varthabharthi


ವೈವಿಧ್ಯ

ರಂಜನ್ ಗೊಗೊಯಿ, ಎನ್‌ಆರ್‌ಸಿ ಹಾಗೂ ಮೋದಿ ಕಾಲದಲ್ಲಿ ನ್ಯಾಯಾಂಗದ ಕುರಿತು ಇನ್ನಷ್ಟು...

ವಾರ್ತಾ ಭಾರತಿ : 17 Mar, 2020
ಶಿವಸುಂದರ್

ಅಂತಿಮವಾಗಿ ಅವರು ಕಂಡುಕೊಂಡ ಸತ್ಯವೇನೆಂದರೆ ಕೇಂದ್ರ ಸರಕಾರದ ಪರವಾಗಿ ತೀರ್ಪು ನೀಡಿದ ಶೇ.90ಕ್ಕೂ ಹೆಚ್ಚು ನ್ಯಾಯಾಧೀಶರಿಗೆ ಆಯೋಗಗಳ, ನ್ಯಾಯ ಪಂಚಾಯತ್‌ಗಳ ಅಧ್ಯಕ್ಷ ಪದವಿ, ರಾಜ್ಯಪಾಲ, ರಾಯಭಾರಿ ಸ್ಥಾನಮಾನಗಳನ್ನು ನೀಡಿ ಗೌರವಿಸಲಾಗಿದೆ.

ಹೀಗಾಗಿಯೇ ಅರುಣ್ ಜೇಟ್ಲಿಯವರು ವಿರೋಧ ಪಕ್ಷದಲ್ಲಿದ್ದಾಗ ‘‘ಹಾಲಿ ನ್ಯಾಯಾಧೀಶರು ತಾವು ಮಾಜಿಯಾದಾಗ ಸಿಗುವ ಸ್ಥಾನಮಾನಗಳನ್ನು ಗಮನದಲ್ಲಿಟ್ಟುಕೊಂಡು ತೀರ್ಪು ನೀಡುತ್ತಾರೆ’’ ಎಂದು ಹೇಳಿದ್ದರು. ಹೀಗಾಗಿ ಈ ಭ್ರಷ್ಟತೆ ಕೇವಲ ವ್ಯಕ್ತಿಗತವಾದದ್ದಲ್ಲ. ಸಾಂಸ್ಥಿಕವಾದದ್ದು.

ನಿವೃತ್ತ ಮುಖ್ಯ ನ್ಯಾಯಮೂರ್ತಿ ರಂಜನ್ ಗೊಗೊಯಿ ಅವರನ್ನು ರಾಷ್ಟ್ರಪತಿಗಳು ರಾಜ್ಯಸಭೆಗೆ ನೇಮಕ ಮಾಡಿದ ನಂತರ ರಂಜನ್ ಗೊಗೊಯಿ ಮತ್ತು ನಮ್ಮ ನ್ಯಾಯಾಂಗದ ನ್ಯಾಯ ನಿಷ್ಠತೆಯ ಬಗ್ಗೆ ಸಾಕಷ್ಟು ಸಕಾರಣ ಅನುಮಾನಗಳು ಹುಟ್ಟಿಕೊಂಡಿವೆ. ಈ ಚರ್ಚೆಗೆ ಪೂರಕವಾಗಿ ಮತ್ತಷ್ಟು ವಿಷಯಗಳನ್ನು ನಿಮ್ಮ ಗಮನಕ್ಕೆ ತರಲು ಬಯಸುತ್ತೇನೆ.

1. ಇಂದು ಅಕ್ರಮ ವಲಸಿಗರನ್ನು ಹೊರಹಾಕುವ ಹೆಸರಲ್ಲಿ ಇಡೀ ಅಸ್ಸಾಮಿನ ಎಲ್ಲಾ ಮೂಲನಿವಾಸಿಗಳ ಪೌರತ್ವವನ್ನು ಪರಿಶೀಲಿಸುವ NRC ಎಂಬ ಅರಾಜಕತೆಗೆ ದೂಡಿದ್ದು ಇದೇ ರಂಜನ್ ಗೊಗೊಯಿ ಅವರ ನೇತೃತ್ವದ ಸುಪ್ರೀಂಕೋರ್ಟ್‌ನ ಪೀಠ.

