varthabharthi

ಗಲ್ಫ್ ಸುದ್ದಿ

ಹಜ್ ಯಾತ್ರೆಯ ವೇಳೆ ಉಷ್ಣತೆ ಕಡಿಮೆ ಮಾಡಲು ಯೋಜನೆ

ವಾರ್ತಾ ಭಾರತಿ : 26 Jul, 2019

ರಿಯಾದ್, ಜು. 26: ಯಾತ್ರಾರ್ಥಿಗಳಾಗಿ ಸೌದಿ ಅರೇಬಿಯಕ್ಕೆ ಹೋಗುವವರಿಗೆ ಬಿಸಿಲಿನ ತೀವ್ರತೆಯಿಂದ ರಕ್ಷಣೆ ನೀಡಲು ಆ ದೇಶದ ಸರಕಾರ ಮುಂದೆ ಬಂದಿದೆ. ಅಲ್ಲಿನ ಪವಿತ್ರ ಸ್ಥಳಗಳಲ್ಲಿರುವ ಕಾಲುದಾರಿಗಳಿಗೆ ಶಾಖ-ತಡೆ ಕೋಟಿಂಗ್ ಹಚ್ಚಲು ಅದು ಯೋಜನೆಯೊಂದನ್ನು ರೂಪಿಸಿದೆ.

 ಯೋಜನೆಯ ಮೊದಲ ಹಂತದಲ್ಲಿ ಮಿನಾದಲ್ಲಿರುವ ಪಾದಚಾರಿ ಕಾಲು ದಾರಿಗಳಿಗೆ ಶಾಖ ತಡೆ ಕೋಟಿಂಗ್ ಹಚ್ಚಲಾಗುವುದು. ಮಿನಾದಿಂದ ಜಮಾರತ್‌ವರೆಗಿನ ಸುಮಾರು 3,500 ಚದರ ಮೀಟರ್ ಕಾಲು ದಾರಿ ಈ ಯೋಜನೆಯ ವ್ಯಾಪ್ತಿಗೊಳಪಡುವುದು.

ಜಪಾನ್‌ನ ಸುಮಿಟೊಮೊ ಎಂಬ ಕಂಪೆನಿಯ ಸಹಕಾರದೊಂದಿಗೆ ಈ ಯೋಜನೆಯನ್ನು ಜಾರಿಗೊಳಿಸಲಾಗುತ್ತಿದೆ ಎಂದು ಪವಿತ್ರ ಸ್ಥಳಗಳ ಮಹಾ ನಿರ್ದೇಶಕ ಅಹ್ಮದ್ ಮನ್ಶಿ ಹೇಳಿದರು.

‘‘ಶಾಯಿಬೆನ್ ಪ್ರದೇಶದಲ್ಲಿರುವ ಕಾಲು ದಾರಿಗಳ ಮೇಲ್ಮೈಯ ಉಷ್ಣತೆಯನ್ನು ಕಡಿಮೆಗೊಳಿಸುವ ಉದ್ದೇಶವನ್ನು ಯೋಜನೆ ಹೊಂದಿದೆ. ಜಮಾರತ್‌ನಲ್ಲಿರುವ ಕಾಲು ದಾರಿಗಳನ್ನು ಈ ಯೋಜನೆಗೆ ಒಳಪಡಿಸಲಾಗುವುದು. ಹಲವು ಪವಿತ್ರ ಸ್ಥಳಗಳ ಪಾದಚಾರಿ ಕಾಲು ದಾರಿಗಳಿಗೆ ಕೋಟಿಂಗ್ ಅಳವಡಿಸಲಾಗುವುದು’’ ಎಂದರು.

ಈ ಕೋಟಿಂಗ್‌ಗಳು ಉಷ್ಣತೆಯನ್ನು 15ರಿಂದ 20 ಡಿಗ್ರಿಗಳಷ್ಟು ತಗ್ಗಿಸಲು ನೆರವಾಗುವುದು ಎಂದು ಅವರು ನುಡಿದರು.

 ಈ ವರ್ಷದ ಹಜ್ ಯಾತ್ರೆಯ ವೇಳೆ ಯೋಜನೆಯು ಪ್ರಾಯೋಗಿಕವಾಗಿ ಜಾರಿಗೆ ಬರುವುದು.

‘ವಾರ್ತಾ ಭಾರತಿ’ ನಿಮಗೆ ಆಪ್ತವೇ ? ಇದರ ಸುದ್ದಿಗಳು ಮತ್ತು ವಿಚಾರಗಳು ಎಲ್ಲರಿಗೆ ಉಚಿತವಾಗಿ ತಲುಪುತ್ತಿರಬೇಕೇ? 

ಬೆಂಬಲಿಸಲು ಇಲ್ಲಿ  ಕ್ಲಿಕ್ ಮಾಡಿ

Comments (Click here to Expand)