varthabharthi

ಸಿನಿಮಾ

ಮೂರು ಚಿತ್ರಗಳಲ್ಲಿ ರಮೇಶ್ ಸೂಪರ್ ಕಾಪ್

ವಾರ್ತಾ ಭಾರತಿ : 26 Jan, 2020

ರಮೇಶ್ ಅರವಿಂದ್ ಅಭಿನಯದ ಮೂರು ಚಿತ್ರಗಳು ಈ ವರ್ಷ ತೆರೆಕಾಣಲಿವೆ. ವಿಶೇಷವೆಂದರೆ ಈ ಮೂರು ಚಿತ್ರಗಳಲ್ಲಿಯೂ ರಮೇಶ್ ಖಾಕಿ ಧರಿಸಲಿದ್ದಾರೆ. ಹೌದು. ಅವರ ಅಭಿನಯದ ಶಿವಾಜಿ ಸುರತ್ಕಲ್, 100 ಹಾಗೂ ಬೈರಾದೇವಿಯಲ್ಲಿ ಅವರು ಪೊಲೀಸ್ ಅಧಿಕಾರಿಯ ಪಾತ್ರದಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ.

ಬಹುಭಾಷಾ ನಟ, ನಿರ್ದೇಶಕ ಹಾಗೂ ಟಿವಿ ನಿರೂಪಕನಾಗಿ ತನ್ನ ಬಹುಮುಖಿ ಪ್ರತಿಭೆಯನ್ನು ಪ್ರದರ್ಶಿಸಿರುವ ರಮೇಶ್ ಅರವಿಂದ್ ಈ ವರ್ಷ ಸ್ಯಾಂಡಲ್‌ವುಡ್ ಪ್ರಿಯರಿಗೆ ಮನರಂಜನೆಯ ರಸದೌತಣವನ್ನು ಬಡಿಸಲಿದ್ದಾರೆ.

 ‘ಶಿವಾಜಿ ಸುರತ್ಕಲ್’ ಫೆಬ್ರವರಿ 21ರಂದು ಬಿಡುಗಡೆಯಾಗಲಿದೆ. ಬರೋಬ್ಬರಿ ಎರಡು ವರ್ಷಗಳ ಸುದೀರ್ಘ ಅಂತರದ ಬಳಿಕ ರಮೇಶ್, ಬೆಳ್ಳಿತೆರೆಯಲ್ಲಿ ಕಾಣಿಸಿಕೊಳ್ಳುತ್ತಿರುವುದರಿಂದ ಸಹಜವಾಗಿಯೇ ಈ ಚಿತ್ರದ ಬಗ್ಗೆ ತುಂಬಾ ನಿರೀಕ್ಷೆ ಹುಟ್ಟಿಕೊಂಡಿದೆ. ರಮೇಶ್ ಅವರ 34 ವರ್ಷಗಳ ಸಿನೆಮಾ ಬದುಕಿನಲ್ಲಿ ಶಿವಾಜಿ ಸುರತ್ಕಲ್ 101ನೇ ಚಿತ್ರವಾಗಿದೆ. ನಿಗೂಢ ಕೊಲೆ ಪ್ರಕರಣವನ್ನು ಭೇದಿಸುವ ಪತ್ತೆದಾರಿ ಪೊಲೀಸ್ ಅಧಿಕಾರಿಯಾಗಿ ರಮೇಶ್ ಈ ಚಿತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಆಕಾಶ್ ಶ್ರೀವತ್ಸ ಚಿತ್ರದ ನಿರ್ದೇಶಕ.

  ರಮೇಶ್ ಅಭಿನಯದ ಇನ್ನೊಂದು ಚಿತ್ರ 100, ಸೈಬರ್ ಕ್ರೈಂ ಕುರಿತಾದ ಕಥಾ ವಸ್ತುವನ್ನು ಹೊಂದಿದೆ. ಈ ಚಿತ್ರದಲ್ಲಿ ರಮೇಶ್ ಸಾಕಷ್ಟು ಆ್ಯಕ್ಷನ್ ಹಾಗೂ ಫೈಟಿಂಗ್ ದೃಶ್ಯಗಳಲ್ಲಿ ಅಭಿನಯಿಸಲಿದ್ದಾರೆ. ಈವರೆಗೆ ಯಾವುದೇ ಚಿತ್ರಗಳಲ್ಲಿ ಆ್ಯಕ್ಷನ್ ದೃಶ್ಯಗಳಲ್ಲಿ ನಟಿಸಿರದ ರಮೇಶ್, 100 ಚಿತ್ರದ ಮೂಲಕ ಆ್ಯಕ್ಷನ್ ಹೀರೋ ಇಮೇಜ್ ಪಡೆದುಕೊಳ್ಳಲಿದ್ದಾರೆ.

ಸೈಬರ್ ಪೊಲೀಸ್ ಅಧಿಕಾರಿಗಳ ಬಾಡಿ ಲಾಂಗ್ವೆಜ್ ಅಧ್ಯಯನ ಮಾಡಲು ತಾನು ಸಾಕಷ್ಟು ಸಮಯ ತೆಗೆದುಕೊಂಡಿರುವುದಾಗಿಯೂ ರಮೇಶ್ ಹೇಳುತ್ತಾರೆ.

 ರಮೇಶ್ ಅಭಿನಯದ ಫೈಟಿಂಗ್ ಸನ್ನಿವೇಶಗಳನ್ನು ಖ್ಯಾತ ಸಾಹಸ ನಿರ್ದೇಶಕ ರವಿವರ್ಮಾ ಸಂಯೋಜಿಸಲಿದ್ದಾರೆ. ಬೈರಾದೇವಿಯಲ್ಲೂ ರಮೇಶ್ ದಕ್ಷ ಪೊಲೀಸ್ ಅಧಿಕಾರಿಯಾಗಿ ನಟಿಸುತ್ತಿದ್ದಾರೆ. ಅತಿಮಾನುಷ ಶಕ್ತಿಗಳ ಕುರಿತಾದ ಥ್ರಿಲ್ಲರ್ ಕಥೆಯನ್ನು ಹೊಂದಿರುವ ಈ ಚಿತ್ರಕ್ಕೆ ರಾಧಿಕಾ ಕುಮಾರಸ್ವಾಮಿ ನಾಯಕಿ.

‘ವಾರ್ತಾ ಭಾರತಿ’ ನಿಮಗೆ ಆಪ್ತವೇ ? ಇದರ ಸುದ್ದಿಗಳು ಮತ್ತು ವಿಚಾರಗಳು ಎಲ್ಲರಿಗೆ ಉಚಿತವಾಗಿ ತಲುಪುತ್ತಿರಬೇಕೇ? 

ಬೆಂಬಲಿಸಲು ಇಲ್ಲಿ  ಕ್ಲಿಕ್ ಮಾಡಿ

Comments (Click here to Expand)