varthabharthi

ಕ್ರೀಡೆ

ಇಟಲಿ ಗೋಲ್‌ಕೀಪರ್ ಬಫನ್ ಕಣ್ಣೀರಿನ ವಿದಾಯ

ವಾರ್ತಾ ಭಾರತಿ : 14 Nov, 2017

ಮಿಲಾನ್, ನ.14: ಆರನೆ ಬಾರಿ ವಿಶ್ವಕಪ್‌ನಲ್ಲಿ ಭಾಗವಹಿಸುವ ಮೂಲಕ ದಾಖಲೆ ನಿರ್ಮಿಸುವ ಕನಸು ಕಂಡಿದ್ದ ಇಟಲಿ ತಂಡದ ಹಿರಿಯ ಗೋಲ್‌ಕೀಪರ್ ಗಿಯಾನ್‌ಲುಗಿ ಬಫನ್ ಸೋಮವಾರ ಕಣ್ಣೀರಿನ ವಿದಾಯ ಹೇಳಿದ್ದಾರೆ.

 2018ರಲ್ಲಿ ರಶ್ಯದಲ್ಲಿ ವಿಶ್ವಕಪ್‌ನಲ್ಲಿ ಆಡುವುದರೊಂದಿಗೆ ಅಂತಾರಾಷ್ಟ್ರೀಯ ಫುಟ್ಬಾಲ್ ವೃತ್ತಿ ಬದುಕಿಗೆ ವಿದಾಯ ಹೇಳುವ ಯೋಚನೆಯಲ್ಲಿದ್ದ ಬಫನ್ ಸ್ವೀಡನ್ ವಿರುದ್ಧ ವಿಶ್ವಕಪ್‌ನ 2ನೆ ಪ್ಲೇ-ಆಫ್ ಪಂದ್ಯದ ಬಳಿಕ ದಿಢೀರನೆ ನಿವೃತ್ತಿ ಘೋಷಿಸಿದ್ದಾರೆ. ಸ್ವೀಡನ್ ವಿರುದ್ಧ ಸೋತಿರುವ ಇಟಲಿ ಸುಮಾರು 60 ವರ್ಷಗಳ ಬಳಿಕ ವಿಶ್ವಕಪ್‌ಗೆ ಅರ್ಹತೆ ಪಡೆಯಲು ವಿಫಲವಾಗಿದೆ.

  ಕಳೆದ 20 ವರ್ಷಗಳಿಂದ ಇಟಲಿ ತಂಡವನ್ನು ಪ್ರತಿನಿಧಿಸಿರುವ 39ರ ಹರೆಯದ 175 ಪಂದ್ಯಗಳನ್ನು ಆಡಿ ದಾಖಲೆ ನಿರ್ಮಿಸಿದ್ದಾರೆ. ಸ್ವೀಡನ್ ವಿರುದ್ಧ ಆಡಿರುವ 2018ರ ವಿಶ್ವಕಪ್‌ನ ಎರಡನೆ ಪ್ಲೇ-ಆಫ್ ಪಂದ್ಯವು ಬಫನ್‌ರ ಕೊನೆಯ ಪಂದ್ಯವಾಗಿದೆ.

1998ರ ವಿಶ್ವಕಪ್ ಪ್ಲೇ-ಆಫ್ ಪಂದ್ಯದಲ್ಲಿ ರಶ್ಯ ವಿರುದ್ಧ ಆಡುವ ಮೂಲಕ ತನ್ನ 19ನೆ ವಯಸ್ಸಿನಲ್ಲಿ ಬಫನ್ ಫುಟ್ಬಾಲ್‌ಗೆ ಪಾದಾರ್ಪಣೆಗೈದಿದ್ದರು. ವೃತ್ತಿಜೀವನದಲ್ಲಿ ಈತನಕ ಐದು ಬಾರಿ ವಿಶ್ವಕಪ್‌ನಲ್ಲಿ ಭಾಗವಹಿಸಿರುವ ಅವರು ಆರನೆ ಬಾರಿ ವಿಶ್ವಕಪ್ ಆಡಿದ ಮೊದಲ ಆಟಗಾರನಾಗುವ ಕನಸು ಕಂಡಿದ್ದರು. ಆದರೆ ಅವರ ಕನಸು ಕೈಗೂಡಲಿಲ್ಲ. 2006ರಲ್ಲಿ ಫಿಫಾ ವಿಶ್ವಕಪ್‌ನ್ನು ಎತ್ತಿ ಹಿಡಿದಿದ್ದರು.

‘‘ಕ್ರೀಡಾದೃಷ್ಟಿಯಿಂದ ಇದು ನನ್ನ ಜೀವನದ ಅತ್ಯಂತ ನಿರಾಶಾದಾಯಕ ಕ್ಷಣ..ನನಗೆ ಮಾತನಾಡಲು ಪದಗಳೇ ಸಿಗುತ್ತಿಲ್ಲ. ಇಟಲಿ ತಂಡಕ್ಕೆ ಖಂಡಿತವಾಗಿಯೂ ಉತ್ತಮ ಭವಿಷ್ಯವಿದೆ. ತಂಡದಲ್ಲಿ ಹಲವು ಪ್ರತಿಭಾವಂತ ಆಟಗಾರರಿದ್ದಾರೆ’’ ಎಂದು ಬಫನ್ ಹೇಳಿದರು.

ಜುವೆಂಟಸ್ ಪರ 8 ಸೀರಿಸ್ ಎ ಪ್ರಶಸ್ತಿಯನ್ನು ಜಯಿಸಿರುವ ಬಫನ್ ಇಟಲಿ ತಂಡ ಜರ್ಮನಿಯಲ್ಲಿ 2006ರಲ್ಲಿ ಫಿಫಾ ವಿಶ್ವಕಪ್ ಜಯಿಸಲು ಪ್ರಮುಖ ಪಾತ್ರವಹಿಸಿದ್ದರು. ಯುಇಎಫ್‌ಎ ವರ್ಷದ ಆಟಗಾರ ಪ್ರಶಸ್ತಿ ಪಡೆದ ಏಕೈಕ ಗೋಲ್‌ಕೀಪರ್ ಬಫನ್.

ಕ್ರೀಡಾಕುಟುಂಬದಲ್ಲಿ ಜನಿಸಿರುವ ಬಫನ್ ತಾಯಿ ಡಿಸ್ಕಸ್ ಥ್ರೋವರ್ ಹಾಗೂ ತಂದೆ ವೇಟ್‌ಲಿಫ್ಟರ್ ಆಗಿದ್ದರು. 12ರ ಹರೆಯದಲ್ಲಿ ಗೋಲ್‌ಕೀಪರ್ ವೃತ್ತಿ ಆರಂಭಿಸಿದ ಬಫನ್ 40ನೆ ಹರೆಯದ ತನಕ ವಿಶ್ವ ಶ್ರೇಷ್ಠ ಗೋಲ್‌ಕೀಪರ್ ಆಗಿ ಗುರುತಿಸಿಕೊಂಡಿದ್ದಾರೆ.

 

Comments (Click here to Expand)