varthabharthi

ಸಿನಿಮಾ

ಅಫ್ಘಾನ್ ಯುವತಿ ಆಗಲಿರುವ ನರ್ಗಿಸ್ ಫಕ್ರಿ

ವಾರ್ತಾ ಭಾರತಿ : 15 Dec, 2017

ಸದ್ಯದಲ್ಲೇ ಸೆಟ್ಟೇರಲಿರುವ ಸಂಜಯ್‌ದತ್ ಅಭಿನಯದ ತೊರ್ಬಾಝ್‌ಗೆ ನಾಯಕಿಯಾಗಿ ನರ್ಗಿಸ್ ಫಕ್ರಿ ಆಯ್ಕೆಯಾಗಿದ್ದಾರೆ. ಚಿತ್ರದಲ್ಲಿ ಆಕೆ ಎನ್‌ಜಿಒ ಸಂಸ್ಥೆಯೊಂದನ್ನು ನಡೆಸುತ್ತಿರುವ ಅಫ್ಘಾನ್ ಯುವತಿಯಾಗಿ ನಟಿಸುತ್ತಿದ್ದಾರೆ.

ಕೆಲವು ಸಮಯದಿಂದ ಬೆಳ್ಳಿತೆರೆಯಿಂದ ದೂರಸರಿದಿದ್ದ ನರ್ಗಿಸ್ ಫಕ್ರಿಗೆ, ತೊರ್ಬಾಝ್ ಹೊಸ ಬ್ರೇಕ್ ನೀಡುವ ನಿರೀಕ್ಷೆ ಇದೆಯಂತೆ. ಕೇವಲ ಗ್ಲಾಮರ್ ಪಾತ್ರಗಳಿಗಷ್ಟೇ ಸೀಮಿತವಾಗಿದ್ದ ನರ್ಗಿಸ್, ತೊರ್ಬಾಝ್‌ನಲ್ಲಿ ವಿಭಿನ್ನ ಗೆಟಪ್‌ನಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ. ಚಿತ್ರದಲ್ಲಿ ಅಭಿನಯ ಪ್ರದರ್ಶನಕ್ಕೆ ಆಕೆಗೆ ಸಾಕಷ್ಟು ಅವಕಾಶಗಳೂ ಇವೆಯಂತೆ. ಅಫ್ಘಾನಿಸ್ತಾನ ಯುದ್ಧದಲ್ಲಿ ಮಕ್ಕಳು ಬಲಿಪಶುಗಳಾಗುವ ಕಥೆ ಹೇಳುವ ತೊರ್ಬಾಝ್‌ನಲ್ಲಿ ಸಂಜಯ್‌ದತ್, ಯುದ್ಧದಿಂದ ಜರ್ಜರಿತರಾದ ಮಕ್ಕಳಿಗೆ ಹೊಸ ಬದುಕನ್ನು ಒದಗಿಸಲು ಯತ್ನಿಸುವ ಸೇನಾಧಿಕಾರಿಯ ಪಾತ್ರದಲ್ಲಿ ನಟಿಸುತ್ತಿದ್ದಾರೆ. ಗಿರೀಶ್ ಮಲಿಕ್ ಚಿತ್ರವನ್ನು ನಿರ್ದೇಶಿಸುತ್ತಿದ್ದು, ರಾಹುಲ್ ಮಲಿಕ್ ನಿರ್ಮಾಪಕರು.

ಸಂಜಯ್‌ದತ್ ಯರವಾಡ ಜೈಲಿನಲ್ಲಿದ್ದಾಗ ಐದು ಹಾಡುಗಳನ್ನು ಬರೆದಿದ್ದರು. ಅವುಗಳ ಪೈಕಿ ಒಂದು ಹಾಡನ್ನು ಈ ಚಿತ್ರದಲ್ಲಿ ಬಳಸಿಕೊಳ್ಳಲಾಗಿದೆ.‘‘ಓ ಮೇರಿ ಆ್ಯಂಗನ್ ಕಿ ಚಿಡಿಯಾ ಹೈ ತು’ ಎಂಬ ಸಾಲುಗಳುಳ್ಳ ಈ ಹಾಡು ತಂದೆ-ಮಗಳ ಮಧುರ ಬಾಂಧವ್ಯವನ್ನು ಬಣ್ಣಿಸು ತ್ತಿದೆ. ಈ ಚಿತ್ರದಲ್ಲಿ ಸಂಜಯ್ ಪಾತ್ರವು ಮಗಳನ್ನು ಕಳೆದು ಕೊಂಡಿರುತ್ತದೆ. ಇಂತಹ ಸನ್ನಿವೇಶಕ್ಕೆ ಈ ಹಾಡು ಅತ್ಯಂತ ಪ್ರಸ್ತುತವೆನಿಸುತ್ತದೆ. ಹಾಗಾಗಿ ಈ ಹೃದಯಸ್ಪರ್ಶಿ ಹಾಡನ್ನು ಬಳಸಿಕೊಂಡಿದ್ದೇವೆ’’ ಎಂದು ನಿರ್ಮಾಪಕ ರಾಹುಲ್ ಮಿತ್ರಾ ಹೇಳಿಕೊಂಡಿದ್ದಾರೆ.

‘ವಾರ್ತಾ ಭಾರತಿ’ ನಿಮಗೆ ಆಪ್ತವೇ ? ಇದರ ಸುದ್ದಿಗಳು ಮತ್ತು ವಿಚಾರಗಳು ಎಲ್ಲರಿಗೆ ಉಚಿತವಾಗಿ ತಲುಪುತ್ತಿರಬೇಕೇ? 

ಬೆಂಬಲಿಸಲು ಇಲ್ಲಿ  ಕ್ಲಿಕ್ ಮಾಡಿ

Comments (Click here to Expand)