varthabharthi

ಕೃತಿ ಪರಿಚಯ

ಈ ಹೊತ್ತಿನ ಹೊತ್ತಿಗೆ

ಕುಕ್ಕರಹಳ್ಳಿ ಕಥಾಲೋಕದ ಹೆಬ್ಬಾಗಿಲು ತಟ್ಟಿ....

ವಾರ್ತಾ ಭಾರತಿ : 26 Sep, 2019
-ಕಾರುಣ್ಯಾ

ಇತ್ತೀಚಿನ ದಿನಗಳಲ್ಲಿ ಗಂಭೀರ ವಿಮರ್ಶೆ ಹಿಂದಕ್ಕೆ ಸರಿದಿದೆ. ಕತೆಗಳು ಸಮಯ ಕಳೆಯುವ ಬಗೆಯಷ್ಟೇ ಆಗಿ ಕಿರಿದಾಗುತ್ತಾ ಕಿರಿದಾಗುತ್ತಾ ನ್ಯಾನೋ ಪ್ರಕಾರಕ್ಕೆ ತಲುಪಿದೆ. ಒಂದು ಕಾಲದ ಸಣ್ಣ ಕತೆಗಳು ಇಂದಿನ ಕಾಲಕ್ಕೆ ನೀಳ್ಗತೆಗಳೇ ಸರಿ. ಹಿಂದಿನ ನೀಳ್ಗತೆಗಳನ್ನು ಇಂದು ಮಿನಿ ಕಾದಂಬರಿ ಎಂದು ಕರೆಯಬೇಕಾಗುತ್ತದೆ. ಹೀಗಿರುವಲ್ಲ್ಲಿ, ಒಬ್ಬ ಕಥೆಗಾರ ಎಲ್ಲ ಕತೆಗಳನ್ನು ಮುಂದಿಟ್ಟುಕೊಂಡು ಅಧ್ಯಯನ ನಡೆಸುವುದು ದೂರದ ಮಾತು. ಕೆಲವೊಮ್ಮೆ ಅಂತಹ ಅಪರೂಪದ ಪ್ರಯತ್ನಗಳು ನಡೆಯುತ್ತವೆ. ಇಲ್ಲಿ ‘ಬಸವರಾಜು ಕುಕ್ಕರಹಳ್ಳಿ ಕಥಾಲೋಕ’ದ ಕುರಿತಂತೆ ವಿಮರ್ಶಾ ಲೇಖನಗಳ ಸಂಕಲನದಲ್ಲಿ ಅಂತಹದೊಂದು ಪ್ರಯತ್ನ ಮಾಡಲಾಗಿದೆ. ಡಾ. ನೀಲಗಿರಿ ತಳವಾರ, ಡಾ. ಯೋಗೇಶ್ ಎನ್. ಅವರ ಸಂಪಾದಕತ್ವದಲ್ಲಿ ಈ ಕೃತಿಯನ್ನು ಹೊರತರಲಾಗಿದೆ.

‘‘ಬೆಸಗರಹಳ್ಳಿ ರಾಮಣ್ಣ ಹಾಗೂ ಜಯಂತ ಕಾಯ್ಕಿಣಿಯವರ ಕಥೆಗಳ ಆನಂತರದ ನಮ್ಮ ಸಂದರ್ಭದ ಮಹತ್ವದ ಕಥೆಗಾರರು ಎಂಬುದನ್ನು ಬಸವರಾಜು ಕುಕ್ಕರಹಳ್ಳಿ ಅವರ ಕಥೆಗಳು ಕಾಣಿಸುತ್ತವೆ. ಗಾತ್ರ ಮತ್ತು ಪಾತ್ರ ಎರಡರಲ್ಲೂ ಬಸವರಾಜು ಕುಕ್ಕರಹಳ್ಳಿ ಅವರ ಕಥಾ ಸಾಹಿತ್ಯ ಗಮನಾರ್ಹವಾಗಿದೆ. ಕಥಾ ಪ್ರಕಾರಕ್ಕೆ ಮಾತ್ರವೇ ಕುಕ್ಕರಹಳ್ಳಿ ತಮ್ಮ ಬರವಣಿಗೆಯನ್ನು ನಿಗದಿ ಪಡಿಸಿಕೊಂಡು ಬಂದಿರುವುದು ಸಹ ಒಂದು ವಿಶೇಷವೆಂದೇ ಹೇಳಬೇಕು. ಗ್ರಾಮೀಣ ದಲಿತ ಸಮುದಾಯದಿಂದ ಬಂದ ಅವರು ಇಂಡಿಯಾದ ವರ್ತಮಾನ ಬದುಕಿನ ಬಡತನ, ಬವಣೆಗಳು, ಕನಸಗಳು ಮಾತ್ರವಲ್ಲ ಅಲ್ಲಿರುವ ಜೀವನ ಪ್ರೀತಿ, ಬದುಕಿನೊಡನೆ ಹೋರಾಡುವ ಛಲ ಸಂಬಂಧಗಳ ಸ್ವರೂಪವನ್ನು ತಮ್ಮ ಕತೆಗಳಲ್ಲಿ ಕಟ್ಟಿಕೊಡುತ್ತಾರೆ. ಪ್ರತಿಕೂಲ ಪರಿಸ್ಥಿತಿಯಲ್ಲಿಯೇ ಬದುಕನ್ನು ಕಟ್ಟಿಕೊಳ್ಳುವ ರೀತಿ ಹೊಸತನಕ್ಕೆ ತೆರೆದುಕೊಳ್ಳುವ ಹಂಬಲ, ಬದುಕನ್ನು ಇತರರಂತೆ ಅನುಭವಿಸುವ ಅಭೀಪ್ಸೆಯನ್ನು ಗುರುತಿಸಬಹುದು...’’ ಎಂದು ಕೃತಿಯ ಸಂಪಾದಕರು ಅಭಿಪ್ರಾಯಪಟ್ಟುತ್ತಾರೆ.

