varthabharthi

ವಿಶೇಷಾಂಕ

ಕವಲು ಹಾದಿಯಲ್ಲಿ JNU

ವಾರ್ತಾ ಭಾರತಿ : 2 Nov, 2017
ಡಾ. ಪುರುಷೋತ್ತಮ ಬಿಳಿಮಲೆ, ಹೊಸದಿಲ್ಲಿ

ಈಗ ಜೆಎನ್‌ಯು ಕವಲು ಹಾದಿಯಲ್ಲಿದೆ. ವಿಶೇಷ ಅಧಿಸೂಚನೆಯನ್ನು ಹೊರಡಿಸಿ ಆರಂಭಿಸಲಾದ ಈ ವಿವಿಯನ್ನು ಈಗಿನ ಕುಲಪತಿ ಪ್ರೊ. ಜಗದೀಶ್ ಕುಮಾರ್ ಅವರು ಯುಜಿಸಿ ಅಡಿಯಲ್ಲಿ ತರಲು ಪ್ರಯತ್ನಿಸುತ್ತಿದ್ದಾರೆ. ಇದರ ಮೊದಲ ಹಂತವಾಗಿ ವಿಶ್ವವಿದ್ಯಾನಿಲಯದ ಪ್ರವೇಶಗಳಲ್ಲಿ ಆಮೂಲಾಗ್ರ ಬದಲಾವಣೆ ಮಾಡಲಾಗಿದೆ. ವಿವಿಯ ಅತ್ಯುನ್ನತ ಶೈಕ್ಷಣಿಕ ಸಮಿತಿ -ಅಕಡೆಮಿಕ್ ಕೌನ್ಸಿಲ್ ಅನುಮತಿಸಿದ ಒಟ್ಟು 1,125 ಸೀಟುಗಳಲ್ಲಿ ಕೇವಲ 115ನ್ನು ಮಾತ್ರ ಒಪ್ಪಿಕೊಂಡ ಆಡಳಿತ ಮಂಡಳಿ 2017-18ರ ಪ್ರವೇಶದಲ್ಲಿ ಶೇ.85.5ನ್ನು ಕಡಿತಗೊಳಿಸಿದೆ. ಇದರಿಂದ ಅತ್ಯುತ್ತಮ ಸಂಶೋಧನೆಗೆಂದು ಸ್ಥಾಪಿತವಾದ ವಿಶ್ವವಿದ್ಯಾನಿಲಯವು ಅದರ ಮೂಲ ಉದ್ದೇಶದಿಂದ ದೂರ ಸರಿದಂತಾಗಿದೆ.