ಅಸ್ಸಾಮಿನ ಮೂಲನಾಗರಿಕರು ಸಾಬೀತು ಮಾಡಲಾಗದಂತಹ ದಾಖಲೆಗಳನ್ನು ಕಡ್ಡಾಯ ಮಾಡಿದ್ದು ಸಹ ಇದೇ ನ್ಯಾಯಾಧೀಶರೇ. ಅಸ್ಸಾಮಿನ NRC ವಿಷಯದಲ್ಲಿ ರಂಜನ್ ಗೊಗೊಯಿ ಅವರು ತಾವೇ ಶಾಸಕಾಂಗ ಹಾಗೂ ಕಾರ್ಯಾಂಗವಾಗಿಯೂ ಕಾರ್ಯನಿರ್ವಹಿಸಿದ್ದರು!

ಪೌರತ್ವವನ್ನು ಸಾಬೀತು ಪಡಿಸಲು ರೇಷನ್ ಕಾರ್ಡ್, ವೋಟರ್ ಕಾರ್ಡ್‌ಗಳು ಸಾಲದು ಎಂದು ಗುವಾಹಟಿ ಹೈಕೋರ್ಟ್ ನೀಡಿದ ಅವಿವೇಕದ ತೀರ್ಪುಗಳನ್ನು ಹೆಚ್ಚಿನ ವಿಚಾರಣೆ ಇಲ್ಲದೆ ಎತ್ತಿ ಹಿಡಿದದ್ದು ಕೂಡಾ ಇವರ ಪೀಠವೇ.

ಹಾಗೆಯೇ ತಮ್ಮ ಹುಟ್ಟು ಹಾಗೂ ಬದುಕಿನ ಬಗ್ಗೆ ಯಾವ ದಾಖಲೆಗಳು ಇರದ ಅಸ್ಸಾಮಿನ ಮೂಲ ನಿವಾಸಿ ಮಹಿಳೆಯರ ಪೌರತ್ವ ಸಾಬೀತು ಪಡಿಸಲು ಅವರು ವಾಸಿಸುತ್ತಿದ್ದ ಹಳ್ಳಿಯ ಗ್ರಾಮಾಧಿಕಾರಿ ಕೊಡುವ ಹೇಳಿಕೆಯನ್ನು ಪೌರತ್ವ ಅಧಿಕಾರಿಗಳು ಅಮಾನ್ಯಗೊಳಿಸಿದಾಗ ಯಾವುದೇ ಬಗೆಯ ನ್ಯಾಯ ವಿವೇಚನೆಯನ್ನು ಬಳಸದೆ ಅದನ್ನು ಕೇವಲ ಮದುವೆಯಾದ ಮಹಿಳೆಯರಿಗೆ ಮಾತ್ರ ಸೀಮಿತಗೊಳಿಸಿದ್ದು ರಂಜನ್ ಗೊಗೊಯಿ ಅವರ ನ್ಯಾಯಪೀಠವೇ.

ಈಗ ಅಖಿಲ ಭಾರತ NRC ನಡೆದಲ್ಲಿ ರಂಜನ್ ಗೊಗೊಯಿ ಅವರ ಪೀಠ ಕೊಟ್ಟ ಈ ನ್ಯಾಯಾದೇಶಗಳೇ ಈ ದೇಶದ ಎಲ್ಲಾ ಜಾತಿ, ಧರ್ಮ ಹಾಗೂ ಸಮುದಾಯಗಳಿಗೆ ಸೇರಿದ ಎಲ್ಲ ಬಡವರು ಮತ್ತು ಹೆಂಗಸರು ತಮ್ಮ ಪೌರತ್ವವನ್ನು ಎಂದಿಗೂ ಸಾಬೀತು ಪಡಿಸದಂತೆ ಮಾಡಲಿದೆ. ಅವರೆಲ್ಲರ ಬದುಕನ್ನು ನರಕ ಮಾಡಲಿದೆ.

 2. ಹಾಗೆ ನೋಡಿದಲ್ಲಿ ತಮ್ಮದೇ ದೇಶದ ಜನತೆಯ ಪೌರತ್ವವನ್ನು ಅನುಮಾನಿಸಬೇಕೆಂದೂ ಹಾಗೂ ಹೊಟ್ಟೆಪಾಡಿಗೆ ಹೊರ ದೇಶದಿಂದ ವಲಸೆ ಬರುವವರನ್ನು ದೇಶದ ಮೇಲೆ ಆಕ್ರಮಣ ಮಾಡುವ ಶತ್ರುಗಳಂತೆ ಪರಿಗಣಿಸಬೇಕೆಂದು ಆದೇಶ ನೀಡಿದ್ದು ಸಹ ಇದೇ ಸುಪ್ರೀಂ ಕೋರ್ಟ್.

