ಭಾರತದ ಈ ಗ್ರಾಮಸ್ಥರ ಮೇಲ್ಮನವಿಯ ವಿಚಾರಣೆ ನಡೆಸಲಿದೆ ಅಮೆರಿಕದ ಸುಪ್ರೀಂಕೋರ್ಟ್
ವಾಷಿಂಗ್ಟನ್,ಮೇ 22: ವಾಷಿಂಗ್ಟನ್ ಡಿಸಿ ಮೂಲದ ಇಂಟರ್ನ್ಯಾಷನಲ್ ಫೈನಾನ್ಸ್ ಕಾರ್ಪೊರೇಷನ್(ಐಎಫ್ಸಿ)ನ ಆರ್ಥಿಕ ನೆರವಿನಲ್ಲಿ ಗುಜರಾತ್ನ ಕಛ್ ಜಿಲ್ಲೆಯ ತುಂಡಾ ಗ್ರಾಮದಲ್ಲಿ ಸ್ಥಾಪಿಸಲಾಗಿರುವ ಉಷ್ಣ ವಿದ್ಯುತ್ ಸ್ಥಾವರದ ವಿರುದ್ಧ ಅಲ್ಲಿಯ ಗ್ರಾಮಸ್ಥರು ಸಲ್ಲಿಸಿರುವ ಮೇಲ್ಮನವಿಯ ವಿಚಾರಣೆಗೆ ಅಮೆರಿಕದ ಸರ್ವೋಚ್ಚ ನ್ಯಾಯಾಲಯವು ಸೋಮವಾರ ಒಪ್ಪಿಕೊಂಡಿದೆ.
ಅಕ್ಟೋಬರ್ನಲ್ಲಿ ಈ ವಿಚಾರಣೆಯು ಆರಂಭಗೊಳ್ಳಲಿದೆ. ಈ ಸ್ಥಾವರವು ಸ್ಥಳೀಯ ಪರಿಸರಕ್ಕೆ ಭಾರೀ ಹಾನಿಯನ್ನುಂಟು ಮಾಡಿದೆ ಎಂದು ಗ್ರಾಮಸ್ಥರು ದೂರಿದ್ದಾರೆ.
ಬುಧಾ ಇಸ್ಮಾಯೀಲ್ ಜಾಮ್ ನೇತೃತ್ವದಲ್ಲಿ ಹಲವಾರು ರೈತರು ಮತ್ತು ಮೀನುಗಾರರು ಸೇರಿದಂತೆ ಗ್ರಾಮಸ್ಥರು ವಿದ್ಯುತ್ ಉತ್ಪಾದನೆಗಾಗಿ ಕಲ್ಲಿದ್ದಲು ಬಳಕೆಯಾಗುತ್ತಿರುವ ಈ ಸ್ಥಾವರದಿಂದಾಗಿ ಪರಿಸರಕ್ಕೆ ಅಪಾರ ಹಾನಿಯುಂಟಾಗಿದೆ ಎಂದು ಆರೋಪಿಸಿದ್ದಾರೆ.
ವಿಶ್ವ ಬ್ಯಾಂಕಿನ ಸಾಲ ನೀಡಿಕೆ ಘಟಕವಾಗಿರುವ ಐಎಫ್ಸಿಯು ತುಂಡಾದ ಟಾಟಾ ಮುಂದ್ರಾ ವಿದ್ಯುತ್ ಸ್ಥಾವರಕ್ಕೆ 40 ಮಿಲಿಯನ್ ಡಾಲರ್ಗಳ ಆರ್ಥಿಕ ನೆರವನ್ನು ಒದಗಿಸಿದೆ.
ಐಎಫ್ಸಿಯು 1945ರ ಇಂಟರ್ನ್ಯಾಷನಲ್ ಆರ್ಗನೈಸೇಶನ್ಸ್ ಇಮ್ಯುನಿಟಿ ಕಾಯ್ದೆಯಡಿ ಕಾನೂನು ಕ್ರಮಗಳಿಂದ ವಿನಾಯಿತಿಯನ್ನು ಹೊಂದಿದೆಯೇ ಎನ್ನುವುದನ್ನು ತಾನು ನಿರ್ಧರಿಸುವುದಾಗಿ ಸುಪ್ರೀಂ ಕೋರ್ಟ್ ಹೇಳಿದೆ.
ಐಎಫ್ಸಿಯು ಇತರ ದೇಶಗಳಲ್ಲಿಯಂತೆ ಭಾರತದಲ್ಲಿಯೂ ಈ ಕಾಯ್ದೆಯಡಿ ವಿನಾಯಿತಿ ಹೊಂದಿದೆ ಎಂಬ ಅಭಿಪ್ರಾಯ ವ್ಯಕ್ತಪಡಿಸಿದ್ದ ಕೆಳ ನ್ಯಾಯಾಲಯಗಳು ತಮ್ಮ ಅರ್ಜಿಗಳನ್ನು ವಜಾಗೊಳಿಸಿದ ಬಳಿಕ ಜಾಮ್ ಮತ್ತು ಇತರ ಅರ್ಜಿದಾರರು ಸುಪ್ರೀಂ ಕೋರ್ಟ್ನ ಮೆಟ್ಟಿಲನ್ನೇರಿದ್ದಾರೆ.
ಟಾಟಾ ಮುಂದ್ರಾ ವಿದ್ಯುತ್ ಸ್ಥಾವರವು ಅಂತರರಾಷ್ಟ್ರೀಯ ಪರಿಸರ ಮಾನದಂಡಗಳನ್ನು ಪಾಲಿಸುವಲ್ಲಿ ವಿಫಲಗೊಂಡಿದೆ ಮತ್ತು ಇದು ಸ್ಥಳೀಯ ಪರಿಸರವನ್ನು ನಾಶಗೊಳಿಸಿದೆ ಎಂದು ಅರ್ಜಿದಾರರು ವಾದಿಸಿದ್ದಾರೆ.
2015ರಲ್ಲಿ ಅರ್ಜಿದಾರರಾದ ಭಾರತೀಯ ರೈತರು,ಮೀನುಗಾರರು,ಮೀನುಗಾರರ ಕಾರ್ಮಿಕ ಒಕ್ಕೂಟ ಮತ್ತು ಸ್ಥಳೀಯ ಸರಕಾರಿ ಸಂಸ್ಥೆ ಕೊಲಂಬಿಯಾ ಜಿಲ್ಲಾ ನ್ಯಾಯಾಲಯದಲ್ಲಿ ಐಎಫ್ಸಿ ವಿರುದ್ಧ ದಾವೆಯನ್ನು ಹೂಡಿದ್ದರಾದರೂ 2016ರಲ್ಲಿ ಅದರಲ್ಲಿ ಸೋಲಾಗಿತ್ತು. ಕಳೆದ ವರ್ಷ ಅವರು ಸಲ್ಲಿಸಿದ್ದ ಮೇಲ್ಮನವಿಯನ್ನು ಕೊಲಂಬಿಯಾ ಜಿಲ್ಲೆಯ ಮೇಲ್ಮನವಿಗಳ ಅಮೆರಿಕನ್ ನ್ಯಾಯಾಲಯವೂ ತಿರಸ್ಕರಿಸಿತ್ತು. ಐಎಫ್ಸಿ ಕಾಯ್ದೆಯಡಿ ವಿನಾಯಿತಿಯನ್ನು ಹೊಂದಿದೆ ಎಂದು ಅವು ಎತ್ತಿ ಹಿಡಿದಿದ್ದವು.