ದೇಶದ ಪ್ರತಿಷ್ಠಿತ ವಿಶ್ವವಿದ್ಯಾನಿಲಯಗಳಲ್ಲೊಂದಾದ ದಿಲ್ಲಿಯ ಜವಾಹರಲಾಲ್ ನೆಹರೂ ವಿಶ್ವವಿದ್ಯಾನಿಲಯವನ್ನು (ಜೆಎನ್‌ಯು) ಸರಕಾರವು 1969ರಲ್ಲಿ ವಿಶೇಷ ಅಧಿಸೂಚನೆ ಹೊರಡಿಸಿ ಸ್ಥಾಪಿಸಿತು. ಉನ್ನತ ಶಿಕ್ಷಣವನ್ನು ಇನ್ನಷ್ಟು ಬಲಪಡಿಸುವುದು ಇದರ ಮೂಲ ಉದ್ದೇಶವಾಗಿತ್ತು, ಜೊತೆಗೆ ಭಾರತದ ಹಿಂದುಳಿದ ಪ್ರದೇಶಗಳ ಮಕ್ಕಳು ಪ್ರಾದೇಶಿಕ ಮೀಸಲಾತಿಯನ್ನು ಪಡೆದು ದಿಲ್ಲಿಯಲ್ಲಿ ಓದು ಮುಂದುವರಿಸಲು ಅವಕಾಶ ಕಲ್ಪಿಸಿಕೊಡುವುದಾಗಿತ್ತು. ಈ ನಿಟ್ಟಿನಲ್ಲಿ ದೇಶದ 18 ಹಿಂದುಳಿದ ಪ್ರದೇಶಗಳ ಮಕ್ಕಳು ಜೆಎನ್ ಯುವಿನಲ್ಲಿ ಪ್ರವೇಶ ಪಡೆಯಲು ಸಾಧ್ಯವಾಗಿದೆ. ಪ್ರಸ್ತುತ ಈ ವಿಶ್ವವಿದ್ಯಾ ನಿಲಯದಲ್ಲಿ ಒಟ್ಟು 10 ನಿಕಾಯಗಳಿವೆ. ಪ್ರತಿಯೊಂದು ನಿಕಾಯದಲ್ಲಿ 10ಕ್ಕೂ ಮಿಕ್ಕು ವಿಭಾಗಗಳಿವೆ. ಇವಲ್ಲದೆ ಸಂಸ್ಕೃತವೂ ಸೇರಿದಂತೆ ನಾಲ್ಕು ಸ್ವತಂತ್ರವಾದ ವಿಶೇಷ ಅಧ್ಯಯನ ಕೇಂದ್ರಗಳಿವೆ. ಇಲ್ಲಿರುವ ಭಾರ ತೀಯ ಭಾಷೆಗಳ ಕೇಂದ್ರದಲ್ಲಿ ಈಚೆಗೆ ಕನ್ನಡ ಅಧ್ಯಯನ ಪೀಠವೂ ಕಾರ್ಯಾರಂಭ ಮಾಡಿದೆ. 2012ರಲ್ಲಿ ನ್ಯಾಶನಲ್ ಅಸೆಸ್ಮೆಂಟ್ ಮತ್ತು ಅಕ್ರಿಡಿಯೇಶನ್ ಕೌನ್ಸಿಲ್‌ನವರು ಈ ವಿಶ್ವವಿದ್ಯಾನಿಲಯಕ್ಕೆ ನಾಲ್ಕರಲ್ಲಿ 3.9 ಅಂಕ ನೀಡಿ ‘ಇದು ದೇಶದ ಅತ್ಯುತ್ತಮ ವಿವಿಗಳಲ್ಲಿ ಒಂದು’ ಎಂದು ಘೋಷಿಸಿತು. ಆದರೆ ಈಗ ಜೆಎನ್‌ಯು ಕವಲು ಹಾದಿಯಲ್ಲಿದೆ. ವಿಶೇಷ ಅಧಿಸೂಚನೆಯನ್ನು ಹೊರಡಿಸಿ ಆರಂಭಿಸಲಾದ ಈ ವಿವಿಯನ್ನು ಈಗಿನ ಕುಲಪತಿ ಪ್ರೊ. ಜಗದೀಶ್ ಕುಮಾರ್ ಅವರು ಯುಜಿಸಿ ಅಡಿಯಲ್ಲಿ ತರಲು ಪ್ರಯತ್ನಿಸುತ್ತಿದ್ದಾರೆ. ಇದರ ಮೊದಲ ಹಂತವಾಗಿ ವಿಶ್ವ ವಿದ್ಯಾನಿಲಯದ ಪ್ರವೇಶಗಳಲ್ಲಿ ಆಮೂಲಾಗ್ರ ಬದಲಾವಣೆ ಮಾಡಲಾಗಿದೆ. ವಿವಿಯ ಅತ್ಯುನ್ನತ ಶೈಕ್ಷಣಿಕ ಸಮಿತಿ -ಅಕಡಮಿಕ್ ಕೌನ್ಸಿಲ್ ಅನುಮತಿಸಿದ ಒಟ್ಟು 1,125 ಸೀಟುಗಳಲ್ಲಿ ಕೇವಲ 115ನ್ನು ಮಾತ್ರ ಒಪ್ಪಿಕೊಂಡ ಆಡಳಿತ ಮಂಡಳಿ 2017-18ರ ಪ್ರವೇಶದಲ್ಲಿ ಶೇ.85.5ನ್ನು ಕಡಿತಗೊಳಿಸಿದೆ. ಇದರಿಂದ ಅತ್ಯುತ್ತಮ ಸಂಶೋಧನೆಗೆಂದು ಸ್ಥಾಪಿತವಾದ ವಿಶ್ವವಿದ್ಯಾನಿಲಯವು ಅದರ ಮೂಲ ಉದ್ದೇಶದಿಂದ ದೂರ ಸರಿದಂತಾಗಿದೆ. ಈ ಬಗೆಯ ನಿರ್ಣಯಗಳ ಪರಿಣಾಮ ಎಂದರೆ ಎಷ್ಟೋ ವಿಭಾಗ ಮತ್ತು ಕೇಂದ್ರಗಳಲ್ಲಿ ವಿದ್ಯಾರ್ಥಿಗಳೇ ಇಲ್ಲದಂತಾದ್ದು. ಹಿಂದುಳಿದ ವರ್ಗ ಹಾಗೂ ದಲಿತ ವಿದ್ಯಾರ್ಥಿಗಳ ಪ್ರವೇಶಾವಕಾಶ ಗಮನಾರ್ಹವಾಗಿದ್ದು ಕುಂಟಿತವಾಗಿ ಇದನ್ನು ಪ್ರತಿಭಟಿಸಿದ ಅಕಡಮಿಕ್ ಕೌನ್ಸಿಲ್‌ನ್ನು ಆಡಳಿತ ವರ್ಗ ಗಣನೆಗೇ ತೆಗೆದುಕೊಳ್ಳದೇ ಪ್ರಜಾಪ್ರಭುತ್ವದ ಮೂಲ ತತ್ವಗಳನ್ನು ಗಾಳಿಗೆ ತೂರಿತು. ಈ ವಿಷಯ ಇದೀಗ ನ್ಯಾಯಾಲಯದಲ್ಲದೆ. ಗಮನಿಸಬೇಕಾದ ಅಂಶವೆಂದರೆ 1969ರ ವಿಶೇಷ ಅಧಿಸೂಚನೆಯಿಂದ ಆರಂಭವಾದ ವಿಶ್ವ ವಿದ್ಯಾನಿಲಯವನ್ನು ಈಗಾಗಲೇ ಸೊರಗಿ ಹೋದ ಮತ್ತು ಮಹತ್ವ ಕಳೆದುಕೊಂಡ ಯುಜಿಸಿಯ ಅಡಿಗೆ ತಂದು ಸಾಧಿಸಿದ್ದಾದರೂ ಏನು? ಶೈಕ್ಷಣಿಕ ಉನ್ನತಿಯ ವಿಷಯದಲ್ಲಿ ಸಂಪೂರ್ಣ ವಿಫಲವಾದ ಯುಜಿಸಿಯು ಇವತ್ತು ಕೇವಲ ಒಂದು ಆಡಳಿತ ಯಂತ್ರವಾಗಿ ಮಾತ್ರ ಕೆಲಸ ಮಾಡು ತ್ತಿದೆ. ಅಂತಹ ದಯನೀಯ ಸಂದರ್ಭದಲ್ಲಿ ಜೆಎನ್‌ಯುವನ್ನು ಯುಜಿಸಿಯ ಅಂಕಿತಕ್ಕೆ ತಂದು ಏನನ್ನೂ ಸಾಧಿಸಲಾಗುವುದಿಲ್ಲ. ಹಾಗೆ ನೋಡಿದರೆ ಶೈಕ್ಷಣಿಕವಾಗಿ ಬಹುಮಟ್ಟಿಗೆ ನಿಷ್ಕ್ರಿಯವಾಗಿರುವ ಯುಜಿಸಿಗೆ ಜೆಎನ್‌ಯುವಿನಂಥ ವಿಶ್ವವಿದ್ಯಾನಿಲಯಕ್ಕೆ ಮಾರ್ಗದರ್ಶನ ಮಾಡುವ ಶಕ್ತಿಯಾಗಲೀ ಮುನ್ನೋಟವಾಗಲೀ ಇಲ್ಲ. ಇದರ ಅರ್ಥ ಇಷ್ಟೆ- ಜೆಎನ್‌ಯುವನ್ನು ದೇಶದ ಇನ್ನೊಂದು ವಿಶ್ವವಿದ್ಯಾನಿಲಯವನ್ನಾಗಿ ಮಾಡಿ ಅದರ ಅನನ್ಯತೆಯನ್ನು ನಾಶ ಮಾಡುವುದು. ದೇಶದ ವೈವಿಧ್ಯಗಳನ್ನು ನಾಶ ಮಾಡಿ ಏಕರೂಪ ಕೊಡುವ ಬಲಪಂಥೀಯ ರಾಜಕಾರಣಕ್ಕೆ ಈ ಬೆಳವಣಿಗೆಗಳು ಪೂರಕವಾಗಿಯೇ ಇವೆ.