  2005ರಲ್ಲಿ ಆಗಿನ ಮುಖ್ಯ ನ್ಯಾಯಮೂರ್ತಿ ಲಾಹೋಟಿ, ಮಾಥುರ್ ಹಾಗೂ ಬಾಲಸುಬ್ರಹ್ಮಣ್ಯ ಅವರ ತ್ರಿಸದಸ್ಯ ಪೀಠವೇ ವಲಸೆಯನ್ನು ಶತ್ರುದೇಶಗಳ ಆಕ್ರಮಣವೆಂದು ಪರಿಗಣಿಸಬೇಕೆಂದು ತೀರ್ಪು ನೀಡಿತ್ತು ಹಾಗೂ ಅಸ್ಸಾಮಿನಲ್ಲಿ ಅಕ್ರಮ ವಲಸಿಗರನ್ನು ಪತ್ತೆ ಹಚ್ಚುವ ಕೆಲಸವನ್ನು ಫಾರಿನ್ ಟ್ರಿಬ್ಯುನಲ್ಸ್ ಕಾಯ್ದೆಯಡಿ ನಡೆಸಬೇಕೆಂದು ಆದೇಶಿಸಿತ್ತು.

 ಇದರ ಮೂಲಕ ತಾವು ವಿದೇಶಿಯರಲ್ಲವೆಂದು ಸಾಬೀತುಪಡಿಸಬೇಕಾದ ಹೊಣೆಗಾರಿಕೆಯನ್ನು ಬಂಧಿತರ ಮೇಲೆ ವರ್ಗಾಯಿಸಲಾಯಿತು. ಮಾತ್ರವಲ್ಲದೆ ಗಡಿಯೋಧರು ಮತ್ತು ಅಸ್ಸಾಂ ಪೊಲೀಸರು ಅಸ್ಸಾಮಿನಲ್ಲಿ ಯಾರನ್ನು ಬೇಕಾದರೂ ಅನುಮಾನಾಸ್ಪದ ವಿದೇಶೀಯ ಎಂದು ಪರಿಗಣಿಸಿ ಬಂಧಿಸುವ ಅಧಿಕಾರವನ್ನು ನೀಡಿದಂತಾಯಿತು. ಈ ಅವಿವೇಕ ಹಾಗೂ ಕ್ರೌರ್ಯಕ್ಕೆ ಈಗಲೂ ಬೆಲೆ ತೆರುತ್ತಿರುವವರು ಅಕ್ರಮ ವಲಸಿಗರಲ್ಲ. ಬದಲಿಗೆ ಅಮಾಯಕ ಹಾಗೂ ಅಸಹಾಯಕ ಅಸ್ಸಾಮಿಯರು.

3. ಬಲಪಂಥೀಯತೆ ಮತ್ತು ಮಾರುಕಟ್ಟೆ ಆರ್ಥಿಕತೆ ಉತ್ತುಂಗಕ್ಕೆ ತಲುಪಿರುವ ಈ ಹೊತ್ತಿನಲ್ಲಿ ಭಾರತದ ನ್ಯಾಯಾಂಗ ನಿಜಕ್ಕೂ ಭ್ರಷ್ಟಾತೀತವಾಗಿದೆಯೇ ಎಂಬ ಬಗ್ಗೆ ಸಿಂಗಾಪುರ ಹಾಗೂ ಹಾಂಕಾಂಗ್ ವಿಶ್ವವಿದ್ಯಾನಿಲಯದ ಪ್ರೊಫೆಸರುಗಳಾದ ಮಾಧವ್, ಶುಭಂಕರ್ ಹಾಗೂ ಜಿಯಾವನ್ನಿ ಕೋ ಅವರು ಒಂದು ಸುದೀರ್ಘ ಅಧ್ಯಯನ ಮಾಡಿದ್ದಾರೆ. ತಮ್ಮ ಅಧ್ಯಯನವನ್ನು ಅವರು . "Jobs For Justice (s)- Corruption In The Supreme Court Of India"  (http://www.mysmu.edu/faculty/madhavsa/research/judges.pdf) ಎಂಬ ಶೀರ್ಷಿಕೆಯಲ್ಲಿ 2017ರಲ್ಲಿ ಬಿಡುಗಡೆ ಮಾಡಿದ್ದಾರೆ. 1999-2014ರ ಅವಧಿಯಲ್ಲಿ ಸುಪ್ರೀಂಕೋರ್ಟ್‌ನಲ್ಲಿ ಕೇಂದ್ರ ಸರಕಾರವು ವಾದಿ ಅಥವಾ ಪ್ರತಿವಾದಿಯಾಗಿದ್ದ 2,605 ತೀರ್ಪುಗಳನ್ನು ಅವರು ಅಧ್ಯಯನ ಮಾಡಿದ್ದಾರೆ.

