varthabharthi

ಕೃತಿ ಪರಿಚಯ

ಈ ಹೊತ್ತಿನ ಹೊತ್ತಿಗೆ

ಪಾಡ್ದನದ ಕತೆಗಳು ತುಳು ಭಾಷೆಯಲ್ಲಿ

ವಾರ್ತಾ ಭಾರತಿ : 2 Apr, 2018
-ಕಾರುಣ್ಯಾ

ದೇಶದ ಬಹುಸಂಸ್ಕೃತಿಗಳು ಇಂದು ‘ಹಿಂದುತ್ವ’ದ ರಾಜಕಾರಣಕ್ಕೆ ಬಲಿಯಾಗುತ್ತಿವೆ. ಹಿಂದುತ್ವದ ಹೆಸರಿನಲ್ಲಿ ವೈದಿಕ ಆಚರಣೆ, ಸಂಸ್ಕೃತಿಯನ್ನು ನಿಧಾನಕ್ಕೆ ಹೇರಲಾಗುತ್ತಿದೆ ಮತ್ತು ಇದರ ಪರಿಣಾಮವಾಗಿ ಮತ್ತೆ ತಳಸ್ತರದ ಸಂಸ್ಕೃತಿಗಳು ವೈದಿಕ ಗುಲಾಮತನಕ್ಕೆ ತನ್ನನ್ನು ಒಪ್ಪಿಸಿಕೊಳ್ಳುತ್ತಿವೆ. ವೈವಿಧ್ಯಗಳು ಅಳಿದು ಅಲ್ಲಿ ವೈದಿಕ ಏಕತಾನತೆಗಳು ಆವರಿಸಿಕೊಳ್ಳುತ್ತಿವೆೆ. ಕರಾವಳಿಯೂ ಇದಕ್ಕೆ ಹೊರತಾಗಿಲ್ಲ. 200 ವರ್ಷಗಳ ಹಿಂದೆ ಇಲ್ಲಿನ ಯಾವುದೇ ಧಾರ್ಮಿಕ ಅಥವಾ ಸಾಮಾಜಿಕ ಆಚರಣೆಗಳಲ್ಲಿ ಬ್ರಾಹ್ಮಣರ ಪ್ರವೇಶವಿರಲಿಲ್ಲ. ಮದುವೆ, ಕೂಡು, ಕುಟುಂಬ ಎಲ್ಲವೂ ವೈದಿಕೇತರವಾಗಿತ್ತು. ಇಂದು ಅವೆಲ್ಲವೂ ಬ್ರಾಹ್ಮಣೀಕರಣಗೊಂಡಿವೆ. ತುಳು ದೈವಸ್ಥಾನಗಳೂ ಇದಕ್ಕೆ ಹೊರತಾಗಿಲ್ಲ. ಪಾಡ್ದನವಿರುವಲ್ಲಿ ಭಜನೆಗಳು ಸೇರಿಕೊಂಡಿವೆ. ಸಂಘಪರಿವಾರ ಈ ದೈವಸ್ಥಾನಗಳಿಗೆ ಕಾಲಿಟ್ಟಿದೆೆ. ಒಂದು ಕಾಲದಲ್ಲಿ ಸೌಹಾರ್ದಕ್ಕೆ ಹೆಸರಾಗಿರುವ ಭೂತಸ್ಥಾನಗಳನ್ನು ಇಂದು ಕೋಮು ದ್ವೇಷ ಹರಡುವುದಕ್ಕೆ ರಾಜಕೀಯ ಶಕ್ತಿಗಳು ವೇದಿಕೆ ಮಾಡುತ್ತಿವೆ. ನಾಗಸ್ವರದ ಜಾಗದಲ್ಲಿ ಜಾಗಟೆಗಳು ಸೇರಿಕೊಂಡಿವೆ. ಬಹುಶಃ ಇಂದು ಪಾಡ್ದನಗಳು, ಅವುಗಳ ಕತೆಗಳು ಮೂಲೆಗುಂಪಾಗುತ್ತಿರುವ ಕಾರಣದಿಂದ ಇದಾಗಿರಬಹುದು. ಈ ನಿಟ್ಟಿನಲ್ಲಿ ಕರಾವಳಿಯ ಪಾಡ್ದನಗಳನ್ನು ಹೆಚ್ಚು ಹೆಚ್ಚು ಜನಪ್ರಿಯಗೊಳಿಸುವ ಕಾರ್ಯ ನಡೆಯಬೇಕಾಗಿದೆ. ಈ ಮೂಲಕ, ವೈದಿಕೀಕರಣಗೊಂಡು, ವೈದಿಕ ದೇವರಿಗೆ ಅಧೀನವಾಗುತ್ತಿರುವ ದೈವಗಳ ಹಿರಿೆುಗಳನ್ನು ರಕ್ಷಿಸಿಕೊಳ್ಳಬೇಕಾಗಿದೆ.