ಸದ್ಯಕ್ಕೆ ಜೆಎನ್‌ಯುವಿಗೆ ಎರಡು ಬಗೆಯ ಚರಿತ್ರೆಗಳನ್ನು ಬರೆಯಲಾಗುತ್ತಿದೆ. 2014ರ ಮಹಾಚುನಾವಣೆಗಿಂತ ಮೊದಲಿನ ಚರಿತ್ರೆಯಲ್ಲಿ ಈ ವಿಶ್ವವಿದ್ಯಾನಿಲಯವನ್ನು ಒಂದು ಬೌದ್ಧಿಕ ಕೇಂದ್ರವಾಗಿ ದೇಶಕ್ಕೆ ಪರಿಚಯಿಸಲಾಗುತ್ತಿತ್ತು. ಇಲ್ಲಿ ಕಲಿತ ವಿದ್ಯಾರ್ಥಿಗಳು ರಾಷ್ಟ್ರೀಯ ಹಾಗೂ ಅಂತಾರಾಷ್ಟ್ರೀಯ ಮಟ್ಟಗಳಲ್ಲಿ ಉನ್ನತ ಹುದ್ದೆಗಳನ್ನು ಅಲಂಕರಿಸುತ್ತಿದ್ದರು. ಇಲ್ಲಿನ ಪ್ರಾಧ್ಯಾಪಕರು ಬರೆದ ಸಂಶೋಧನಾ ಲೇಖನಗಳಿಗೆ ಎಲ್ಲೆಡೆಯೂ ಮನ್ನಣೆ ದೊರಕುತ್ತಿತ್ತು. ಮಾನವಿಕಗಳಲ್ಲಿ ಮತ್ತು ಜೀವ ವಿಜ್ಞಾನಗಳಲ್ಲಿ ಇಲ್ಲಿನ ಪ್ರಾಧ್ಯಾಪಕರ ಸಾಧನೆಗಳ ಕುರಿತು ದೇಶ ವಿದೇಶಗಳಲ್ಲಿ ಉನ್ನತ ಮಟ್ಟದ ಚರ್ಚೆಗಳು ನಡೆಯುತ್ತಿದ್ದುವು. ಇಲ್ಲಿ ಕಲಿತ ಮಹನೀಯರನೇಕರು ದೇಶದ ಅಭಿವೃದ್ಧಿಗೆ ಗಮನಾರ್ಹ ಕೊಡುಗೆ ನೀಡಿದ್ದರು. ಅಂಥವರಲ್ಲಿ ರಿಸರ್ವ್ ಬ್ಯಾಂಕಿನ ಸಹ ಗವರ್ನರ್ ಆಗಿರುವ ಹಾರೂನ್ ರಶೀದ್ ಖಾನ್, ಶಿಕಾಗೋ ವಿಶ್ವವಿದ್ಯಾನಿಲಯದಲ್ಲಿ ಇತಿಹಾಸ ಪ್ರಾಧ್ಯಾಪಕರಾಗಿರುವ ಮುಝಫ್ಫರ್ ಆಲಂ, ಇದೀಗ ಕೇಂದ್ರ ಸರಕಾರದಲ್ಲಿ ಸಚಿವರಾಗಿರುವ ನಿರ್ಮಲಾ ಸೀತಾರಾಮನ್, ಭಾರತದ ಸಾಕ್ಷಿಪ್ರಜ್ಞೆಯಂತಿರುವ ಸೀತಾರಾಮ್ ಯೆಚೂರಿ ಮೊದಲಾದವರು ಪ್ರಮುಖರು. ಅರ್ಥಶಾಸ್ತ್ರದ ಆಧಾರದ ಮೇಲೆ ಆಧುನಿಕ ಭಾರತದ ಇತಿಹಾಸ ಬರೆದ ಪ್ರೊ. ಬಿಪಿನ್ ಚಂದ್ರ, ಸಂಸ್ಕೃತ ಕಾವ್ಯಗಳು, ಶಾಸ್ತ್ರಗಳು, ಹಳೆಯ ಮನೆಗಳು, ನೇಗಿಲಿನ ಮೊನೆ ಇತ್ಯಾದಿ ನವೀನ ಆಕರಗಳನ್ನು ಬಳಸಿ ಪ್ರಾಚೀನ ಭಾರತದ ಇತಿಹಾಸವನ್ನು ಹೊಸದಾಗಿ ಬರೆದ ಪ್ರೊ. ರೋಮಿಲಾ ಥಾಪರ್, ಹಿಂದಿ ಸಾಹಿತ್ಯ ವಿಮರ್ಶೆಗೆ ಚೈತನ್ಯ ತಂದುಕೊಟ್ಟ ಪ್ರೊ. ನಾಮವರ್ ಸಿಂಗ್, ಮೊದಲಾದವರು ತಮ್ಮ ತಮ್ಮ ಕ್ಷೇತ್ರಗಳಲ್ಲಿ ಅಸಾಮಾನ್ಯ ಸಾಧನೆ ಮಾಡಿ ತಮ್ಮದೇ ಆದ ಒಂದು ಬೌದ್ಧಿಕ ಪರಂಪರೆಯನ್ನೇ ನಿರ್ಮಿಸಿದ ಮಹನೀಯರು. ಇವರ ವಾದವನ್ನು ಒಪ್ಪುವವರೂ, ಒಪ್ಪದವರೂ ಇವರನ್ನೇ ಕೇಂದ್ರವಾಗಿರಿಸಿಕೊಂಡು ತಮ್ಮ ವಾದ ಮಂಡನೆ ಮಾಡುತ್ತಾರೆ.