ಅವುಗಳಲ್ಲಿ ಕೇಂದ್ರ ಸರಕಾರದ ಪರವಾಗಿ ತೀರ್ಪು ನೀಡಿದ ಸುಪ್ರೀಂ ನ್ಯಾಯಮೂರ್ತಿಗಳಿಗೆ ನಿವೃತ್ತರಾದ ನಂತರ ಕೇಂದ್ರ ಸರಕಾರವು ಯಾವುದಾದರೂ ಪದವಿ, ಸ್ಥಾನಮಾನಗಳನ್ನು ನೀಡಿದೆಯೇ ಎಂಬುದು ಅವರ ಅಧ್ಯಯನದ ವಸ್ತು. ಅಂತಿಮವಾಗಿ ಅವರು ಕಂಡುಕೊಂಡ ಸತ್ಯವೇನೆಂದರೆ ಕೇಂದ್ರ ಸರಕಾರದ ಪರವಾಗಿ ತೀರ್ಪು ನೀಡಿದ ಶೇ.90ಕ್ಕೂ ಹೆಚ್ಚು ನ್ಯಾಯಾಧೀಶರಿಗೆ ಆಯೋಗಗಳ, ನ್ಯಾಯ ಪಂಚಾಯತಿಗಳ ಅಧ್ಯಕ್ಷ ಪದವಿ, ರಾಜ್ಯಪಾಲ, ರಾಯಭಾರಿ ಸ್ಥಾನಮಾನಗಳನ್ನು ನೀಡಿ ಗೌರವಿಸಲಾಗಿದೆ.

ಹೀಗಾಗಿಯೇ ಅರುಣ್ ಜೇಟ್ಲಿಯವರು ವಿರೋಧ ಪಕ್ಷದಲ್ಲಿದ್ದಾಗ ‘‘ಹಾಲಿ ನ್ಯಾಯಾಧೀಶರು ತಾವು ಮಾಜಿಯಾದಾಗ ಸಿಗುವ ಸ್ಥಾನಮಾನಗಳನ್ನು ಗಮನದಲ್ಲಿಟ್ಟುಕೊಂಡು ತೀರ್ಪು ನೀಡುತ್ತಾರೆ’’ ಎಂದು ಹೇಳಿದ್ದರು. ಹೀಗಾಗಿ ಈ ಭ್ರಷ್ಟತೆ ಕೇವಲ ವ್ಯಕ್ತಿಗತವಾದದ್ದಲ್ಲ. ಸಾಂಸ್ಥಿಕವಾದದ್ದು.

4. ಮೇಲಿನ ಅಧ್ಯಯನದಲ್ಲಿ NDA ಅವಧಿ 5 ವರ್ಷದ್ದಾದರೆ UPA ಅವಧಿ ಹತ್ತು ವರ್ಷದ್ದು. ಹೀಗಾಗಿ ಈ ಅವಧಿಯಲ್ಲಿ UPA ಯಿಂದ ಉಪಕೃತರಾದ ಸುಪ್ರೀಂ ನ್ಯಾಯಾಧೀಶರು ಜಾಸ್ತಿ.

ಆದರೆ 2014ರ ನಂತರದ ಅವಧಿಯಲ್ಲಿ ಇದೇ ಬಗೆಯ ಅಧ್ಯಯನ ನಡೆದರೆ ಆಮಿಷ ಮಾತ್ರವಲ್ಲದೆ ಭೀತಿಗೆ ಬಲಿಯಾದವರ ಹೊಸ ಕಾಲಮ್ಮು ಅಗತ್ಯ ಬಿದ್ದೀತು.

ಅಲ್ಲದೆ 2010ರ ನಂತರ ಟ್ರಿಬ್ಯುನಲ್‌ಗಳ ಸಂಖ್ಯೆ ಈಗ ಇನ್ನೂ ಹೆಚ್ಚಾಗಿರುವುದರಿಂದ ಬಲಿಯಾದವರ ಸಂಖ್ಯೆ ಇನ್ನು ಹೆಚ್ಚೇ ಇದ್ದಿತು!

