varthabharthi

ಕರಾವಳಿ

ಅಕ್ರಮ ಶಸ್ತ್ರಾಸ್ತ್ರ ಹೊಂದಿದ ಆರೋಪ ಸಾಬೀತು: ಬನ್ನಂಜೆರಾಜ ಸಹಚರರಿಗೆ ಐದು ವರ್ಷ ಶಿಕ್ಷೆ

ವಾರ್ತಾ ಭಾರತಿ : 23 Sep, 2019

ಮಂಗಳೂರು, ಸೆ.23: ಭೂಗತ ಪಾತಕಿ ಬನ್ನಂಜೆ ರಾಜನ ಮೂವರು ಸಹಚರರು ಅಕ್ರಮ ಶಸ್ತ್ರಾಸ ಹೊಂದಿದ ಆರೋಪ ಮಂಗಳೂರಿನ 6ನೇ ಹೆಚ್ಚುವರಿ ಜಿಲ್ಲಾ ಮತ್ತು ಸತ್ರ ನ್ಯಾಯಾಲಯದಲ್ಲಿ ಸಾಬೀತಾಗಿದ್ದು, ಆರೋಪಿಗಳಿಗೆ ಐದು ವರ್ಷಗಳ ಸಜೆ ಮತ್ತು ತಲಾ 50,000 ರೂ. ದಂಡ ವಿಧಿಸಲಾಗಿದೆ.

ಉತ್ತರ ಪ್ರದೇಶದ ಗೋರಖ್‌ಪುರ ಜಿಲ್ಲೆಯ ಮನೀಶ್ ಕುಮಾರ್ ಯಾನೆ ನೀರಜ್ ಶ್ರೀವಾಸ್ತವ್ ಯಾನೆ ರಾಹುಲ್ (33), ಬನಾರಸ್ ಜಿಲ್ಲೆಯ ಅಲಿ ಹುಸೈನ್ ಯಾನೆ ಹುಸೈನ್ ಅಲಿ ಯಾನೆ ರವಿ (30) ಮತ್ತು ಕರ್ನಾಟಕದ ಮೈಸೂರಿನ ಗೋಕುಲಂ 14ನೇ ಅಡ್ಡರಸ್ತೆಯ ಪುಟ್ಟಸ್ವಾಮಿ ಎಂ.ಬಿ. (52) ಶಿಕ್ಷೆಗೊಳಗಾದ ಆರೋಪಿಗಳು.

ಪ್ರಕರಣ ವಿವರ: ನಗರದ ಕದ್ರಿ ಪಾರ್ಕ್ ಬಳಿ ರಿಯಲ್ ಎಸ್ಟೇಟ್ ಉದ್ಯಮಿ ಸುರೇಶ್ ಭಂಡಾರಿ ಅವರ ಕಾರಿಗೆ ಗುಂಡು ಹಾರಿಸಿದ ಹಾಗೂ ಉಡುಪಿಯ ಐರೋಡಿ ಜುವೆಲ್ಲರ್ಸ್‌ನಲ್ಲಿ ಶೂಟೌಟ್ ನಡೆಸಿದ ಬನ್ನಂಜೆ ರಾಜನ ಏಳು ಸಹಚರರು ಕೊಟ್ಟಾರಚೌಕಿಯ ಅಪಾರ್ಟ್‌ಮೆಂಟ್‌ನಲ್ಲಿ ಉಳಿದುಕೊಂಡ್ದಿರು.

ಬನ್ನಂಜೆ ರಾಜನಿಗೆ ಹಪ್ತಾ ನೀಡಲು ನಿರಾಕರಿಸಿದವರನ್ನು ಕೊಲೆ ಮಾಡಲು ಸ್ಕೆಚ್ ಹಾಕುತ್ತಿದ್ದಾರೆ ಎಂಬ ಮಾಹಿತಿ ಅನ್ವಯ 2011ರ ಆಗಸ್ಟ್ 25ರಂದು ನಗರದ ಬಂದರ್ ಪೊಲೀಸ್ ಠಾಣೆಯ ಇನ್‌ಸ್ಪೆಕ್ಟರ್ ಹಾಗೂ ರೌಡಿ ನಿಗ್ರಹ ದಳದ ಮುಖ್ಯಸ್ಥ ವಿನಯ್ ಎ. ಗಾಂವ್‌ಕರ್ (ಈಗ ಸಿಸಿಆರ್‌ಬಿ ಎಸಿಪಿ ಆಗಿದ್ದಾರೆ) ಮತ್ತು ಸಿಬ್ಬಂದಿ ಅಪಾರ್ಟ್‌ಮೆಂಟ್‌ಗೆ ದಾಳಿ ನಡೆಸಿದ್ದರು. ಈ ಸಂದರ್ಭ ಅಪಾರ್ಟ್‌ಮೆಂಟ್‌ನಲ್ಲಿ ಮನೀಶ್ ಕುಮಾರ್, ಅಲಿ ಹುಸೈನ್, ಪುಟ್ಟಸ್ವಾಮಿ ಎಂ.ಬಿ, ಮಂಗಳೂರಿನ ದೇವದಾಸ್ ಶೆಟ್ಟಿ ಮತ್ತು ವಿನೋದ್ ಕುಲಾಲ್, ಉತ್ತರ ಪ್ರದೇಶದ ಅಮಿತ್ ಕುಮಾರ್ ಚೌರಾಸಿಯಾ, ಬಿಹಾರದ ಅಬ್ದುಲ್ ರಹೇಜ್ ಖಾನ್ ಅವರನ್ನು ಪೊಲೀಸರು ಬಂಧಿಸಿದ್ದರು.