ಎಡಪಕ್ಷಗಳ ಪ್ರಮುಖ ನೇತಾರರಾಗಿರುವ ಪ್ರಕಾಶ್ ಕಾರಟ್, ಪ್ರಖ್ಯಾತ ಚುನಾವಣಾ ವಿಶ್ಲೇಷಕ ಡಾ. ಯೋಗೇಂದ್ರ ಯಾದವ್, ಲಿಬಿಯಾದ ಪ್ರಧಾನ ಮಂತ್ರಿ ಅಲಿ ಜೆಡಾನ್, ನಮ್ಮ ನಡುವಿನ ಅಗ್ರಮಾನ್ಯ ಚಿಂತಕ ಪಿ ಸಾಯಿನಾಥ್, ಮೊದಲಾದವರು ಜೆಎನ್‌ಯುವಿನ ಹಿರಿಯ ವಿದ್ಯಾರ್ಥಿಗಳು. ಈ ಚಿಂತಕರು ಭಾರತದ ಇತಿಹಾಸವನ್ನಾಗಲೀ ವರ್ತಮಾನವನ್ನಾಗಲೀ ಗ್ರಹಿಸಿದ ಬಗೆಗೆ ಮತ್ತು ಅದನ್ನು ವಿಶ್ಲೇಷಿಸುತ್ತಿದ್ದ ಬಗೆಗೆ ವಿದ್ವತ್ ವಲಯದಲ್ಲಿ ಅಪಾರ ಗೌರವವಿದೆ. ಈಗಲೂ ಈ ವಿವಿಯಲ್ಲಿ ಸುದೀಪ್ತಾ ಕವಿರಾಜ್, ಅಮಿತಾಬ್ ಮಟ್ಟೂ, ಗೋಪಾಲ ಗುರು, ಆದಿತ್ಯ ಮುಖರ್ಜಿ, ಉದಯಕುಮಾರ್, ಎಚ್‌ಎಸ್ ಶಿವಪ್ರಕಾಶ್, ರುಸ್ತುಂ ಭರೂಚಾ, ಜಯತಿ ಘೋಷ್, ಜಾನಕಿ ನಾಯರ್, ಸುಧಾ ಪೈ, ಅನ್ವರ್ ಪಾಶಾ, ಆಯಿಷಾ ಕಿದ್ವಾಯಿ, ವೈಎಸ್ ಎಲೋನ್ ಮೊದಲಾದ ಪ್ರಖರ ವಿದ್ವಾಂಸರು ಕೆಲಸ ಮಾಡುತ್ತಿದ್ದಾರೆ. ಇಲ್ಲಿ ಕಲಿತ ಸುಮಾರು 450 ಮಂದಿ ಇಂದು ದೇಶದ ವಿವಿಧೆಡೆಗಳಲ್ಲಿ ಐಎಎಸ್ ಅಧಿಕಾರಿಗಳಾಗಿ ಕೆಲಸ ಮಾಡುತ್ತಿದ್ದಾರೆ. ಯಾವ ಹಮ್ಮು ಬಿಮ್ಮು ಇಲ್ಲದೆ, ಯಾವುದೋ ದಾಬಾದೊಳಗೋ, ಮರದ ಕೆಳಗೋ ಕುಳಿತು ದೇಶ-ವಿದೇಶಗಳ ಬಗೆಗೆ ವಿದ್ಯಾರ್ಥಿಗಳೊಡನೆ ಆಳವಾದ ಸಂವಾದ ನಡೆಸುವ ಇವರುಗಳು, ಈ ವಿಶ್ವವಿದ್ಯಾನಿಲಯವನ್ನು ಅಗ್ರಗಣ್ಯ ಶಿಕ್ಷಣ ಕೇಂದ್ರವನ್ನಾಗಿ ಮಾರ್ಪಡಿಸಿದ್ಧಾರೆ. ಚರ್ಚೆ, ವಾಗ್ವಾದ ಮತ್ತು ಆರೋಗ್ಯಕರ ಭಿನ್ನಮತಗಳ ಮೂಲಕ ಇಲ್ಲಿನ ಜಗತ್ತು ದಿನಾ ತೆರೆದುಕೊಳ್ಳುತ್ತದೆ. ಸದಾ ಉರಿಯುತ್ತಿರುವ ಕಾಶ್ಮೀರ ಸಮಸ್ಯೆ, ಬೆಳೆಯುತ್ತಿರುವ ಆತಂಕ ವಾದ, ನಿವಾರಿಸಿಕೊಳ್ಳಲಾಗದ ಬಡತನ, ದಲಿತರ ಮಾರಣ ಹೋಮ, ಬೆಳೆಯುತ್ತಿರುವ ಕೋಮುವಾದ, ಮನುವಾದ ಮೊದಲಾದ ವಿಷಯಗಳ ಮೇಲೆ ಇಲ್ಲಿ ನಿತ್ಯ ಚರ್ಚೆ ನಡೆಯುತ್ತದೆ. ಅದಕ್ಕೆ ಸಂಬಂಧಿಸಿದ ಸಾಕ್ಷ್ಯ ಚಿತ್ರಗಳ ಪ್ರದರ್ಶನ, ಪೋಸ್ಟರ್‌ಗಳ ರಚನೆ, ಕವಿತೆಗಳ ಬರೆಹ ಇಲ್ಲಿನ ನಿತ್ಯ ಚಟುವಟಿಕೆಗಳು. ಇಷ್ಟಿದ್ದರೂ ಈ ಕಾರಣಕ್ಕೆ ಇಲ್ಲಿ ಹುಡುಗರ ನಡುವೆ ಹೊಡೆದಾಟವಾಗಿಲ್ಲ. ಯಾರೂ ರಾಷ್ಟದ್ರೋಹಕ್ಕೆ ಗುರಿಯಾಗಿ ಗಲ್ಲುಕಂಬ ಏರಿಲ್ಲ. ಈ ಕಾರಣಕ್ಕಾಗಿಯೋ ಏನೋ ಜಗತ್ತಿನಾದ್ಯಂತದಿಂದ ವಿದ್ಯಾರ್ಥಿಗಳು ಇಲ್ಲಿಗೆಬರಲು ಇಚ್ಛಿಸುತ್ತಾರೆ. ಎಡವಾಗಲೀ, ಬಲವಾಗಲೀ ಇಲ್ಲಿನ ಮಕ್ಕಳು ನಾವು ಜೆಎನ್‌ಯುವಿನಲ್ಲಿ ಕಲಿತವರು ಎಂದು ಹೇಳಲು ಸಂಕೋಚ ಪಟ್ಟುಕೊಳ್ಳುವುದಿಲ್ಲ. ಒಂದು ದೇಶದ ಪ್ರಗತಿಯನ್ನು ಅದರ ಬೌದ್ಧಿಕ ಬೆಳವಣಿಗೆಯ ಮೂಲಕ ಗುರುತಿಸುವ ಕ್ರಮವಿದ್ದರೆ, ಅಂಥ ಕಡೆ ಜೆಎನ್‌ಯುವಿಗೆ ಒಂದು ಪ್ರಮುಖ ಸ್ಥಾನವಿದೆ. ಅಂಥ ಸ್ಥಾನ ಪಡೆಯಲು ಬೇಕಾದ ಎಲ್ಲ ಅರ್ಹತೆಗಳೂ ಈ ವಿಶ್ವವಿದ್ಯಾನಿಲಯಕ್ಕಿದೆ. ಆದರೆ 2014ರ ಮೇ ಚುನಾವಣೆಯ ಅನಂತರ ದೇಶದ ಇತಿಹಾಸವನ್ನು ಬರೆಯುವ ಕ್ರಮ ಬದಲಾಗುತ್ತಿರುವಂತೆ ಜೆಎನ್‌ಯುವಿಗೆ ಹೊಸ ಚರಿತ್ರೆಯನ್ನು ಕೆಲವರು ಬರೆಯಲಾರಂಭಿಸಿದರು. ಗಾಂಧಿಯ ಸಾವಿಗೆ ಒಂದು ಬಗೆಯ ಪಶ್ಚಾತ್ತಾಪದಿಂದ ಪರಿತಪಿಸುತ್ತಿದ್ದ ದೇಶದಲ್ಲಿ ಗಾಂಧಿ ಹಂತಕ ಗೋಡ್ಸೆಗೆ ಮನ್ನಣೆ ದೊರೆಯಲಾರಂಭಿಸಿ ಆತನನ್ನು ಹುತಾತ್ಮನ ಹಂತಕ್ಕೆ ಏರಿಸಿ, ಆತನಿಗೊಂದು ಗುಡಿ ಕಟ್ಟುವುದನ್ನು ದೇಶ ಕಂಡಿತು. ಮಾನವನ ಘನತೆಗಿಂತ ಪಶುಗಳ ಘನತೆ ಹೆಚ್ಚಾಯಿತು. ಸರಕಾರವನ್ನು ದೇಶದೊಂದಿಗೆ ಸಮೀಕರಿಸುವ ಪರಿಕ್ರಮದಲ್ಲಿ ಸರಕಾರದ ನೀತಿ ನಿಯಮಗಳನ್ನು ವಿಮರ್ಶಿಸಿದರೆ ಅದು ದೇಶದ್ರೋಹವೆಂಬಂತೆ ಕಾಣತೊಡಗಿತು.

ದೇಶದ ಆರ್ಥಿಕ ನೀತಿಯನ್ನು ಪ್ರಶ್ನಿಸಿ ಅದರಿಂದ ದೇಶದ ಬಡವರಿಗಾಗುವ ತೊಂದರೆಗಳನ್ನು ವಿಶ್ಲೇಷಿದರೆ ಅಂಥವರನ್ನು ರಾಷ್ಟ್ರದ್ರೋಹಿಯೆಂದು ಬಣ್ಣಿಸಲಾಯಿತು. ಹತ್ತಾರು ಜನ ಸುದೀರ್ಘವಾಗಿ ಚರ್ಚಿಸಿ, ದೇಶದ ಎಲ್ಲ ಜನರ ಒಳಿತು ಮತ್ತು ಅಭಿವೃದ್ಧಿಗಾಗಿ ನಿರ್ಮಿಸಿದ ಸಂವಿಧಾನವು ಯಾವುದೋ ಒಂದು ಸಣ್ಣ ಗುಂಪು ತನ್ನ ಸ್ವಾರ್ಥಕ್ಕಾಗಿ ನಿರ್ಮಿಸಿಕೊಂಡ ಶಾಸ್ತ್ರಗಳೆದುರು ತಲೆ ತಗ್ಗಿಸಿ ನಿಲ್ಲುವಂತಾಯಿತು. ದೇವ ಮಾನವರು, ಜ್ಯೋತಿಷಿಗಳು, ದನ ಕಾಯುವವರೇ ಮೊದಲಾದ ಜನಗಳೆದುರು ಬುದ್ಧಿಜೀವಿಗಳು ತಲೆತಗ್ಗಿಸಿ ನಿಲ್ಲುವಂತಾಯಿತು. ವಿಚಾರವಾದಿಗಳನ್ನು ಗುಂಡಿಕ್ಕಿ ಕೊಲ್ಲಲಾಯಿತು.

