varthabharthi

ವಿಶೇಷ-ವರದಿಗಳು

ಗಾಂಧಿ ದ್ವೇಷಿ ಮೇ. ಬಕ್ಷಿಯನ್ನು ಹೊಗಳಿದ ವಿಸ್ತಾರಾ ಏರ್ ಲೈನ್ಸ್ ಗೆ ಟ್ವಿಟರಿಗರ ಮಂಗಳಾರತಿ

ವಾರ್ತಾ ಭಾರತಿ : 21 Apr, 2019

ರಾಷ್ಟ್ರಪಿತ ಮಹಾತ್ಮಾ ಗಾಂಧಿ ದ್ವೇಷಿ, ಸದಾ ವಿವಾದಾತ್ಮಕ ಹೇಳಿಕೆ ನೀಡುವ, ಮುಸ್ಲಿಂ ವಿರೋಧಿ ನಿವೃತ್ತ ಮೇಜರ್ ಜನರಲ್ ಜಿ.ಡಿ.ಬಕ್ಷಿ ಫೊಟೊ ಟ್ವೀಟ್ ಮಾಡಿ ಅವರನ್ನು ಹೊಗಳಿದ ವಿಸ್ತಾರಾ ಏರ್ ಲೈನ್ಸ್ ವಿರುದ್ಧ ಭಾರೀ ಆಕ್ರೋಶ ವ್ಯಕ್ತವಾಗಿದೆ.

ವಿಸ್ತಾರಾ ಏರ್‍ಲೈನ್ಸ್ ಶುಕ್ರವಾರ  ಟ್ವೀಟ್ ಒಂದನ್ನು ಮಾಡಿದ್ದು, ಅರ್ನಬ್ ಗೋಸ್ವಾಮಿಯ ರಿಪಬ್ಲಿಕ್ ಟಿವಿಯಲ್ಲಿ ಸಾಮಾನ್ಯವಾಗಿ ಕಾಣಿಸಿಕೊಳ್ಳುವ ಬಕ್ಷಿಯವರನ್ನು ಹೊಗಳಿತ್ತು. ಕೋಮುದ್ವೇಷದ ಹೇಳಿಕೆಗಳಿಂದ ಬಕ್ಷಿ ಹಲವು ಬಾರಿ ವಿವಾದ ಸೃಷ್ಟಿಸಿದವರು.

ಏರ್‍ಲೈನ್ಸ್‍ ನ ಗಗನಸಖಿಯರು ಬಕ್ಷಿ ಜತೆಗಿರುವ ಫೋಟೊ ಶೇರ್ ಮಾಡಿದ ಸಂಸ್ಥೆ, “ಕಾರ್ಗಿಲ್ ಯೋಧ ಮೇಜರ್ ಜನರಲ್ ಜಿ.ಡಿ.ಬಕ್ಷಿಯವರು ನಮ್ಮ ವಿಮಾನದಲ್ಲಿ ಪ್ರಯಾಣಿಸಿದ್ದು ಹೆಮ್ಮೆ ಎನಿಸುತ್ತದೆ. ನಿಮ್ಮ ದೇಶಸೇವೆಗೆ ಕೃತಜ್ಞತೆಗಳು" ಎಂದು ಶೀರ್ಷಿಕೆ ನೀಡಿತ್ತು. ಇಬ್ಬರು ವಿಸ್ತಾರಾ ಗಗನಸಖಿಯರು ಬಕ್ಷಿ ಜತೆ ಫೋಟೊಗೆ ಫೋಸ್ ನೀಡುತ್ತಿರುವುದನ್ನು ಚಿತ್ರದಲ್ಲಿ ಕಾಣಬಹುದು.

ಸೆಲೆಬ್ರಿಟಿ ಶೆಫ್ ಸಂಜೀವ್ ಕಪೂರ್ ಕೂಡಾ ತಮ್ಮ ಟ್ವಿಟರ್ ಟೈಮ್ ಲೈನ್ ನಲ್ಲಿ ಇದನ್ನು ಶೇರ್ ಮಾಡಿದ್ದು, ನೂರಾರು ಮಂದಿ ಲೈಕ್ ಮಾಡಿದ್ದಾರೆ. ಆದರೆ ಹಲವು ಮಂದಿ ಸಾಮಾಜಿಕ ಜಾಲತಾಣ ಬಳಕೆದಾರರು ಇದಕ್ಕಾಗಿ ಏರ್‍ಲೈನ್ಸ್ ಮೇಲೆ ಹರಿಹಾಯ್ದಿದ್ದಾರೆ. ಸಾರ್ವಜನಿಕ ಭಾಷಣಗಳಲ್ಲಿ ಬಕ್ಷಿಯವರ ವಿವಾದಾತ್ಮಕ ಭಾಷಣಗಳು ಮತ್ತು ನಿಂದನೆಗಳ ಬಗೆಗಿನ ಮೀಮ್ ಗಳನ್ನು ಪೋಸ್ಟ್ ಮಾಡಿದ್ದಾರೆ.

2016ರಲ್ಲಿ ಪೋಸ್ಟ್ ಮಾಡಲಾದ ಒಂದು ವಿಡಿಯೊದಲ್ಲಿ ಬಕ್ಷಿ, ರಾಷ್ಟ್ರಪಿತ ಮಹಾತ್ಮಗಾಂಧೀಜಿಯವರ ಮೇಲೆಯೇ ವಾಗ್ದಾಳಿ ನಡೆಸಿದ್ದರು. “ಮಹಾತ್ಮಗಾಂಧಿ ಮತ್ತು ಕಾಂಗ್ರೆಸ್ ಪಕ್ಷ ದೇಶದ ಸ್ವಾತಂತ್ರ್ಯ ಹೋರಾಟಕ್ಕೆ ಏನು ಕೊಡುಗೆ ನೀಡಿದೆ? ಬ್ರಿಟಿಷರಿಂದ ಲಾಟಿ ಏಟು ತಿಂದಿದ್ದಾಗಿ ಅವು ಹೇಳುತ್ತಾರೆ. ನನ್ನ ಎಮ್ಮೆ ಕೂಡಾ ಹಲವು ಏಟು ತಿಂದಿದೆ. ನೀವು ಲಾಠಿ ಏಟು ತಿಂದಿದ್ದರೆ, ಕೆಚ್ಚೆದೆಯ ಸಾವರ್ಕರ್ ಅವರಂಥವರಿಗೆ ಏನಾಗಿರಬೇಡ?" ಎಂದು ಬಕ್ಷಿ ಪ್ರಶ್ನಿಸಿದ್ದರು.

ಬಕ್ಷಿಯವರ ಇಂತಹ ಹಲವು ವಿಡಿಯೋಗಳನ್ನು ಟ್ವಿಟರಿಗರು ಟ್ವೀಟ್ ಮಾಡಿ ವಿಸ್ತಾರಾ ಏರ್ ಲೈನ್ಸ್ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

‘ವಾರ್ತಾ ಭಾರತಿ’ ನಿಮಗೆ ಆಪ್ತವೇ ? ಇದರ ಸುದ್ದಿಗಳು ಮತ್ತು ವಿಚಾರಗಳು ಎಲ್ಲರಿಗೆ ಉಚಿತವಾಗಿ ತಲುಪುತ್ತಿರಬೇಕೇ? 

ಬೆಂಬಲಿಸಲು ಇಲ್ಲಿ  ಕ್ಲಿಕ್ ಮಾಡಿ

Comments (Click here to Expand)