ಪರಮಾಣು ಕಾರ್ಯಕ್ರಮ ಆರಂಭಿಸಿದರೆ ಘೋರ ಪರಿಣಾಮ: ಇರಾನ್ಗೆ ಟ್ರಂಪ್ ಎಚ್ಚರಿಕೆ
ವಾಷಿಂಗ್ಟನ್, ಎ.25: ಇರಾನ್ ತನ್ನ ಪರಮಾಣು ಕಾರ್ಯಕ್ರಮವನ್ನು ಪುನರಾರಂಭಿಸಿದರೆ ಅವರು ಇದುವರೆಗೆ ಎದುರಿಸದ ಪ್ರಮಾಣದಲ್ಲಿ ತೊಂದರೆಗೆ ಒಳಗಾಗಲಿದ್ದಾರೆ ಎಂದು ಅವೆುರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಎಚ್ಚರಿಸಿದ್ದಾರೆ.
ಶ್ವೇತಭವನದಲ್ಲಿ ಫ್ರೆಂಚ್ ಅಧ್ಯಕ್ಷ ಇಮ್ಯಾನುವೆಲ್ ಮಾಕ್ರನ್ ಜೊತೆ ಬಹುರಾಷ್ಟ್ರೀಯ ಪರಮಾಣು ಒಪ್ಪಂದ, ಸಿರಿಯಾದ ಯುದ್ದ ಮತ್ತಿತರ ಪ್ರಮುಖ ವಿಷಯದ ಕುರಿತು ನಡೆಸಿದ ಮಾತುಕತೆಯ ಬಳಿಕ ಇರಾನ್ಗೆ ಎಚ್ಚರಿಕೆ ನೀಡಿದ ಟ್ರಂಪ್, ನೀವು ಇದನ್ನು ಬರೆದಿಟ್ಟುಕೊಳ್ಳಿ. ಅವರು ಒಂದು ವೇಳೆ ಪರಮಾಣು ಕಾರ್ಯಕ್ರಮವನ್ನು ಪುನರಾರಂಭಿಸಿದರೆ, ಇದುವರೆಗೆ ಎದುರಿಸಿದ್ದಕ್ಕಿಂತ ಘೋರವಾದ ಪರಿಣಾಮ ಎದುರಿಸಬೇಕಾಗುತ್ತದೆ ಎಂದು ಪುನರುಚ್ಚರಿಸಿದರು. ಪರಮಾಣು ಒಪ್ಪಂದವನ್ನು ಮುಂದುವರಿಸಲು ಟ್ರಂಪ್ ಮೇಲೆ ಒತ್ತಡ ಹೇರುವ ಪ್ರಮುಖ ಉದ್ದೇಶದಿಂದ ಮೂರು ದಿನಗಳ ಅಮೆರಿಕ ಪ್ರವಾಸ ಕೈಗೊಂಡಿರುವ ಇಮ್ಯಾನುವೆಲ್, ಒಪ್ಪಂದದಿಂದ ಹಿಂದೆ ಸರಿಯದಂತೆ ಟ್ರಂಪ್ರ ಮನ ಒಲಿಸಲು ಪ್ರಯತ್ನಿಸಿದರು. ಆದರೆ ಈ ಬಗ್ಗೆ ಯಾವ ಭರವಸೆಯನ್ನೂ ನೀಡದ ಟ್ರಂಪ್, ಪ್ರಕ್ಷೇಪಕ ಕ್ಷಿಪಣಿಗಳ ಬಗ್ಗೆ ಅಥವಾ ಯೆಮನ್ ಹಾಗೂ ಸಿರಿಯದಲ್ಲಿ ಇರಾನ್ ನಡೆಸುತ್ತಿರುವ ಕೃತ್ಯಗಳ ಬಗ್ಗೆ ಸೊಲ್ಲೆತ್ತದಿರುವುದು ಒಪ್ಪಂದದ ಬಹುದೊಡ್ಡ ಕೊರತೆ ಎಂದರಲ್ಲದೆ ಒಪ್ಪಂದವನ್ನು ‘ಘೋರ ಒಪ್ಪಂದ’ ಎಂದು ಬಣ್ಣಿಸಿದರು. ಸಿರಿಯದಲ್ಲಿರುವ ಪರಿಸ್ಥಿತಿಯನ್ನು ಗಮನದಲ್ಲಿರಿಸಿ ಟ್ರಂಪ್ ಹಾಗು ತಾನು ಇರಾನ್ನ ಒಪ್ಪಂದದ ಬಗ್ಗೆ ವ್ಯಾಪಕ ಪ್ರಾದೇಶಿಕ ಸನ್ನಿವೇಶಕ್ಕೆ ಅನುಗುಣವಾಗಿ ಗಮನ ಹರಿಸಲಿದ್ದೇವೆ ಎಂದು ಫ್ರೆಂಚ್ ಅಧ್ಯಕ್ಷರು ತಿಳಿಸಿದ್ದಾರೆ. ನಮ್ಮ ಉದ್ದೇಶದಲ್ಲಿ ಸಾಮ್ಯತೆಯಿದೆ. ಈ ಪ್ರದೇಶದಲ್ಲಿ ಪರಮಾಣು ಪ್ರಸರಣ ಕಾರ್ಯ ನಡೆಯದಂತೆ ತಡೆಯುವುದು ನಮ್ಮ ಉದ್ದೇಶವಾಗಿದೆ. ಈ ನಿಟ್ಟಿನಲ್ಲಿ ಸರಿಯಾದ ಪಥವೊಂದನ್ನು ಹುಡುಕಬೇಕಿದೆ ಎಂದು ಇಮ್ಯಾನುವೆಲ್ ಮಾಕ್ರನ್ ಹೇಳಿದ್ದಾರೆ.