ಇಂಥ ಪರಿಸ್ಥಿತಿಯಲ್ಲಿ ಜೆಎನ್‌ಯು ಖಳನಾಯಕರನ್ನು ಸೃಷ್ಟಿಸುವ ಕೇಂದ್ರವಾಗಿ ಅಧಿಕಾರದಲ್ಲಿರುವವರಿಗೆ ಮತ್ತು ಅವರನ್ನು ಅಂಧವಾಗಿ ಅನುಸರಿಸುವವರಿಗೆ ಕಾಣತೊಡಗಿದ್ದರೆ ಅಚ್ಚರಿಯೇನಿಲ್ಲ. ಈ ಹೊಸ ಚರಿತ್ರೆಯ ಪ್ರಕಾರ ಜೆಎನ್‌ಯು ದೇಶದ್ರೋಹಿಗಳ ಸಂತೆ. ಈ ಮಾತನ್ನು ಅಲ್ಲಿ ಯಾವ ವಿಶೇಷ ಘಟನೆಗಳೂ ನಡೆಯುವ ಮುನ್ನವೇ ಆಗಾಗ ಹೇಳಲಾಗುತ್ತಿತ್ತು. ಬುದ್ಧಿ ಜೀವಿಗಳನ್ನು ದ್ವೇಷಿಸುವ ಜನಗಳ ನಡುವೆ ಗಂಭೀರ ಸಂಶೋಧನೆಗಳಿಗೆ ಮಹತ್ವ ಸಿಗದಿರುವುದು ಅಸಹಜವೇನಲ್ಲ. 2016 ಫೆಬ್ರವರಿ ತಿಂಗಳಿನಲ್ಲಿ ವಿಶ್ವವಿದ್ಯಾನಿಲಯದ ಆವರಣದಲ್ಲಿ ನಡೆದ ಅನಪೇಕ್ಷಿತ ಘಟನೆಗಳನ್ನು ಆಧರಿಸಿ ಸರಕಾರವು ತಕ್ಷಣವೇ ಯಾವುದೇ ಭಿನ್ನ ಮತವನ್ನು ಹತ್ತಿಕ್ಕುವ ತನ್ನ ಪ್ರಜಾಪ್ರಭುತ್ವ ವಿರೋಧಿ ಕಾರ್ಯಸೂಚಿಯನ್ನು ನಾಚಿಕೆಯಿಲ್ಲದೆ ಜಗತ್ತಿನ ಮುಂದೆ ತೆರೆದಿಟ್ಟಿತು. ತನ್ನ ಗುಪ್ತಚರ ಇಲಾಖೆ ಯು ಗುರುತಿಸಲಾಗದ ಸತ್ಯಗಳನ್ನು ದೇಶದ್ರೋಹಿ ಹಫೀಝ್ ಸಯೀದ್ ಅವರ ನಕಲಿ ಟ್ವಿಟರ್‌ನಲ್ಲಿ ಕಂಡ ಗೃಹಮಂತ್ರಿಗಳು ಅದನ್ನು ಮೆಚ್ಚಿಕೊಂಡದ್ದಲ್ಲದೆ ಒಂದಿಷ್ಟೂ ತಡಮಾಡದೆ ಜಗಜ್ಜಾಹೀರುಗೊಳಿಸಿದರು.ಅಫ್ಝಲ್ ಗುರುವನ್ನು ಹುತಾತ್ಮ ಎಂದು ಬಣ್ಣಿಸಿ, ಅವನನ್ನು ನೇಣಿಗೇರಿಸಿದ ಕ್ರಮವನ್ನು ಬಲವಾಗಿ ವಿರೋಧಿಸಿದ ಜಮ್ಮು ಕಾಶ್ಮೀರದ ಪಿಡಿಪಿ ಯೊಡನೆ ಕಾಶ್ಮೀರದಲ್ಲಿ ಅಧಿಕಾರ ಹಿಡಿಯಲು ಹಿಂದೆ ಮುಂದೆ ನೋಡದೆ ಕೈಜೋಡಿಸಿದ ಕೇಂದ್ರ ಸರಕಾರಕ್ಕೆ ಕೆಲವು ಹುಡುಗರ ಘೋಷಣೆಯು ಭಯಾನಕ ದುಸ್ವಪ್ನದಂತೆ ಕಂಡಿತು. ಸರಕಾರ ನೂರಾರು ಪೊಲೀಸರನ್ನು ವಿಶ್ವವಿದ್ಯಾನಿಲಯದೊಳಗೆ ಕ್ಷಣ ಮಾತ್ರದಲ್ಲಿ ನುಗ್ಗಿಸಿತು. ತನಗಿರುವ ಅಧಿಕಾರದ ಬಲದಿಂದ ಇಡೀ ವಿಶ್ವವಿದ್ಯಾನಿಲಯವೇ ದೇಶದ್ರೋಹಿಗಳ ಆವಾಸ ಸ್ಥಾನವೆಂದು ಪ್ರಚುರ ಪಡಿಸಿತು. ಮುಗ್ಧರೂ ವಿಕೃತ ಮನಸ್ಸಿನವರೂ ಅದನ್ನು ಒಟ್ಟಾಗಿಯೇ ನಂಬಿದರು. ಸರಕಾರಕ್ಕೆ ಘೋಷಣೆ ಒಂದು ನೆಪ ಮಾತ್ರ, ವಿಶ್ವವಿದ್ಯಾನಿಲಯದ ಸ್ವಾಯತ್ತೆಯನ್ನು ಕಸಿದುಕೊಂಡು ಅದನ್ನು ನಾಶಮಾಡುವುದು ಅದಕ್ಕೆ ಅಗತ್ಯ ಬೇಕಾಗಿದ್ದ ಕೆಲಸ. ಜಗತ್ತಿನ ಎಲ್ಲ ಫ್ಯಾಶಿಸ್ಟ್ ಶಕ್ತಿಗಳೂ ಹೀಗೆ ಮಾಡಿವೆ. 2016ರ ಫೆಬ್ರವರಿ 9ರಂದು ಡಿಎಸ್‌ಯು ( ಡೆಮಾಕ್ರಾಟಿಕ್ ಸ್ಟುಡೆಂಟ್ಸ್ ಯೂನಿಯನ್) ಎಂಬ ಸಣ್ಣ ಗುಂಪೊಂದು ಅಫ್ಝಲ್ ಗುರುವಿನ ಸ್ಮರಣಾರ್ಥ ಕಾರ್ಯಕ್ರಮ ನಡೆಸಲು ಅಪ್ಪಣೆ ಕೋರಿ ವಿಶ್ವವಿದ್ಯಾನಿಲಯಕ್ಕೆ ಪತ್ರ ಬರೆದಿತ್ತು. ವಿಶ್ವವಿದ್ಯಾನಿಲಯ ಅದಕ್ಕೆ ಒಪ್ಪಿಗೆ ನೀಡಿರಲಿಲ್ಲ. ಈ ವಿದ್ಯಾರ್ಥಿ ಸಂಘಟನೆಗೆ ಕ್ಯಾಂಪಸ್‌ನಲ್ಲಿ ಅಂಥ ಮನ್ನಣೆಯೇನೂ ಇಲ್ಲ. ಅದು ವಿದ್ಯಾರ್ಥಿ ಸಂಘದ ಚುನಾವಣೆಯಲ್ಲಿಯೂ ಸ್ಫರ್ಧಿಸಿರಲ್ಲ. ಹುಡುಗರು ಅದನ್ನು ದಸ್ ನಂಬರ್ ಕಾ ಯೂನಿಯನ್ (ಡಿಎಸ್‌ಯು) ಎಂದು ತಮಾಷೆ ಮಾಡುತ್ತಿರುತ್ತಾರೆ.

