varthabharthi

ಗಲ್ಫ್ ಸುದ್ದಿ

ಕೊಲ್ಲಿ ಬಿಕ್ಕಟ್ಟು ನಿವಾರಣೆ ಮಾತುಕತೆಯಲ್ಲಿ ಭಾಗವಹಿಸಲು ಸಿದ್ಧ: ಕತರ್ ಅಮೀರ್

ವಾರ್ತಾ ಭಾರತಿ : 30 Oct, 2017

ದೋಹಾ (ಕತರ್), ಅ. 30: ಅರಬ್ ಕೊಲ್ಲಿಯಲ್ಲಿ ಉಂಟಾಗಿರುವ ರಾಜತಾಂತ್ರಿಕ ಬಿಕ್ಕಟ್ಟಿಗೆ ಪರಿಹಾರ ಕಂಡುಕೊಳ್ಳುವ ಉದ್ದೇಶದಿಂದ ಅಮೆರಿಕ ಏರ್ಪಡಿಸಿರುವ ನೇರ ಮಾತುಕತೆಗಳಲ್ಲಿ ಭಾಗವಹಿಸಲು ತಾನು ಸಿದ್ಧನಿರುವುದಾಗಿ ಕತರ್ ಅಮೀರ್ ಶೇಖ್ ತಮೀಮ್ ಬಿನ್ ಹಾಮದ್ ಅಲ್-ತಾನಿ ಹೇಳಿದ್ದಾರೆ.

 ಆದರೆ, ಕತರ್ ವಿರುದ್ಧ ರಾಜತಾಂತ್ರಿಕ ದಿಗ್ಬಂಧನ ವಿಧಿಸಿರುವ ಅರಬ್ ರಾಷ್ಟ್ರಗಳಿಗೆ ಅಮೆರಿಕ ನೀಡಿರುವ ಆಹ್ವಾನದ ಬಗ್ಗೆ ಬಂದಿರುವ ಪ್ರತಿಕ್ರಿಯೆ ತನಗಿನ್ನೂ ಗೊತ್ತಾಗಿಲ್ಲ ಎಂದರು.

  ಕತರ್ ಭಯೋತ್ಪಾದನೆಗೆ ಬೆಂಬಲ ನೀಡುತ್ತಿದೆ ಎಂದು ಆರೋಪಿಸಿ ಸೌದಿ ಅರೇಬಿಯ, ಯುಎಇ, ಬಹರೈನ್ ಮತ್ತು ಈಜಿಪ್ಟ್ ದೇಶಗಳು ಜೂನ್ 5ರಂದು ಆ ದೇಶದ ವಿರುದ್ಧ ರಾಜತಾಂತ್ರಿಕ ದಿಗ್ಬಂಧನ ಘೋಷಿಸಿರುವುದನ್ನು ಸ್ಮರಿಸಬಹುದಾಗಿದೆ.

ಅಮೆರಿಕದ ಸುದ್ದಿ ಚಾನೆಲೊಂದರ ನ್ಯೂಸ್ ಜೊತೆ ಮಾತನಾಡಿದ ಕತರ್ ಅಮೀರ್, ಈ ಬಿಕ್ಕಟ್ಟು ಕೊನೆಗೊಳ್ಳುವುದನ್ನು ತಾನು ಎದುರುನೋಡುತ್ತಿದ್ದೇನೆ ಎಂದರು.

‘‘ನಮ್ಮ ಘನತೆ ಮತ್ತು ಸಾರ್ವಭೌಮತ್ವಕ್ಕಿಂತ ಹೆಚ್ಚಿನದೇನೂ ಇಲ್ಲ. ಆದರೆ, ಈ ಬಿಕ್ಕಟ್ಟು ಕೊನೆಗೊಳ್ಳಬೇಕೆಂದು ನಾವು ಬಯಸುತ್ತೇವೆ. ಇದನ್ನು ನಾನು ಯಾವಾಗಲೂ ಹೇಳುತ್ತೇನೆ’’ ಎಂದು ‘60 ಮಿನಿಟ್ಸ್’ ಕಾರ್ಯಕ್ರಮದಲ್ಲಿ ಕತರ್ ಆಡಳಿತಗಾರ ಹೇಳಿದರು.

ಈ ಕಾರ್ಯಕ್ರಮ ರವಿವಾರ ಪ್ರಸಾರವಾಯಿತು.

‘‘ಅವರು ನನ್ನತ್ತ ಒಂದು ಮೀಟರ್ ನಡೆದರೆ, ನಾನು ಅವರತ್ತ 10,000 ಮೈಲಿ ನಡೆಯಲು ಸಿದ್ಧನಿದ್ದೇನೆ’’ ಎಂದರು.

ಅವರು ಸರಕಾರ ಬದಲಾವಣೆಗೆ ಬಯಸುತ್ತಿದ್ದಾರೆ

ಕತರ್ ವಿರುದ್ಧ ರಾಜತಾಂತ್ರಿಕ ದಿಗ್ಬಂಧನ ವಿಧಿಸಿರುವ ಕೊಲ್ಲಿ ಅರಬ್ ದೇಶಗಳು ತನ್ನ ಸರಕಾರವನ್ನು ಉರುಳಿಸಲು ಬಯಸಿವೆ ಎಂದು ಆ ದೇಶದ ಅಮೀರ್ ಶೇಖ್ ತಮೀಮ್ ಬಿನ್ ಹಾಮದ್ ಅಲ್-ತಾನಿ ಆರೋಪಿಸಿದರು.

‘‘ಅವರು ಹಿಂದೆಯೂ ಹೀಗೆ ಮಾಡಲು ಪ್ರಯತ್ನಿಸಿದ್ದರು ಎಂದು ಇತಿಹಾಸ ಹೇಳುತ್ತದೆ. 1996ರಲ್ಲಿ ನನ್ನ ತಂದೆ ಅಮೀರ್ ಆದಾಗ ಅವರು ಸರಕಾರ ಉರುಳಿಸಲು ಯತ್ನಿಸಿದ್ದರು. ಕಳೆದ ಎರಡು ವಾರಗಳಲ್ಲಿ ಅವರು ಈ ಬಗ್ಗೆ ಸ್ಪಷ್ಟ ಸೂಚನೆಯನ್ನೂ ನೀಡಿದ್ದಾರೆ’’ ಎಂದರು.

‘‘ವಲಯದ ಜನರಿಗೆ ವಾಕ್ ಸ್ವಾತಂತ್ರ ನೀಡಲು ನಾವು ಬಯಸಿದ್ದೇವೆ. ಇದರಿಂದ ಅವರು ಸಂತುಷ್ಟರಾಗಿಲ್ಲ. ಇದು ಅವರಿಗೆ ಬೆದರಿಕೆ ಎಂಬುದಾಗಿ ಅವರು ಭಾವಿಸಿದ್ದಾರೆ’’ ಎಂದು ‘60 ಮಿನಿಟ್ಸ್’ ಕಾರ್ಯಕ್ರಮದಲ್ಲಿ ಕತರ್ ಅಮೀರ್ ಹೇಳಿದರು.

 

Comments (Click here to Expand)