ವೃತ್ತಿಪರ ಕುಸ್ತಿಪಟು ಸಿಲ್ವರ್ ಕಿಂಗ್ ಸ್ಪರ್ಧೆಯ ವೇಳೆ ಕುಸಿದುಬಿದ್ದು ಸಾವು
ಲಂಡನ್, ಮೇ 12: ವೃತ್ತಿಪರ ಕುಸ್ತಿಪಟು ಹಾಗೂ ನಟ ‘ಸಿಲ್ವರ್ ಕಿಂಗ್’ ಎಂದೇ ಖ್ಯಾತಿ ಪಡೆದಿರುವ ಸೀಜರ್ ಬ್ಯಾರನ್, ಕಾಮ್ಡೆನ್ಸ್ನಲ್ಲಿರುವ ರೌಂಡ್ಹೌಸ್ನಲ್ಲಿ ಲುಚಾ ಲಿಬ್ರೆ ಕುಸ್ತಿ ಪ್ರದರ್ಶನದ ವೇಳೆಯೇ ಕುಸಿದುಬಿದ್ದು ಸಾವನ್ನಪ್ಪಿದ್ದಾರೆ.
ಮೆಕ್ಸಿಕೊದ ಬ್ಯಾರನ್ 2005ರ ಚಿತ್ರವೊಂದರಲ್ಲಿ ಹಾಲಿವುಡ್ ಹಾಸ್ಯ ನಟ ಜಾಕ್ ಬ್ಲಾಕ್ರೊಂದಿಗೆ ಕಾಣಿಸಿಕೊಂಡಿದ್ದರು.
51ರ ಹರೆಯದ ಸಿಲ್ವರ್ ಕಿಂಗ್ ಶನಿವಾರ ಕಾಮ್ಡೆನ್ಸ್ನ ರೌಂಡ್ಹೌಸ್ನಲ್ಲಿ ಕುಸ್ತಿಪ್ರದರ್ಶನ ನೀಡುತ್ತಿದ್ದ ಸಂದರ್ಭದಲ್ಲಿ ಕುಸಿದು ಬಿದ್ದರು. ಅವರು ಹೃದಯಾಘಾತದಿಂದ ಸಾವನ್ನಪ್ಪಿರುವ ಸಾಧ್ಯತೆಯಿದೆ ಎಂದು ಮೆಕ್ಸಿಕೊ ಮಾಧ್ಯಮಗಳು ವರದಿ ಮಾಡಿವೆ.
‘‘ಅವರು ಕುಸಿದು ಬಿದ್ದಾಗ ಆರಂಭದಲ್ಲಿ ಅದೊಂದು ನಾಟಕವೆಂದು ನಾವೆಲ್ಲ ಭಾವಿಸಿದ್ದೆವು. ಕುಸಿದುಬೀಳುವುದು ಕುಸ್ತಿಯಲ್ಲಿ ಸಾಮಾನ್ಯವಾಗಿರುತ್ತದೆ. ಸಿಲ್ವರ್ಕಿಂಗ್ರನ್ನು ಎಬ್ಬಿಸಲು ರೆಫರಿ ಎಷ್ಟೇ ಪ್ರಯತ್ನ ಪಟ್ಟರೂ ಸಾಧ್ಯವಾಗಲಿಲ್ಲ. ಸಿಲ್ವರ್ ಕಿಂಗ್ ಕುಸಿದುಬಿದ್ದ ತಕ್ಷಣ ರೆಫರಿ ಹಾಗೂ ಇತರರು ಅವರ ಬಳಿ ಧಾವಿಸಿ ಸಹಾಯಕ್ಕೆ ಮುಂದಾಗಿರುವ ದೃಶ್ಯ ಅಂತರ್ಜಾಲದಲ್ಲಿ ಹರಿದಾಡುತ್ತಿದೆ. ನಮಗೆಲ್ಲರಿಗೂ ನಿಜಕ್ಕೂ ಆಘಾತವಾಗಿದ್ದು, ಅವರಿಗೆ ಏನಾಗಿತ್ತು ಎಂದು ಇನ್ನೂ ಸ್ಪಷ್ಟವಾಗಿಲ್ಲ’’ ಎಂದು ಕುಸ್ತಿ ಸ್ಪರ್ಧೆಯ ವೇಳೆ ಹಾಜರಿದ್ದ ರಾಬರ್ಟೊ ಮಲ್ಡ್ಡೊನಾಲ್ಡೊ ಹೇಳಿದ್ದಾರೆ.
1997ರಿಂದ 2000ರ ತನಕ ಅಮೆರಿಕದ ವಿಶ್ವ ಚಾಂಪಿಯನ್ಶಿಪ್ ಕುಸ್ತಿಯಲ್ಲಿ ಭಾಗವಹಿಸಿದ್ದ ಸಿಲ್ವರ್ ಕಿಂಗ್ ವಿಶ್ವದಾದ್ಯಂತ ಯಶಸ್ಸು ಪಡೆದಿದ್ದರು. ಸಿಲ್ವರ್ಕಿಂಗ್ ಹಠಾತ್ ನಿಧನಕ್ಕೆ ಅಮೆರಿಕ ಕಂಪೆನಿ ಡಬ್ಲುಡಬ್ಲುಇ ಸಹಿತ ಎಲ್ಲೆಡೆ ತೀವ್ರ ಶೋಕ ವ್ಯಕ್ತವಾಗಿದೆ.