ವಿಶ್ವವಿದ್ಯಾನಿಲಯದ ಒಪ್ಪಿಗೆ ಇಲ್ಲದಿದ್ದರೂ ಸಾಂಸ್ಕೃತಿಕ ಕಾರ್ಯಕ್ರಮವನ್ನು ರಾತ್ರಿ ಹೊತ್ತು ನಡೆಸಲು ಈ ಸಂಘಟನೆ ನಿರ್ಧರಿಸಿದ್ದನ್ನು ತಿಳಿದ ಅಖಿಲ ಭಾರತೀಯ ವಿದ್ಯಾರ್ಥಿ ಪರಿಷತ್ತಿನ ಸದಸ್ಯರು ಈ ವಿಷಯನ್ನು ಪ್ರಜಾಸತ್ತಾತ್ಮಕವಾಗಿ ಸಂಬಂಧಿಸಿದವರ ಗಮನಕ್ಕೆ ತರುವ ಮುನ್ನವೇ ಅವರೊಡನೆ ಸಂಘರ್ಷಕ್ಕೆ ಇಳಿಯಲು ಮುಂದಾಯಿತು ಮತ್ತು ಅದನ್ನು ಸ್ಥಳೀಯ ಜನ ಪ್ರತಿನಿಧಿಗಳಿಗೆ ತಿಳಿಸಿತು. ಒಳಗಿದ್ದ ನಮ್ಮಂಥ ಜನರಿಗೆ ಏನಾಯಿತು ಎಂದು ತಿಳಿಯುವ ಮುನ್ನವೇ ಭಾರತೀಯ ಜನತಾ ಪಕ್ಷದ ಕಾರ್ಯಕರ್ತರು ಸ್ಥಳೀಯರನ್ನು ಸಂಘಟಿಸಿದರು. ಪೊಲೀಸರನ್ನು ಸಂಪರ್ಕಿಸಿದರು. ಸ್ಥಳೀಯ ಬಿಜೆಪಿ ಸಂಸದರು ಎಲ್ಲ ಬಗೆಯ ಆಕ್ರಮಣಕ್ಕೆ ಸಿದ್ಧರಾಗಿ ವಿಶ್ವವಿದ್ಯಾನಿಲಯವನ್ನು ದೇಶದ್ರೋಹಿಗಳ ಸ್ಥಳ ಎಂದು ಬಣ್ಣಿಸುವಲ್ಲಿ ಯಶಸ್ವಿಯಾದರು. ಈ ನಡುವೆ ಸತ್ಯ ಶೋಧನೆಗೆ ವಿಶ್ವವಿದ್ಯಾನಿಲಯದ ಕುಲಪತಿಗಳು ರಚಿಸಿದ ಸಮಿತಿಗೆ ಯಾವ ಮನ್ನಣೆಯೂ ದೊರೆಯದಾಯಿತು. ಸ್ವತಃ ಕೇಂದ್ರ ಸರಕಾರದ ಗೃಹ ಮಂತ್ರಿಗಳೇ ದೇಶದ್ರೋಹದ ಮಾತಾಡಿದ್ದಲ್ಲಿಗೆ ಬರೆದ ನಾಟಕದ ಒಂದು ಅಂಕ ಮುಗಿದಿತ್ತು. 8,000 ವಿದ್ಯಾರ್ಥಿಗಳಿರುವ ಜೆಎನ್‌ಯುವಿನಲ್ಲಿ ಆರೇಳು ಮಂದಿ ಕಾಶ್ಮೀರಿ ಪರವಾದ ಘೋಷಣೆಗಳನ್ನು ಕೂಗಿದರು ಎಂದೇ ಇಟ್ಟುಕೊಳ್ಳೋಣ. ಆದರೆ ಅದು ಜೆಎನ್‌ಯುವಿನ ಧ್ವನಿಯಾಗುವುದು ಹೇಗೆ? ಜೊತೆಗೆ ಕಾಶ್ಮೀರಿ ಸಮಸ್ಯೆಯ ಬಗೆಗೆ ಭಿನ್ನ ಭಿನ್ನ ಅಭಿಪ್ರಾಯಗಳು ಇರುವುದು ನಿಜ ತಾನೇ? ಒಂದು ಹಂತದಲ್ಲಿ ಚೀನಾ ಮತ್ತು ಅಮೆರಿಕವು ಕೂಡಾ ಕಾಶ್ಮೀರಿಗಳ ಪರವಾಗಿ ಮಾತಾಡಿದ್ದುಂಟು. ಇಂಥ ಸಂಕೀರ್ಣ ಸಂದರ್ಭದಲ್ಲಿ ಘೋಷಣೆ ಕೂಗಿದ ಆ ಆರೇಳು ವಿದ್ಯಾರ್ಥಿಗಳನ್ನು ಶಿಕ್ಷಿಸುವ ಬದಲು ಇಡೀ ವಿಶ್ವವಿದ್ಯಾನಿಲಯವನ್ನೇ ರಾಷ್ಟ್ರ ವಿರೋಧೀ ಎಂಬಂತೆ ಚಿತ್ರಿಸಲಾಯಿತು. ಇದೊಂದು ದೊಡ್ಡ ಹುನ್ನಾರವೆಂದು ಬೇರೆ ಹೇಳಬೇಕಾಗಿಲ್ಲ. ನೂರಾರು ಪೊಲೀಸರು, ರಾಜಕಾರಣಿಗಳು, ನಕಲಿ ರಾಷ್ಟ್ರ ಭಕ್ತರು ಆಗ ನಡೆದುಕೊಂಡ ರೀತಿಯು ಹುಸಿ ರಾಷ್ಟ್ರೀಯತೆಯನ್ನು ಹುಟ್ಟುಹಾಕಿತು. ಜೊತೆಗೆ ಕನ್ಹಯ್ಯಾಕೂಗಿದ ಘೋಷಣೆಯಲ್ಲಿ ‘‘ನಮಗೆ ಅಜಾದೀ ( ಸ್ವಾತಂತ್ರ) ಬೇಕು, ಬಡತನದಿಂದ, ಹಸಿವಿನಿಂದ, ಶೋಷಣೆಯಿಂದ, ಮನುವಾದದಿಂದ’’ ಎಂಬಂಥ ಸಾಲುಗಳಿದ್ದುವು.

ಯಾವ ರಾಷ್ಟ್ರವಾದರೂ ಬಲಗೊಳ್ಳಬೇಕಾದರೆ ಅಗತ್ಯ ಆಗಬೇಕಾಗಿರುವ ಕೆಲಸಗಳಿವು. ಆದರೆ ಈ ಮಾತುಗಳಿಗೆ ಮುಂದೆ ಕನ್ಹಯ್ಯಾ ಭಾರೀ ಬೆಲೆ ತೆರಬೇಕಾಯಿತು. ಜೈಲುವಾಸದ ಜೊತೆಗೆ ನ್ಯಾಯಾಲಯದಲ್ಲಿ ವಕೀಲರಿಂದಲೇ ಆಕ್ರಮಣ. ಕೊನೆಗೇನಾಯಿತು? ಇಷ್ಟು ಸಮಯದ ಆನಂತರವೂ ಆತನ ಮೇಲೆ ಒಂದು ಕೇಸು ಕೂಡಾ ದಾಖಲು ಮಾಡಲಾಗಲಿಲ್ಲ. ಆದರೆ ಉನ್ಮತ್ತ ಜನರು ರಾಷ್ಟ್ರ ಭಕ್ತಿಯ ನೆವದಲ್ಲಿ ನ್ಯಾಯಾಲಯದಲ್ಲಿಯೇ ಆಕ್ರಮಣ ಮಾಡುವಲ್ಲಿ ಯಶಸ್ವಿಯಾದರು. ಈ ನಡುವೆ ಜೆಎನ್‌ಯು ವಿನ ಪ್ರಜ್ಞಾವಂತ ಅಧ್ಯಾಪಕರು ರಾಷ್ಟ್ರೀಯತೆಯ ವಿಭಿನ್ನ ನಿರೂಪಣೆಗಳ ಮೇಲೆ ಒಟ್ಟು 27 ವಿಶೇಷ ಉಪನ್ಯಾಸಗಳನ್ನು ಸಾರ್ವಜನಿಕರಿಗಾಗಿ ಏರ್ಪಡಿಸಿತು. ಆ ಉಪನ್ಯಾಸಗಳು ಮುಂದೆ ಪುಸ್ತಕರೂಪದಲ್ಲಿಯೂ ಪ್ರಕಟವಾಯಿತು. ರಾಷ್ಟ್ರೀಯತೆಯ ಕುರಿತಾದ ಗಂಭೀರವಾದ ಚರ್ಚೆಗಳವು. ಆಗ ವಿದ್ಯಾರ್ಥಿ ನಾಯಕನಾಗಿದ್ದ ಕನ್ಹಯ್ಯಾ ಅವರು ಬಲಪಂಥೀಯ ರಾಜಕಾರಣದ ಮೊದಲ ಗುರಿಯಾದ್ದರಿಂದ ಅವರ ಮೇಲೆ ಅಲ್ಲ ಸಲ್ಲದ ಆರೋಪ ಹೊರಿಸಲಾಯಿತು.

ಅವರನ್ನು ನ್ಯಾಯಾಲಯದಲ್ಲಿ ಪ್ರಸ್ತುತ ಪಡಿಸುವ ಸಂದರ್ಭದಲ್ಲಿ ರಾಷ್ಟ್ರವಾದಿಗಳೆಂದು ಘೋಷಿಸಿಕೊಂಡ ನಕಲಿ ಜನರು ನಡೆದುಕೊಂಡ ರೀತಿ ಅವರಿಗೆ ನ್ಯಾಯಾಲಯದ ಮೇಲಾಗಲೀ ಸಂವಿಧಾನದ ಮೇಲಾಗಲೀ ಯಾವ ನಂಬಿಕೆಯೂ ಇಲ್ಲವೆಂಬುದನ್ನು ಪ್ರಕಟಪಡಿಸಿತು. ಸ್ವಲ್ಪ ಜಾಗ್ರತೆಯಿಂದ ಮುಂದಾಲೋಚಿಸಿ, ದೇಶದ ವಿರುದ್ಧ ಘೋಷಣೆ ಕೂಗಿದವರ ಮೇಲೆ ಕ್ರಮ ಕೈಗೊಂಡಿದ್ದರೆ ಏನೂ ಆಗುತ್ತಿರಲಿಲ್ಲ. ರೋಹಿತ ವೇಮುಲ ಪ್ರಕರಣ ಮತ್ತು ಜೆಎನ್‌ಯು ಪ್ರಕರಣದಲ್ಲಿ ಕೇಂದ್ರ ಸರಕಾರವು ನಡಕೊಂಡ ರೀತಿ ಅದು ಹೇಗೆ ತನ್ನ ಅಪಕ್ವ ಮತ್ತು ಅಪಾಯಕಾರಿ ನಿಲುವುಗಳಿಂದ ಶಿಕ್ಷಣ ಸಂಸ್ಥೆಗಳನ್ನು ನಾಶ ಮಾಡಬಲ್ಲುದು ಎಂಬುದನ್ನು ಜಗತ್ತಿಗೇ ಸಾರಿ ಹೇಳಿತು. ಯಾವುದೇ ಭಿನ್ನ ಮತವನ್ನು ಸಹಿಸಲಾರದ ಅದರ ಉದ್ದೇಶ ಜೆಎನ್‌ಯುವನ್ನು ಮೂಲಭೂತವಾಗಿ ಬದಲಾಯಿಸುವುದೇ ಆಗಿತ್ತು. ನಡೆದ ಘಟನೆಗಳು ಕೇವಲ ನೆಪ ಮಾತ್ರ.