ಮನೀಶ್ ಕುಮಾರ್ ಬಳಿ ಒಂದು ರಿವಾಲ್ವರ್ ಮತ್ತು ಒಂದು ಸಜೀವ ಮದ್ದುಗುಂಡು, ಅಲಿ ಹುಸೈನ್ ಬಳಿ ಒಂದು ಪಿಸ್ತೂಲು ಮತ್ತು ಐದು ಸಜೀವ ಮದ್ದುಗುಂಡುಗಳು, ಪುಟ್ಟಸ್ವಾಮಿ ಬಳಿ ಒಂದು ಪಿಸ್ತೂಲು ಮತ್ತು ಐದು ಸಜೀವ ಮದ್ದುಗುಂಡುಗಳು ಪತ್ತೆಯಾಗಿದ್ದವು.

ಈ ಪ್ರಕರಣದ ಬಗ್ಗೆ ಮುಂದಿನ ತನಿಖೆಯನ್ನು ಕಾವೂರು ಪೊಲೀಸ್ ಇನ್ಸ್‌ಪೆಕ್ಟರ್ ಆಗಿದ್ದ ಎಚ್.ಆರ್. ಸಿದ್ದಪ್ಪ ಪೂರ್ಣಗೊಳಿಸಿ ದೋಷಾರೋಪ ಪಟ್ಟಿಯನ್ನು ನ್ಯಾಯಾಲಯಕ್ಕೆ ಸಲ್ಲಿಸಿದ್ದರು.

ನ್ಯಾಯಾಲಯದಲ್ಲಿ ಈ ಪ್ರಕರಣದ ವಿಚಾರಣೆ ಕಳೆದ ಎಂಟು ವರ್ಷಗಳಿಂದ ನಡೆಯುತ್ತಿದ್ದು, 6 ನೇ ಹೆಚ್ಚುವರಿ ಜಿಲ್ಲಾ ಮತ್ತು ಸತ್ರ ನ್ಯಾಯಾಲಯದ ನ್ಯಾಯಾಧೀಶೆ ಸಯಿದುನ್ನೀಸಾ ವಿಚಾರಣೆ ಪೂರ್ಣಗೊಳಿಸಿ ತೀರ್ಪು ಪ್ರಕಟಿಸಿದರು.

ಆರೋಪಿಗಳಾದ ಮನೀಶ್ ಕುಮಾರ್, ಅಲಿ ಹುಸೈನ್ ಮತ್ತು ಪುಟ್ಟಸ್ವಾಮಿ ಎಂ.ಬಿ. ಅಕ್ರಮವಾಗಿ ಶಸಾಸ್ತ್ರ ಹೊಂದಿದ್ದ ಆರೋಪ ಸಾಬೀತಾಗಿದೆ ಎಂದು ತೀರ್ಮಾನಕ್ಕೆ ಬಂದು ಅವರಿಗೆ ಶಸಾಸ್ತ್ರ ನಿಯಂತ್ರಣ ಕಾಯ್ದೆಯ ಸೆಕ್ಷನ್ 3 ರನ್ವಯ ಒಂದು ವರ್ಷ ಸಜೆ ಮತ್ತು ತಲಾ 25,000 ರೂ. ದಂಡ ಹಾಗೂ ದಂಡ ತಪ್ಪಿದರೆ ಆರು ತಿಂಗಳ ಸಜೆ ಮತ್ತು ಸೆಕ್ಷನ್ 7 ರನ್ವಯ ಐದು ವರ್ಷ ಸಜೆ ಮತ್ತು ತಲಾ 25,000 ರೂ. ದಂಡ ಹಾಗೂ ದಂಡ ತೆರಲು ತಪ್ಪಿದರೆ ಒಂದು ವರ್ಷ ಸಾದಾ ಸಜೆಯನ್ನು ಅನುಭವಿಸಬೇಕೆಂದು ತೀರ್ಪು ನೀಡಿದರು. ಇನ್ನುಳಿದ ನಾಲ್ವರು ಆರೋಪಿಗಳ ಆರೋಪ ಸಾಬೀತಾಗದ ಕಾರಣ ಅವರನ್ನು ಖುಲಾಸೆಗೊಳಿಸಿದರು.

ಪ್ರಕರಣದಲ್ಲಿ ಸರಕಾರದ ಪರವಾಗಿ ಪಬ್ಲಿಕ್ ಪ್ರಾಸಿಕ್ಯೂಟರ್ ಜುಡಿತ್ ಓ.ಎಂ. ಕ್ರಾಸ್ತಾ ವಾದಿಸಿದ್ದರು.

‘ವಾರ್ತಾ ಭಾರತಿ’ ನಿಮಗೆ ಆಪ್ತವೇ ? ಇದರ ಸುದ್ದಿಗಳು ಮತ್ತು ವಿಚಾರಗಳು ಎಲ್ಲರಿಗೆ ಉಚಿತವಾಗಿ ತಲುಪುತ್ತಿರಬೇಕೇ? 

ಬೆಂಬಲಿಸಲು ಇಲ್ಲಿ  ಕ್ಲಿಕ್ ಮಾಡಿ

Comments (Click here to Expand)