varthabharthi

ಕರ್ನಾಟಕ

ಸ್ಕ್ರೀನ್ ಶಾಟ್‍ಗಳು ವೈರಲ್, ಸಂಘಟನೆಗಳಿಂದ ಉಚ್ಚಾಟನೆ

ಸಿ.ಟಿ.ರವಿ ಆಪ್ತ, ಬಜರಂಗದಳ ಮುಖಂಡನಿಂದ ಯುವತಿಯರಿಗೆ ಅಶ್ಲೀಲ ಸಂದೇಶ: ಆರೋಪ

ವಾರ್ತಾ ಭಾರತಿ : 2 Dec, 2019

ಚಿಕ್ಕಮಗಳೂರು, ಡಿ.2: ಚಿಕ್ಕಮಗಳೂರಿಲ್ಲಿ ಸಂಘಪರಿವಾರ ಸಂಘಟನೆಗಳ ಸಕ್ರಿಯ ಸದಸ್ಯ ಹಾಗೂ ಸಚಿವ ಸಿ.ಟಿ.ರವಿ ಅವರ ಆಪ್ತನೂ ಆಗಿರುವ ಬಜರಂಗದಳ, ವಿಶ್ವ ಹಿಂದೂ ಪರಿಷತ್‍ನ ಜಿಲ್ಲಾ ಮುಖಂಡನದ್ದು ಎನ್ನಲಾದ ಅಶ್ಲೀಲ ಸಂದೇಶಗಳು ವೈರಲ್ ಆಗಿದ್ದು, ಘಟನೆ ಬಳಿಕ ಆತನನ್ನು ಸಂಘಟನೆಗಳಿಂದ ಉಚ್ಚಾಟನೆ ಮಾಡಲಾಗಿದೆ.

ಬಜರಂಗದಳದ ಹಾಲಿ ಜಿಲ್ಲಾ ಸಂಚಾಲಕನಾಗಿದ್ದ ತಾಲೂಕಿನ ಆಲ್ದೂರು ಹೋಬಳಿಯ ತುಡುಕೂರು ಗ್ರಾಮದ ತುಡುಕೂರು ಮಂಜು ಎಂಬಾತನ ವಿರುದ್ಧ ಈ ಆರೋಪ ಕೇಳಿಬಂದಿದೆ. ಈತ ತನ್ನ ಪರಿಚಯದಲ್ಲಿದ್ದ 10ಕ್ಕೂ ಹೆಚ್ಚು ಯುವತಿಯರಿಗೆ ಸಾಮಾಜಿಕ ಜಾಲತಾಣಗಳದ ವಾಟ್ಸ್ ಆ್ಯಪ್, ಫೇಸ್‍ಬುಕ್ ಮೂಲಕ ಅಶ್ಲೀಲ, ಅಸಭ್ಯ ಸಂದೇಶಗಳನ್ನು ಕಳಿಸಿದ್ದಾನೆ ಎಂದು ಆರೋಪಿಸಲಾಗಿದ್ದು, ಅಶ್ಲೀಲ ಸಂದೇಶ, ಚಾಟಿಂಗ್‍ಗಳ ಸ್ಕ್ರೀನ್ ಶಾಟ್‍ಗಳು ಇದೀಗ ಜಿಲ್ಲಾದ್ಯಂತ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿವೆ.

ತುಡುಕೂರು ಮಂಜುವಿನ ಈ ಸ್ಕ್ರೀನ್‍ ಶಾಟ್‍ಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗುತ್ತಿದ್ದಂತೆ ಬಜರಂಗದಳದ ಜಿಲ್ಲಾ ಮುಖಂಡರು ಬಜರಂಗದಳದ ಜಿಲ್ಲಾ ಸಂಚಾಲಕನ ಸ್ಥಾನದಿಂದ ಆತನನ್ನು ಉಚ್ಛಾಟನೆ ಮಾಡಿದ್ದಾರೆ. ತುಡುಕೂರು ಮಂಜುನನ್ನು ಬಜರಂಗದಳದ ಜಿಲ್ಲಾ ಸಂಚಾಲಕ ಸ್ಥಾನದಿಂದ ಉಚ್ಚಾಟನೆ ಮಾಡಿರುವುದನ್ನು ಸಂಘಟನೆಯ ಮುಖಂಡರು ಅಧಿಕೃತವಾಗಿ ತಿಳಿಸಿದ್ದಾರೆ. ಆದರೆ ಸಂಘಟನೆಯ ಮುಖಂಡರು ಈ ಪ್ರಕರಣದಿಂದ ಮಂಜುನನ್ನು ಪಾರು ಮಾಡಲು ಮುಂದಾಗಿದ್ದಾರೆ ಮತ್ತು ನೊಂದ ಯುವತಿಯರು ಪೊಲೀಸರಿಗೆ ದೂರು ನೀಡದಂತೆ ಒತ್ತಡ ಹಾಕುತ್ತಿದ್ದಾರೆಂಬ ಆರೋಪವೂ ಕೇಳಿಬರುತ್ತಿದೆ.