ನಮಗೆಲ್ಲಾ ಈಗ ತಿಳಿದಂತೆ ಈ ಘಟನೆ ಅಂತಾರಾಷ್ಟ್ರೀಯವಾಯಿತು. ಅದು ಜೆಎನ್‌ಯು ವಿನ ಸಾಧನೆಗಳಿಗೆ ಸಿಕ್ಕ ಮನ್ನಣೆಯೂ ಆಗಿತ್ತು. ಪ್ರಖ್ಯಾತವಾದ ಕೊಲಂಬಿಯಾ, ಆಕ್ಸ್‌ಫರ್ಡ್, ಯೇಲ್, ಹಾರ್ವರ್ಡ್, ಕೇಂಬ್ರಿಡ್ಜ್ ಮೊದಲಾದ ಪ್ರಮುಖ ವಿಶ್ವವಿದ್ಯಾನಿಲಯಗಳ ಸುಮಾರು 400ಕ್ಕೂ ಹೆಚ್ಚು ಪ್ರಮುಖ ಚಿಂತಕರು ಜೆಎನ್‌ಯು ವಿನಲ್ಲಾದ ಅನ್ಯಾಯವನ್ನು ಪ್ರತಿಭಟಿಸಿ ಪತ್ರ ಬರೆದರು. ಲಂಡನ್‌ನಲ್ಲಿರುವ ಸ್ಕೂಲ್ ಆಫ್ ಓರಿಯೆಂಟಲ್ ಮತ್ತು ಆಫ್ರಿಕನ್ ಸ್ಟಡೀಸ್‌ನ ಅನೇಕ ವಿದ್ವಾಂಸರು ವಿಶ್ವವಿದ್ಯಾನಿಲಯವೊಂದರ ಸ್ವಾಯತ್ತೆಯ ಮೇಲೆ ನಡೆದ ಹಲ್ಲೆಯನ್ನು ತೀವ್ರವಾಗಿ ಖಂಡಿಸಿದರು. ದಕ್ಷಿಣ ಏಶ್ಯಾ ವಿಶ್ವವಿದ್ಯಾನಿಲಯಗಳ ಒಕ್ಕೂಟ ಕಟು ಶಬ್ದಗಳಲ್ಲಿ ಘಟನೆಯನ್ನು ವಿರೋಧಿಸಿದೆ. ಭಾರತದಲ್ಲಿ ಎಲ್ಲವೂ ಸರಿಯಿಲ್ಲ ಎಂಬ ಸಂದೇಶವು ಪ್ರಧಾನ ಮಂತ್ರಿ ಮೋದಿಯವರ ವರ್ಚಸ್ಸಿಗೆ ಧಕ್ಕೆ ತಂದದ್ದೂ ನಿಜ, ಇಂಥ ಘಟನೆಗಳು ಅವರು ಬಯಸುವ ವಿದೇಶಿ ಬಂಡವಾಳ ಹೂಡಿಕೆಯಮೇಲೆ ನಿರ್ಣಾಯಕ ಪರಿಣಾಮ ಬೀರಿದ್ದೂ ನಿಜ. ಅವರ ವಿಶ್ವನಾಯಕನಾಗುವ ಕನಸು ಮತ್ತೆ ದೂರ ದೂರ ಸರಿಯುತ್ತಿದ್ದರೂ ಹುಸಿ ಭಕ್ತರು ಮಾತ್ರ ಜೆಎನ್‌ಯುವಿನ ಮೇಲೆ ಗೂಬೆ ಕೂರಿಸುತ್ತಲೇ ಇದ್ದರು. ಸರಕಾರದ ವಿಫಲತೆಯನ್ನು ಮುಚ್ಚಿಕೊಳ್ಳಲು ವಿಶ್ವವಿದ್ಯಾನಿಲಯದ ಘಟನೆಗಳು ಸಹಾಯಕವಾದುವು. ದಿನದಿಂದ ದಿನಕ್ಕೆ ಅಪಮೌಲ್ಯಗೊಳ್ಳುತ್ತಿರುವ ರೂಪಾಯಿ, ಬಂಡವಾಳ ಹೂಡುವಿಕೆಯಲ್ಲಿ ಕಂಡು ಬರುವ ಹಿಂಜರಿಕೆ, ರೈತರ ಸಾವು, ದೇವ ಮಾನವರ ಲಫಂಗತನ ಇತ್ಯಾದಿ ಪ್ರಮುಖ ಸಮಸ್ಯೆಗಳನ್ನು ತಾತ್ಕಾಲಿಕವಾಗಿ ಮರೆಯಲು ಇಂಥ ಘಟನೆಗಳು ಸಹಕರಿಸಿದುವು. ಹುಸಿ ದೇಶಭಕ್ತಿಯು ಹೇಗೆ ದೇಶವನ್ನೇ ನಾಶ ಮಾಡಬಲ್ಲುದು ಎಂಬುದಕ್ಕೆ ನಾವೆಲ್ಲ ಇಂದು ಸಾಕ್ಷಿಗಳಾಗುತ್ತಿದ್ದೇವೆ. ಪ್ರಜಾಪ್ರಭುತ್ತದಲ್ಲಿ ಭಿನ್ನ ಮತವನ್ನು ಮತ್ತು ಯೋಚಿಸುವ ಹಕ್ಕನ್ನು ಹತ್ತಿಕ್ಕುವುದಕ್ಕಿಂತ ದೊಡ್ಡದಾದ ರಾಷ್ಟ್ರ ದ್ರೋಹ ಬೇರಿಲ್ಲ. ಇಂಥ ವಿಷಯಗಳ ಕುರಿತು ಮುಕ್ತಚಿಂತನೆಗೆ ಮತ್ತು ವಿಮರ್ಶೆಗೆ ಪೂರ್ಣ ಅವಕಾಶ ಕೊಡುವುದು ಪ್ರಜಾಪ್ರಭುತ್ವವಾದಿ ಸರಕಾರಗಳ ಅತೀ ದೊಡ್ಡ ಜವಾಬ್ದಾರಿ ಎಂಬುದನ್ನು ಸರಕಾರವೇ ಮರೆತಿತು. ಜನರ ನೈತಿಕತೆಯನ್ನು ಹೆಚ್ಚಿಸಲು, ಸಮಾಜದ ಸ್ವಾಸ್ಥ್ಯವನ್ನು ಕಾಪಾಡಲು, ಪ್ರಜಾಪ್ರಭುತ್ವದ ಬೇರುಗಳನ್ನು ಬಲಗೊಳಿಸಲು ಮತ್ತು ಜೊತೆಗಿರುವ ಜನರ ಯೋಚನಾ ಶಕ್ತಿಯನ್ನು ತೀಕ್ಷ್ಣಗೊಳಿಸಲು ಸರಕಾರಗಳು ಬೌದ್ಧಿಕ ಸಂವಾದಗಳನ್ನು ಪ್ರೋತ್ಸಾಹಿಸುತ್ತಿರಬೇಕು. ಅಂಥ ಬೌದ್ಧಿಕತೆ ಕಳೆಗುಂದುತ್ತಿರುವಾಗ ಸಂಸ್ಕೃತಿಯೂ ಬಲಿಷ್ಠವಾಗಿರುವುದಿಲ್ಲ, ರಾಷ್ಟ್ರವೂ ಪ್ರಗತಿ ಹೊಂದುವುದಿಲ್ಲ. ಕೆಲವು ವಿದ್ಯಾರ್ಥಿಗಳು ಕೂಗಿದ ಘೋಷಣೆ ಯಾವ ಹಿಂಸೆಗೆ ಹಾದಿ ಮಾಡಿಕೊಟ್ಟಿತೋ ಪೊಲೀಸರೇ ಹೇಳಬೇಕು. ಆದರೆ ಪೊಲೀಸ್ ಶಕ್ತಿಗಳು ಆಳುವವರ ಪರವಾಗಿ ನಿಂತು ಬೆನ್ನುಲುಬು ಇಲ್ಲದಂತೆ ಕೆಲಸ ಮಾಡಿದ್ದಂತೂ ನಿಜ. ಈಗ ಹಿಂದಿನ ಘಟನೆಗಳನ್ನು ನೆವ ಮಾಡಿಕೊಂಡು ಕೆಲವರು ಜೆಎನ್‌ಯುವನ್ನು ಕವಲು ಹಾದಿಯಲ್ಲಿ ತಂದು ನಿಲ್ಲಿಸಿದ್ದಾರೆ. ಈಚಿನ ಸುದ್ದಿಗಳ ಪ್ರಕಾರ ವಿಶ್ವವಿದ್ಯಾನಿಲಯದಲ್ಲಿ ಮೆನೇಜ್ ಮೆಂಟ್ ಕೋರ್ಸುಗಳು ಮತ್ತು ಇಂಜಿನಿಯರ್ ಕೋರ್ಸ್‌ಗಳು ಆರಂಭ ವಾಗಲಿವೆ, ಇವಕ್ಕೆ ಅನುದಾನ ನೀಡಲು ಖಾಸಗಿ ಕಂಪೆನಿಗಳೂ ಮುಂದೆ ಬಂದಿವೆ. ಅಲ್ಲಿಗೆ ವಿಶ್ವವಿದ್ಯಾನಿಲಯದ ಒಂದು ಚರಿತ್ರೆ ಮುಗಿದಂತೆ ಮತ್ತು ಹೊಸ ಚರಿತ್ರೆ ಆರಂಭವಾದಂತೆ ಆಗುತ್ತದೆ. 48 ವರ್ಷಗಳ ಕಠಿಣ ಶ್ರಮ, ಬದ್ಧತೆ, ರಾಷ್ಟ್ರವನ್ನು ವಿಮರ್ಶಾತ್ಮಕವಾಗಿ ಬಲಪಡಿಸುವ ಬೌದ್ಧಿಕ ಹಠ, ಭಿನ್ನ ಮತಗಳಿಗೆ ಪೂರ್ಣ ಅವಕಾಶ ಮೊದಲಾದ ಗುಣಗಳು ತೆರೆಮರೆಗೆ ಸಂದಂತೆಆಗುತ್ತದೆ. ಪ್ರಜಾಪ್ರಭುತ್ವವಾದಿ ಭಾರತದಲ್ಲಿ ಇದೊಂದು ಕಪ್ಪು ಚುಕ್ಕೆಯಾಗಿ ಉಳಿಯಲಿದೆ.

 

Comments (Click here to Expand)