varthabharthi

ನಿಮ್ಮ ಅಂಕಣ

‘ಬ್ಯಾರಿ ವ್ಯಾಕರಣ’ವೇ? ಅಥವಾ ಕನ್ನಡ ವ್ಯಾಕರಣವೇ?

ವಾರ್ತಾ ಭಾರತಿ : 16 Oct, 2019
-ಅಹ್ಮದ್ ಬಾವಾ, ಶಿಕ್ಷಕ, ಅಡ್ಯಾರ್, ಮಂಗಳೂರು

ಮಾನ್ಯರೇ,

ಬ್ಯಾರಿ ಭಾಷೆ ಕರಾವಳಿ ಕರ್ನಾಟಕದ ಬ್ಯಾರಿ ಮುಸ್ಲಿಮರ ಆಡು ಭಾಷೆಯಾಗಿದೆ. ಅಳಿವಿನಂಚಿನಲ್ಲಿದ್ದ ಭಾಷೆ ಮತ್ತು ಸಂಸ್ಕೃತಿಗೆ ಜೀವ ತುಂಬಿ ಮತ್ತೆ ಸಾಹಿತ್ಯಕ ಭಾಷೆಯಾಗಿ ಬೆಳೆಯಲಾರಂಭಿಸಿದೆ. ತುಳು ಭಾಷೆಯ ಹಾಗೆಯೇ ಅದೊಂದು ಸ್ವತಂತ್ರ ದ್ರಾವಿಡ ಗುಂಪಿನ ಭಾಷೆಯಾಗಿದೆ. ನೂರಾರು ಬ್ಯಾರಿ ಸಾಹಿತ್ಯಗಳು ಹೊರಬಂದಿವೆ, ಬ್ಯಾರಿ ಸಾಹಿತ್ಯ ಅಕಾಡಮಿ ಆಗಿದೆ, ಬ್ಯಾರಿ ಅಧ್ಯಯನ ಪೀಠ ಆಗಿದೆ. ಬ್ಯಾರಿ ಭಾಷೆ ಮತ್ತು ಸಂಸ್ಕೃತಿ ಬೆಳೆಯುತ್ತಿರುವುದು ಬ್ಯಾರಿಗಳ ಹೆಮ್ಮೆಯ ಸಂಗತಿ.

 ಬ್ಯಾರಿ ಭಾಷೆಯಲ್ಲಿ ದ್ರಾವಿಡ ಮೂಲದ ತಮಿಳಿನ ಮತ್ತು ಅರಬಿ ಭಾಷೆಯ ಪ್ರಭಾವ ಇದೆ ಎಂಬುದನ್ನು ಹಲವು ಸಂಶೋಧಕರು ತಿಳಿಸಿದ್ದಾರೆ. ಆದರೆ ಬ್ಯಾರಿ ಸಾಹಿತ್ಯ ಅಕಾಡಮಿ ಹೊರತಂದ ‘ಬ್ಯಾರಿ ವ್ಯಾಕರಣ’ ಎಂಬ ಪುಸ್ತಕ ಬ್ಯಾರಿ ಜನಸಾಮಾನ್ಯರಿಗೆ ಅಚ್ಚರಿ ಮೂಡಿಸಿದೆ. ಯಾಕೆಂದರೆ ಅದು ಕನ್ನಡ ವ್ಯಾಕರಣ ಪುಸ್ತಕದ ಬ್ಯಾರಿ ಭಾಷಾಂತರ ಆಗಿದೆ. ಬ್ಯಾರಿಗಳಲ್ಲಿ ಬಳಕೆಯಲ್ಲಿಲ್ಲದ, ಬಳಸಲಾಗದ ಕನ್ನಡ ಪದಗಳಿವೆ. ಉದಾ ಸ್ವರಾಕ್ಷರ, ವ್ಯಂಜನಾಕ್ಷರ, ಅನುನಾಸಿಕ, ವಿಸರ್ಗ, ವಿಕೃತಿ ಪ್ರತ್ಯಯ, ವಿಶ್ಲೇಷಣ, ಕರ್ತೃಪದ ಕರ್ಮಪದ, ವಿಭಕ್ತಿ ಪ್ರತ್ಯಯ, ಕರ್ತರಿ ಪ್ರಯೋಗ, ಕರ್ಮಣಿ ಪ್ರಯೋಗ, ಸಂಧಿ, ಸಮಾಸ ಇತ್ಯಾದಿ ಕನ್ನಡ ವ್ಯಾಕರಣವೇ ಆಗಿದೆ. ಇದನ್ನು ಬ್ಯಾರಿ ವ್ಯಾಕರಣ ಎಂದು ಒಪ್ಪಲು ಸಾಧ್ಯವೇ?

ವ್ಯಾಕರಣ ಕರ್ತೃಗಳು ಕನ್ನಡ ಪಂಡಿತರಿರಬಹುದು. ಬ್ಯಾರಿ ವಿದ್ಯಾರ್ಥಿಗಳು ಕನ್ನಡ ಶಾಲೆಗಳಲ್ಲಿ ಮಾತ್ರ ಕಲಿಯುವುದಿಲ್ಲ. ಕರಾವಳಿಯಾದ್ಯಂತ ಸಾವಿರಾರು ಬ್ಯಾರಿ ಮಾಧ್ಯಮ ಕಲಿಕಾ ಕೇಂದ್ರಗಳಿವೆ. ಅಲ್ಲಿ ಬ್ಯಾರಿ ಭಾಷೆಯಲ್ಲಿ ಕಲಿಸುತ್ತಾರೆ. ಅವರಿಗೆ ಇದು ಕಬ್ಬಿಣದ ಕಡಲೆಯಾಗಬಹುದು. ಬ್ಯಾರಿ ಭಾಷೆಯಷ್ಟೇ ಅರಬಿ ಭಾಷೆಯ ಪ್ರಭಾವ ಧಾರಾಳ ಇದೆ. ವ್ಯಾಕರಣ ತಯಾರಿಯಲ್ಲಿ ಯಾರಾದರೊಬ್ಬ ಮದ್ರಸಾ ಶಿಕ್ಷಕ ಮೌಲ್ವಿಯನ್ನು ಸೇರಿಸಿಕೊಂಡಿದ್ದರೆ ಅಥವಾ ಮುಸ್ಲಿಂ ಧರ್ಮಗುರುಗಳ ಪರಿಶೀಲನೆಗೊಪ್ಪಿಸಿದ್ದರೆ ಬ್ಯಾರಿ ಮುಸ್ಲಿಮರ ಭಾಷಾ ವ್ಯಾಕರಣ ಆಗುತ್ತಿತ್ತು

-ಅಹ್ಮದ್ ಬಾವಾ, ಶಿಕ್ಷಕ, ಅಡ್ಯಾರ್, ಮಂಗಳೂರು

‘ವಾರ್ತಾ ಭಾರತಿ’ ನಿಮಗೆ ಆಪ್ತವೇ ? ಇದರ ಸುದ್ದಿಗಳು ಮತ್ತು ವಿಚಾರಗಳು ಎಲ್ಲರಿಗೆ ಉಚಿತವಾಗಿ ತಲುಪುತ್ತಿರಬೇಕೇ? 

ಬೆಂಬಲಿಸಲು ಇಲ್ಲಿ  ಕ್ಲಿಕ್ ಮಾಡಿ

Comments (Click here to Expand)