ತುಡುಕೂರು ಮಂಜು ಕಳೆದೊಂದು ದಶಕದಿಂದ ಜಿಲ್ಲೆಯಲ್ಲಿರುವ ಸಂಘಪರಿವಾದ ಸಂಘಟನೆಗಳಲ್ಲಿ ಸಕ್ರಿಯನಾಗಿರುವ ಸದಸ್ಯನಾಗಿದ್ದಾನೆ. ಚಿಕ್ಕ ವಯಸ್ಸಿನಿಂದಲೇ ಪರಿವಾರದ ಸಂಘಟನೆಗಳಲ್ಲಿ ಗುರುತಿಸಿಕೊಂಡಿದ್ದ ಮಂಜು, ಬಾಬಾ ಬುಡನ್‍ಗಿರಿ ಹೋರಾಟ ಸೇರಿದಂತೆ ಪರಿವಾರದ ಯಾವುದೇ ಹೋರಾಟಗಳಲ್ಲಿ ಮುಂಚೂಣಿಯಲ್ಲಿರುತ್ತಿದ್ದ. ಸಚಿವ ಸಿ.ಟಿ.ರವಿ ಅವರ ಆಪ್ತ ಹಾಗೂ ಚಿಕ್ಕಮಗಳೂರು ತಾಲೂಕು ಪಂಚಾಯತ್ ಸದಸ್ಯೆಯೊಬ್ಬರ ಸಹೋದರನಾಗಿರುವ ಈತ ಸಚಿವ ಸಿ.ಟಿ.ರವಿಯೊಂದಿಗೆ ಅನೇಕ ಹೋರಾಟಗಳಲ್ಲೂ ಪಾಲ್ಗೊಂಡಿದ್ದ ಎನ್ನಲಾಗಿದೆ.

ಇತ್ತೀಚಿನ ಕೆಲ ವರ್ಷಗಳಿಂದ ಬಜರಂಗದಳದಲ್ಲಿ ಗುರುತಿಸಿಕೊಂಡು ಜಿಲ್ಲಾ ಸಂಚಾಲಕನಾಗಿದ್ದ ಮಂಜುನನ್ನು ಕೋಮುಸೌಹಾರ್ದಕ್ಕೆ ಭಂಗವನ್ನುಂಟು ಮಾಡಿದ ಆರೋಪದ ಮೇಲೆ ಜಿಲ್ಲಾ ಪೊಲೀಸ್ ಇಲಾಖೆ ಈತನನ್ನು ಜಿಲ್ಲೆಯಿಂದ ಗಡಿಪಾರು ಮಾಡಿದ್ದ ಘಟನೆಯೂ ನಡೆದಿತ್ತು ಎಂದು ತಿಳಿದುಬಂದಿದೆ.

ತುಡುಕೂರು ಮಂಜು ಅವರು ಬಜರಂಗದಳ ಹಾಗೂ ವಿಶ್ವ ಹಿಂದೂ ಪರಿಷತ್‍ನ ಸಂಚಾಲಕರಾಗಿ ಕಾರ್ಯನಿರ್ವಹಿಸುತ್ತಿದ್ದ ವೇಳೆ ತಮ್ಮ ಚಾರಿತ್ರ್ಯಕ್ಕೆ ಕುಂದು ಬರುವಂಹ ಕೆಲಸ ಮಾಡಿದ್ದಾರೆ. ಈ ಸಂಬಂಧ ದೂರುಗಳು ಬಂದಿದೆ. ಈ ಕಾರಣಕ್ಕೆ ಅವರನ್ನು ಈ ಸಂಘಟನೆಗಳಿಂದ ಉಚ್ಚಾಟಿಸಲಾಗಿದೆ.  ತುಡುಕೂರು ಮಂಜು ಅವರ ಯಾವುದೇ ಹೇಳಿಕೆಗಳಿಗೂ ಈ ಸಂಘಟನೆಗಳಿಗೂ ಯಾವುದೇ ಸಂಬಂಧ ಇರುವುದಿಲ್ಲ.
- ಯೋಗೀಶ್ ರಾಜ್ ಅರಸ್, ಜಿಲ್ಲಾ ಕಾರ್ಯದರ್ಶಿ, ವಿಹಿಂಪ

‘ವಾರ್ತಾ ಭಾರತಿ’ ನಿಮಗೆ ಆಪ್ತವೇ ? ಇದರ ಸುದ್ದಿಗಳು ಮತ್ತು ವಿಚಾರಗಳು ಎಲ್ಲರಿಗೆ ಉಚಿತವಾಗಿ ತಲುಪುತ್ತಿರಬೇಕೇ? 

ಬೆಂಬಲಿಸಲು ಇಲ್ಲಿ  ಕ್ಲಿಕ್ ಮಾಡಿ

Comments (Click here to Expand)