ಸ್ಯಾಂಡಲ್ ವುಡ್ ನಲ್ಲಿ ನೋಟು ಬ್ಯಾನ್ ಚಿತ್ರ
ಇಳಯದಳಪತಿ ವಿಜಯ್ ನಟಿಸಿರುವ ‘ಮೆರ್ಸಲ್’ ಬಾಕ್ಸ್ ಆಫೀಸ್ನಲ್ಲಿ ಧೂಳೆಬ್ಬಿಸುತ್ತಿರುವುದು ಎಲ್ಲರಿಗೂ ಗೊತ್ತು. ಆ ಚಿತ್ರದಲ್ಲಿ ಜಿಎಸ್ಟಿ ಕುರಿತ ಸಂಭಾಷಣೆಯೊಂದು ಭಾರೀ ವಿವಾದವೆಬ್ಬಿಸಿದ್ದುದು ಕೂಡಾ ದೊಡ್ಡ ಸುದ್ದಿಯಾಗಿತ್ತು. ಇತ್ತ ಸ್ಯಾಂಡಲ್ವುಡ್ನಲ್ಲಿ ನೋಟು ಬ್ಯಾನ್ ಹಿನ್ನೆಲೆಯುಳ್ಳ ಕಥಾವಸ್ತುವಿರುವ ಎರಡು ಚಿತ್ರಗಳು ಸದ್ದಿಲ್ಲದೆ ಸೆಟ್ಟೇರುತ್ತಿವೆ. ಜನಪ್ರಿಯ ನಿರ್ದೇಶಕ ಎಸ್.ಡಿ. ಅರವಿಂದ್ ಈಗಾಗಲೇ ತನ್ನ ಮುಂದಿನ ಚಿತ್ರ ನೋಟು ನಿಷೇಧಕ್ಕೆ ಸಂಬಂಧಿಸಿದ ಕಥೆಯನ್ನು ಹೊಂದಿದೆಯೆಂದು ಘೋಷಿಸಿಬಿಟ್ಟಿದ್ದಾರೆ.
ಇದೀಗ ಉದಯೋನ್ಮುಖ ನಿರ್ದೇಶಕ ಸೌರಭ್ ಶುಕ್ಲಾ ಕೂಡಾ ಇದೇ ವಿಷಯವಸ್ತುವನ್ನು ಹೊಂದಿರುವ ಚಿತ್ರದ ಶೂಟಿಂಗ್ ಆರಂಭಿಸಲು ಸಜ್ಜಾಗುತ್ತಿದ್ದಾರೆ. ‘1888’ ಎಂದು ಹೆಸರಿಡಲಾದ ಈ ಚಿತ್ರದಲ್ಲಿ ‘ಗಾಳಿಪಟ ಚಿತ್ರ’ದ ಖ್ಯಾತಿಯ ನೀತು ನಾಯಕಿಯಾಗಿ ನಟಿಸುತ್ತಿದ್ದಾರೆ. ಉದಯೋನ್ಮುಖ ತಾರೆಯರಾದ ಪ್ರತಾಪ್ ಕುಮಾರ್, ಮಂಜುರಾಜ್ ಹಾಗೂ ವಿಕ್ರಮ್ ಇತರ ಮುಖ್ಯ ಪಾತ್ರಗಳಲ್ಲಿದ್ದಾರೆ. ‘‘1888 ಒಂದು ಅಪ್ಪಟ ಥ್ರಿಲ್ಲರ್ ಚಿತ್ರವಾಗಿದೆ. ನೋಟು ನಿಷೇಧ ಘೋಷಣೆಯಾದ ಮೊದಲ ವಾರದಲ್ಲಿ ನಡೆಯುವ ಘಟನಾವಳಿಗಳು ಚಿತ್ರದಲ್ಲಿ ರೋಚಕವಾಗಿ ಮೂಡಿಬರಲಿದೆ. ಚಿತ್ರದ ಅರ್ಧದಷ್ಟು ಸನ್ನಿವೇಶಗಳು ಕಾರೊಂದರಲ್ಲಿ ನಡೆಯುತ್ತವೆ’’ ಎಂದು ನಾಯಕಿ ನೀತು ಹೇಳುತ್ತಾರೆ. ತನ್ನ ವೃತ್ತಿ ಬದುಕಿಗೆ ಈ ಚಿತ್ರ ಮೈಲುಗಲ್ಲಾಗಲಿದೆಯೆಂಬ ಭರವಸೆಯನ್ನು ಆಕೆ ಹೊಂದಿದ್ದಾರೆ. ಅಂದಹಾಗೆ ನೀತು ಈ ಚಿತ್ರದಲ್ಲಿ ರಾಜಕೀಯ ಪ್ರವೇಶಿಸಿದ ನಟಿಯಾಗಿ ಕಾಣಿಸಿಕೊಳ್ಳಲಿದ್ದಾರೆ.
ಈ ಚಿತ್ರದ ಇನ್ನೊಂದು ವಿಶೇಷವೆಂದರೆ, ಈ ಚಿತ್ರವು ಗೆರಿಲ್ಲಾ ಫಿಲ್ಮ್ಮೇಕಿಂಗ್ ಟೆಕ್ನಿಕ್ನ್ನಲ್ಲಿ ಚಿತ್ರೀಕರಣವಾಗಲಿದೆ. ಅಂದರೆ ಚಿತ್ರದಲ್ಲಿ ಯಾವುದೇ ಕೃತಕ ಸೆಟ್, ಲೈಟ್ಗಳು ಇರುವುದಿಲ್ಲ. ಅಷ್ಟೇ ಅಲ್ಲ ನಟ, ನಟಿಯರು ಕೂಡಾ ಯಾವುದೇ ಮೇಕಪ್ ಹಚ್ಚುವುದಿಲ್ಲ. ಬಹುತೇಕ ದೃಶ್ಯಗಳು ಸಾರ್ವಜನಿಕ ಸ್ಥಳಗಳಲ್ಲಿ ಚಿತ್ರೀಕರಣಗೊಳ್ಳಲಿದ್ದು, ಇಲ್ಲಿ ಚಿತ್ರತಂಡವು ಇತರರ ಅರಿವಿಗೆ ಬಾರದಂತೆ ಶೂಟಿಂಗ್ ನಡೆಸಲಿದೆ. ಒಟ್ಟಿನಲ್ಲಿ ‘1888’, ಸ್ಯಾಂಡಲ್ವುಡ್ನಲ್ಲಿ ಒಂದು ವಿಭಿನ್ನ ಚಿತ್ರವಾಗುವುದರಲ್ಲಿ ಸಂದೇಹವಿಲ್ಲವೆಂದು ನೀತು ಹೇಳುತ್ತಾರೆ.