 ಕನ್ನಡದ ಮಹತ್ವದ 29 ಲೇಖಕರು ಕುಕ್ಕರಹಳ್ಳಿ ಅವರ ಕತೆಗಳ ಕುರಿತಂತೆ ಈ ಕೃತಿಯಲ್ಲಿ ಬರೆದಿದ್ದಾರೆ. ಕೇಶವಮಳಗಿ, ಆರ್. ವಿಜಯರಾಘವನ್, ಡಾ. ಕವಿತಾ ರೈ, ಪ್ರೊ. ಓ. ಎಲ್. ನಾಗಭೂಷಣ ಸ್ವಾಮಿ, ಡಾ. ಸಬಿತಾ ಬನ್ನಾಡಿ, ಡಾ. ವಿಜಯಕುಮಾರಿ ಎಸ್. ಕರಿಕಲ್, ಡಾ. ಪ್ರಹ್ಲಾದ ಅಗಸನ ಕಟ್ಟೆ, ಡಾ. ನಟರಾಜ ಬೂದಾಳ್, ವಿ. ಎನ್. ವೆಂಕಟಲಕ್ಷ್ಮಿ, ಡಾ. ಅಪ್ಪಗೆರೆ ಸೋಮಶೇಖರ, ಶಾಂತಿನಾಥ ದೇಸಾಯಿ, ಜಯಂತ ಕಾಯ್ಕಿಣಿ, ಡಾ. ರಹಮತ್ ತರೀಕೆರೆ, ಡಾ. ಪಿ. ಚಂದ್ರಿಕಾ ಮೊದಲಾದವರ ಮಹತ್ವದ ಲೇಖನಗಳು ಇಲ್ಲಿವೆ. ಡಾ. ಶಿಲ್ಪಶ್ರೀ ಎಚ್. ವಿ. ಮತ್ತು ಡಾ. ಶಿವಕುಮಾರ ಕಾರೇಪುರ ಅವರು ಕಥೆಗಾರರನ್ನು ಸಂದರ್ಶನ ಮಾಡಿದ್ದಾರೆ. ಹಾಗೆಯೇ ಕೆಲವು ಪತ್ರಗಳೂ ಕತೆಗಾರರ ಕುರಿತಂತೆ ಇನ್ನಷ್ಟನ್ನು ತೆರೆದಿಡುತ್ತವೆ.

ವಿಜಯಲಕ್ಷ್ಮಿ ಪ್ರಕಾಶನ ಮೈಸೂರು ಇವರು ಹೊರತಂದಿರುವ ಕೃತಿಯ ಒಟ್ಟು ಪುಟಗಳು 208. ಮುಖಬೆಲೆ 210 ರೂಪಾಯಿ. ಆಸಕ್ತರು 94483 50932 ದೂರವಾಣಿಯನ್ನು ಸಂಪರ್ಕಿಸಬಹುದು.

‘ವಾರ್ತಾ ಭಾರತಿ’ ನಿಮಗೆ ಆಪ್ತವೇ ? ಇದರ ಸುದ್ದಿಗಳು ಮತ್ತು ವಿಚಾರಗಳು ಎಲ್ಲರಿಗೆ ಉಚಿತವಾಗಿ ತಲುಪುತ್ತಿರಬೇಕೇ? 

ಬೆಂಬಲಿಸಲು ಇಲ್ಲಿ  ಕ್ಲಿಕ್ ಮಾಡಿ

Comments (Click here to Expand)