‘‘ಚಂದ್ರಹಾಸ ಕಣಂತೂರು ಅವರ ‘‘ಮೈಮೆ’’ ಈ ನಿಟ್ಟಿನಲ್ಲಿ ಪಾಡ್ದನಗಳನ್ನು ಪರಿಚಯಿಸುವ ಒಂದು ವಿಭಿನ್ನ ಪ್ರಯತ್ನವಾಗಿದೆ. ವಿಶೇಷವೆಂದರೆ, ಪಾಡ್ದನದ ಈ ಕತೆಗಳು ತುಳು ಭಾಷೆಯಲ್ಲೇ ಇವೆ. ತುಳು ವೌಖಿಕ ಭಾಷೆಯಾಗಿರುವುದರಿಂದ ಲಿಪಿಯನ್ನು ಕನ್ನಡದಲ್ಲಿ ಬಳಸಿದ್ದಾರೆ. ತುಳು ಅರ್ಥ ಮಾಡಿಕೊಳ್ಳಲು ಸಾಧ್ಯವಿರುವ ಕನ್ನಡಿಗರಿಗೆ ಪಾಡ್ದನ ಕತೆಗಳನ್ನು ಸರಳವಾಗಿ ಹೇಳುವ ಪ್ರಯತ್ನವನ್ನು ಇಲ್ಲಿ ಮಾಡಲಾಗಿದೆ. ಮೈಮೆ ಎಂದರೆ ಮಹಿಮೆ. ಶಕ್ತಿ ಎಂದೂ ಹೇಳಬಹುದು. ತುಳುನಾಡಿನಲ್ಲಿ ಆಗಿ ಹೋದ ಹಿರಿಯರ ಹೆಗ್ಗಳಿಕೆಯನ್ನು ಹೇಳುವ ಕತೆಗಳು ಇವು.
 ಕಚ್ಚೂರ ಮಾಲ್ದಿ, ಕಾರ್ನಿಕದ ಗಿಡಿರಾವಂತೆ, ಬಗ್ಗು ಪಂಜುರ್ಲಿ, ಮುಕಾಂಬಿ ಜೇವು, ಬಾಲೆಮಾನಿ ಮಾಯಂದಾಳ್, ಬಲಜೇಯಿ ಮಾನಿಗ, ಪರದಿ ಮಂಗಣೆ, ಆಲಿ ಚಾಮುಂಡಿ, ಬಬ್ಬರ್ಯ, ಈಜೋ ಮಂಜೊಟ್ಟಿ ಗೋಣ, ಕೊರಗ ತನಿಯ ಹೀಗೆ ತುಳುನಾಡಿನಲ್ಲಿ ಆಗಿ ಹೋದ ಭೂತಕಾಲದ ಹಿರಿಯ ಕತೆಗಳು ಇಲ್ಲಿವೆ. ಇವುಗಳಲ್ಲಿ ಹೆಚ್ಚಿನವುಗಳ ಅಂತ್ಯ ದುರಂತದಿಂದ ಕೂಡಿದೆ. ಈ ಪಾಡ್ದನಗಳು ಅಂದಿನ ಸಾಮಾಜಿಕ ಸಂಘರ್ಷಗಳನ್ನು ಹೇಳುತ್ತವೆ. ಸ್ಥಳೀಯ ಜನರ ಬಂಡಾಯ ಮತ್ತು ಅದರ ದುರಂತ ಅಂತ್ಯಗಳನ್ನೂ ತಿಳಿಸುತ್ತವೆ. ಕುರಲ್ ಇಸ್ಟೆರ್ ಕುಡ್ಲ, ಮಂಗಳೂರು ಇವರು ಹೊರತಂದಿರುವ ಈ ಕೃತಿಯ ಮುಖಬೆಲೆ 80 ರೂಪಾಯಿ. ಆಸಕ್ತರು 94498 07163 ದೂರವಾಣಿಯನ್ನು ಸಂಪರ್ಕಿಸಬಹುದು


‘ವಾರ್ತಾ ಭಾರತಿ’ ನಿಮಗೆ ಆಪ್ತವೇ ? ಇದರ ಸುದ್ದಿಗಳು ಮತ್ತು ವಿಚಾರಗಳು ಎಲ್ಲರಿಗೆ ಉಚಿತವಾಗಿ ತಲುಪುತ್ತಿರಬೇಕೇ? 

ಬೆಂಬಲಿಸಲು ಇಲ್ಲಿ  ಕ್ಲಿಕ್ ಮಾಡಿ

Comments (Click here to Expand)