆಕ್ನಾಲಜಿಯ ಸ್ವಿಸ್ ಫೆಡರಲ್ ಇನ್ ಸ್ಟಿಟ್ಯೂಟ್ ನ ವಿಜ್ಞಾನಿಗಳು ತಿಳಿಸಿದ್ದಾರೆ ಎಂದು ಬ್ಲೂಮ್ ಬರ್ಗ್ ವರದಿ ಮಾಡಿದೆ.
ತ್ಯಾಜ್ಯ ನೀರಿನಲ್ಲಿ ಕಂಡುಬರುವ ಈ ಅಂಶಗಳು ವಾತಾವರಣಕ್ಕೆ ತೊಂದರೆಯನ್ನುಂಟು ಮಾಡುವುದಿಲ್ಲ. ಇದರ ಮರುಪಡೆಯುವಿಕೆಯೂ ಉಪಯೋಗವಾಗುವುದಿಲ್ಲ. ಆದರೆ ಈ ಚಿನ್ನವನ್ನು ಮರಳಿ ಪಡೆಯಬಹುದಾದ ಸ್ಥಳಗಳನ್ನೂ ವಿಜ್ಞಾನಿಗಳು ಗುರುತಿಸಿದ್ದಾರೆ ಎನ್ನಲಾಗಿದೆ. ಇಷ್ಟೇ ಅಲ್ಲದೆ ಚರಂಡಿ ನೀರಿನಲ್ಲಿ ಸುಮಾರು 3000 ಕೆ.ಜಿ. ಬೆಳ್ಳಿ ಕೂಡ ಹರಿದುಹೋಗುತ್ತಿದೆ ಎಂದೂ ವಿಜ್ಞಾನಿಗಳು ತಿಳಿಸಿದ್ದಾರೆ.