varthabharthi

ಕೃತಿ ಪರಿಚಯ

ಈ ಹೊತ್ತಿನ ಹೊತ್ತಿಗೆ

ಸಮಾನತೆ ಎನ್ನುವ ಪತಿ-ಪತ್ನಿಯ ನಡುವಿನ ತರ್ಕಬದ್ಧ ಸಂಬಂಧ

ವಾರ್ತಾ ಭಾರತಿ : 14 Aug, 2018
ಕಾರುಣ್ಯಾ

ಹೆಣ್ಣು ಮನಸ್ಸು ಅತ್ಯಂತ ವಿಶಿಷ್ಟವಾದುದು ಮತ್ತು ಸೂಕ್ಷ್ಮವಾದುದು. ಕೋಮಲೆಯಾಗಿದ್ದರೂ ಆಕೆ, ಹೆರಿಗೆ ಬೇನೆಯಂತಹ ಅಸಹನೀಯ ನೋವನ್ನು ತಾಳುವ ಶಕ್ತಿಯನ್ನು ತನ್ನೊಳಗೆ ಬಚ್ಚಿಟ್ಟುಕೊಂಡಿದ್ದಾಳೆ. ಗಂಡು ಮಾಡಬಲ್ಲ ಬಹುತೇಕ ದುಡಿಮೆಯನ್ನು ಹೆಣ್ಣು ಮಾಡಬಲ್ಲಳು. ಆದರೆ ಹೆಣ್ಣು ಮಾಡಬಲ್ಲ ಕೆಲಸಗಳನ್ನು ಗಂಡು ಮಾಡಲಾರ. ಹೆಣ್ಣು ಗಂಡು ಸಮಾನ ಎನ್ನುವ ಪದವನ್ನು ಹುಟ್ಟಿಸಿ ಹಾಕಿದ್ದೇ ಪುರುಷ. ಹೆಣ್ಣಿನ ಅಸಾಧ್ಯ ಬಲದ ಕುರಿತಂತೆ ಕೀಳರಿಮೆಯಿಂದ ಈ ಪದ ಹುಟ್ಟಿಕೊಂಡಿದೆ. ಯಾವ ರೀತಿಯಲ್ಲಿ ನೋಡಿದರೆ ಹೆಣ್ಣಿಗೆ ಗಂಡು ಸಮನಾಗಲಾರ.
ಗಂಡು ದುಡಿಯಲಿರುವವನು, ಹೆಣ್ಣು ಮನೆಯಲ್ಲಿರಬೇಕಾದವಳು ಎನ್ನುವ ಸಾಲುಗಳು, ಪರೋಕ್ಷವಾಗಿ ಗಂಡಿನ ದುಡಿಮೆಯನ್ನಷ್ಟೇ ಎತ್ತಿ ಹಿಡಿಯುತ್ತದೆ. ದುಡಿಮೆ ಎಂದರೆ ದುಡ್ಡು ಸಂಪಾದಿಸುವುದು ಎಂಬ ಅರ್ಥ ಇರುವುದರಿಂದಲೇ ಹೆಣ್ಣು ಮನೆಯಲ್ಲಿದ್ದು ಮಾಡುವ ಅಸಾಮಾನ್ಯ ಕೆಲಸ ಮಾನ್ಯತೆಯನ್ನು ಪಡೆಯುವುದೇ ಇಲ್ಲ. ಪುರುಷನಲ್ಲಿ ಸಾಧಾರಣವಾಗಿ ಕೇಳುವ ಪ್ರಶ್ನೆ ‘‘ಹೆಂಡತಿ ದುಡಿಯುತ್ತಾಳ?’’ ಈ ಪ್ರಶ್ನೆಯ ಅರ್ಥ ಏನು? ಕಚೇರಿಯಲ್ಲಿ ದುಡಿಯುವ ಹೆಣ್ಣಷ್ಟೇ ದುಡಿಮೆ ಮಾಡುವವಳೆ? ಆಕೆ ಮನೆಯಲ್ಲಿ ತನ್ನ ಮಗುವನ್ನು ಜೋಪಾನ ಮಾಡಿ, ಮನೆಯ ಸರ್ವ ಕೆಲಸಗಳನ್ನು ನಿಭಾಯಿಸುವ ಬೃಹತ್ ಹೊಣೆಗಾರಿಕೆ ನಮ್ಮ ಸಮಾಜದಲ್ಲಿ ಯಾಕೆ ಪರಿಗಣನೆಗೆ ಒಳಗಾಗುತ್ತಿಲ್ಲ. ಹೊರಗೆ ಕಚೇರಿಯಲ್ಲಿ ದುಡಿಯುವ ಹೆಣ್ಣು ಮನೆಯಲ್ಲಿ ಮತ್ತೆ ಮನೆಗೆಲಸ ಮಾಡಬೇಕಾಗುತ್ತದೆ. ಅಂದರೆ ಎರಡೆರಡು ದುಡಿಮೆ. ಈ ನಿಟ್ಟಿನಲ್ಲಿ, ಮನೆಯಲ್ಲಿರುವ ಹೆಣ್ಣಿಗಿಂತ ಹೊರಗೆ ದುಡಿಯುವ ಹೆಣ್ಣೇ ಹೆಚ್ಚು ಶೋಷಿತಳಲ್ಲವೆ? ಮನೆಗೆಲಸವನ್ನು ಗಂಡು-ಹೆಣ್ಣು ಸಮಾನವಾಗಿ ಹಂಚಿ ಮಾಡುವ ಮನಸ್ಥಿತಿ ಭಾರತದಲ್ಲಿ ಯಾಕೆ ಇನ್ನೂ ಬೆಳೆದಿಲ್ಲ?
ಹೀಗೆ ಹೆಣ್ಣಿನ ದುಡಿಮೆಯ ಕುರಿತಂತೆ ಹತ್ತು ಹಲವು ಪ್ರಶ್ನೆಗಳನ್ನು ಇಟ್ಟು ಉತ್ತರಕ್ಕಾಗಿ ತಡಕಾಡುತ್ತದೆ, ರಂಗನಾಯಕಮ್ಮ ಬರೆದಿರುವ ‘ಮನೆಕೆಲಸ ಮತ್ತು ಹೊರಗಿನ ಕೆಲಸ’. ತೆಲುಗು ಮೂಲದ ಈ ಕೃತಿಯನ್ನು ಬಿ. ಸುಜ್ಞಾನ ಮೂರ್ತಿ ಕನ್ನಡಕ್ಕೆ ತಂದಿದ್ದಾರೆ. ಸಂಬಳ, ಕೂಲಿ ಇಲ್ಲದ ಕೆಲಸ ದುಡಿಮೆಯೇ ಅಲ್ಲ ಎಂದು ಭಾವಿಸುವ ಸಮಾಜದಲ್ಲಿ ಮನೆಕೆಲಸ ಮಾಡುವ ಹೆಣ್ಣು ಸಹಜವಾಗಿಯೇ ಶೋಷಣೆಗೆ ಒಳಪಡುತ್ತಾಳೆ ಎಂದು ಈ ಕೃತಿ ಹೇಳುತ್ತದೆ. ಗರ್ಭ ಧರಿಸಿದ ಕಾಲಾವಧಿ, ಬಾಣಂತಿಯರಾದ ಸಮಯ, ಮಕ್ಕಳ ಲಾಲನೆ, ಪೋಷಣೆ, ಮನೆಯ ಒಳಗಿನ ನಿರ್ವಹಣೆ, ಅಡುಗೆಯ ಕಲೆ, ಒಪ್ಪ ಓರಣದ ಕಸುಬುದಾರಿಕೆ ಇವೆಲ್ಲವೂ ಮಹಿಳೆಯ ದುಡಿಮೆಯ ಭಾಗವೇ ಆಗಿದ್ದರೂ, ಪುರುಷ ದೃಷ್ಟಿಕೋನದಲ್ಲಿ ಇವು ಯಾವುದೂ ಕೆಲಸವೇ ಅಲ್ಲ. ಶ್ರಮ ಮತ್ತು ಮಹಿಳೆಯನ್ನು ಕೇಂದ್ರವಾಗಿಟ್ಟುಕೊಂಡು ಈ ಕೃತಿಯನ್ನು ಬರೆಯಲಾಗಿದೆ. ಶ್ರಮದ ಬೇರೆ ಬೇರೆ ವಿಭಾಗಗಳನ್ನು ಲೇಖಕಿ ಗುರುತಿಸುತಾರೆೆ. ಜೊತೆ ಜೊತೆಗೆ ಗಂಡ-ಹೆಂಡತಿಯರ ಶ್ರಮ ಸಂಬಂಧಗಳನ್ನು ಮನಶ್ಶಾಸ್ತ್ರೀಯವಾಗಿಯೂ ನೋಡುವ ಪ್ರಯತ್ನ ಮಾಡುತ್ತಾರೆ. ಶ್ರಮವಿಭಜನೆಯೇ ಹೆಣ್ಣಿನ ಶೋಷಣೆಗೆ ಮೂಲ ಕಾರಣ ಎನ್ನುವುದನ್ನು ಅವರು ಕಂಡುಕೊಳ್ಳುತ್ತಾರೆ. ಮನೆಯ ಶ್ರಮ ವಿಭಜನೆ ಬದಲಾಗಬೇಕಾದರೆ ಹೊರಗಿನ ಶ್ರಮ ವಿಭಜನೆ ಬದಲಾಗಬೇಕು ಎಂದು ಅವರು ಅಭಿಪ್ರಾಯಪಡುತ್ತಾರೆ. ಶ್ರಮವನ್ನು ಹಿನ್ನೆಲೆಯಾಗಿಟ್ಟು ಅಸಮಾನತೆಯನ್ನು ಚರ್ಚಿಸುವ ಲೇಖಕಿ, ಹೇಗೆ ಶ್ರಮದ ವಿಭಜನೆ ಮಹಿಳೆಯನ್ನು ಶೋಷಿಸುತ್ತಿದೆ ಎನ್ನುವುದನ್ನು ಹೇಳುತ್ತಾರೆ. ಮಹಿಳೆಯರು ಮನೆ ಕೆಲಸದಿಂದ ಹೊರಗಿನ ಕೆಲಸಕ್ಕೆ ಬರಬೇಕು. ಪುರುಷರು ಹೊರಗಿನ ಕೆಲಸದಿಂದ ಮನೆ ಕೆಲಸಕ್ಕೆ ಬರಬೇಕು. ಮನೆಕೆಲಸಕ್ಕೂ ಹೊರಗಿನ ಕೆಲಸಕ್ಕೂ ಇರುವ ತರ್ಕಬದ್ಧವಾದ ಸಂಬಂಧವೇ ಸ್ತ್ರೀ ಪುರುಷ ಸಮಾನತೆ ಎಂದು ಅವರು ಅಭಿಪ್ರಾಯಪಡುತ್ತಾರೆ.
ಲಡಾಯಿ ಪ್ರಕಾಶನ ಗದಗ ಇವರು ಹೊರತಂದಿರುವ ಈ ಕೃತಿಯ ಒಟ್ಟು ಪುಟಗಳು 120. ಮುಖಬೆಲೆ 80 ರೂ.

 

‘ವಾರ್ತಾ ಭಾರತಿ’ ನಿಮಗೆ ಆಪ್ತವೇ ? ಇದರ ಸುದ್ದಿಗಳು ಮತ್ತು ವಿಚಾರಗಳು ಎಲ್ಲರಿಗೆ ಉಚಿತವಾಗಿ ತಲುಪುತ್ತಿರಬೇಕೇ? 

ಬೆಂಬಲಿಸಲು ಇಲ್ಲಿ  ಕ್ಲಿಕ್ ಮಾಡಿ

Comments (Click here to Expand)