ವಿಶ್ವದ ಅತ್ಯಂತ ದೊಡ್ಡದಾದ, ಗಾಜಿನಿಂದ ನಿರ್ಮಿತ ನೀರಿನಡಿಯ ರೆಸ್ಟೋರಂಟ್ ಬಗ್ಗೆ ನಿಮಗೆಷ್ಟು ಗೊತ್ತು....?
ಸಮುದ್ರದ ನೀರಿನಡಿ ಸುತ್ತಲೂ ಗಾಜಿನಿಂದಾವೃತ ರೆಸ್ಟೋರಂಟ್ನಲ್ಲಿ ಕುಳಿತುಕೊಂಡು ನೀರಿನಲ್ಲಿ ಚಲಿಸುತ್ತಿರುವ ಮೀನುಗಳನ್ನು ನೋಡುತ್ತ ಆಹಾರ ಸೇವಿಸುವ ಅನುಭವವೇ ಬೇರೆ. ಮಾಲ್ದೀವ್ಸ್ನಲ್ಲಿರುವ ವಿಶ್ವದ ಅತ್ಯಂತ ದೊಡ್ಡದಾದ, ಗಾಜಿನಿಂದ ನಿರ್ಮಿತ ವಾಗಿರುವ ನೀರಿನಡಿಯ ಹುರಾವಾಲ್ಹಿಸ್ ರೆಸ್ಟೋರಂಟ್ ನಿಮಗೆ ಈ ಅನುಭವವನ್ನು ನೀಡುತ್ತದೆ.
2016ರಲ್ಲಿ ಆರಂಭಗೊಂಡ ಈ ರೆಸ್ಟೋರಂಟ್ ಸಮುದ್ರದ ಮೇಲ್ಮೈಯಿಂದ 5.8 ಮೀಟರ್(ಸುಮಾರು 19 ಅಡಿ) ಕೆಳಗಿದೆ. ಈ ಬೃಹತ್ ನಿರ್ಮಾಣವು ಬರೋಬ್ಬರಿ 400 ಮೆ.ಟನ್ ತೂಗುತ್ತಿದ್ದು, 90 ಚ.ಮೀಟರ್ ವಿಸ್ತೀರ್ಣವನ್ನು ಹೊಂದಿದೆ.
ರೆಸಾರ್ಟ್ನ ನೀರಿನ ಮೇಲಿರುವ ಅಕ್ವೇರಿಯಂ ರೆಸ್ಟೋರಂಟ್ನ ಮೂಲಕ ಮೆಟ್ಟಿಲುಗಳನ್ನು ಇಳಿದು ಈ ನೀರಿನಡಿಯ ರೆಸ್ಟೋರಂಟ್ನ್ನು ಪ್ರವೇಶಿಸಬಹುದಾಗಿದೆ. ರೆಸ್ಟೋರಂಟ್ನಲ್ಲಿ ಒಪ್ಪವಾಗಿ ಜೋಡಿಸಿಡಲಾಗಿರುವ ಟೇಬಲ್ಗಳಿಂದ ಹೊರಗಿನ ರಮಣೀಯ ದೃಶ್ಯಗಳನ್ನು ಆಸ್ವಾದಿಸಬಹುದಾಗಿದೆ.
ಮಾಂಸ ಮತ್ತು ಮೀನು ಸೇರಿದಂತೆ ವಿವಿಧ ರುಚಿಕರ ಆಹಾರಗಳು ಈ ರೆಸ್ಟೋರಂಟ್ನಲ್ಲಿ ಲಭ್ಯವಿವೆ. ಜೊತೆಗೆ ಗ್ರ್ರಾಹಕರಿಗೆ ರುಚಿಕಟ್ಟಾದ ವೈನ್ನ್ನೂ ಒದಗಿಸಲಾಗುತ್ತದೆ.