5. ಮೋದಿ ಅವಧಿಯಲ್ಲಿ ನ್ಯಾಯಾಂಗ ಎದುರಿಸುತ್ತಿರುವುದು ಕೇವಲ ಸಾಂಸ್ಥಿಕ ಭ್ರಷ್ಟಾಚಾರದ ಸಮಸ್ಯೆಯನ್ನು ಮಾತ್ರವಲ್ಲ. ಅದರ ಜೊತೆಜೊತೆಗೆ ಇಂದು ಮೇಲಿನ ಕೋರ್ಟ್‌ಗಳಲ್ಲಿ ನ್ಯಾಯಾಧೀಶರಾಗಿ ನೇಮಕಗೊಳ್ಳುವವರನ್ನು ದೇಶದ ಬೇಹುಗಾರಿಕೆ ಇಲಾಖೆಯು ಕೂಡ ಶಿಫಾರಸು ಮಾಡಬೇಕೆಂಬುದನ್ನು ಮೊನ್ನೆ ಸದನದಲ್ಲಿ ಸ್ಮತಿ ಇರಾನಿಯವರೇ ಹೇಳಿದ್ದಾರೆ.

 ಇದರಿಂದಾಗಿ ಉನ್ನತ ನ್ಯಾಯಾಲಯಗಳ ನ್ಯಾಯಾಧೀಶರಾಗಲು ಬಲಪಂಥೀಯರಾಗಿರಬೇಕಿರುವುದು ಮತ್ತು ಮೋದಿ ಮಂಡಳಿ ಸದಸ್ಯರಾಗಿರಬೇಕಿರುವುದು ಕಡ್ಡಾಯವಾಗುತ್ತಿದೆ.

ಆದ್ದರಿಂದಲೇ ಹಾಲಿ ನ್ಯಾಯಾಧೀಶರಾದ ಅರುಣ್ ಮಿಶ್ರಾ ಒಂದು ಅಂತರ್‌ರಾಷ್ಟ್ರೀಯ ಸಮ್ಮೇಳನದಲ್ಲಿ ಪ್ರಧಾನಿ ಮೋದಿಯನ್ನು ಹಾಡಿ ಹೊಗಳುವುದು ಮತ್ತು ಅದೇ ನ್ಯಾಯಾಧೀಶರೇ ಆನಂದ್ ತೇಲ್ತುಂಬ್ಡೆ ಹಾಗೂ ಗೌತಮ್ ನವ್ಲಾಖಾರಂತಹ ಧೀಮಂತ ಮೋದಿ ಟೀಕಾಕಾರರಿಗೆ ಜಾಮೀನು ನಿರಾಕರಿಸುವುದು ಆಶ್ಚರ್ಯವೇನಲ್ಲ.

ಅಥವಾ ಆದರ್ಶ್ ಕುಮಾರ್ ಗೋಯಲ್‌ರಂತಹ ಆರೆಸ್ಸೆಸ್‌ನ ಕಾರ್ಯಕರ್ತರಿಗೆ ಅರ್ಹತೆಯನ್ನು ಮೀರಿ ಸುಪ್ರೀಂ ನ್ಯಾಯಾಧೀಶ ಸ್ಥಾನ ಕೊಡುವುದು, ಅವರು ದೌರ್ಜನ್ಯ ತಡೆ ಕಾಯ್ದೆಗೆ ತಿದ್ದುಪಡಿ ಮಾಡುವುದು ಹಾಗೂ ಅದಕ್ಕಾಗಿ ಅವರು ನಿವೃತ್ತರಾದ ಕೂಡಲೇ ಮೋದಿ ಸರಕಾರ ಅವರನ್ನು ರಾಷ್ಟ್ರೀಯ ಹಸಿರು ಪೀಠದ ಅಧ್ಯಕ್ಷರನ್ನಾಗಿ ವಾಡಿ ಗೌರವಿಸುವುದು ನಡೆಯುತ್ತದೆ.

6. ಈ ಎಲ್ಲಾ ಹಿನ್ನೆಲೆಯಲ್ಲಿ ಮೋದಿತ್ವವನ್ನು ನ್ಯಾಯಾಂಗದಲ್ಲಿ ಅನುಷ್ಠಾನಗೊಳಿಸಿದ ನಿವೃತ್ತ ನ್ಯಾಯಮೂರ್ತಿ ರಂಜನ್ ಗೊಗೊಯಿ ರಾಜ್ಯಸಭಾ ಸದಸ್ಯರಾಗಿ ನೇಮಕಗೊಳ್ಳುವುದರಲ್ಲಿ ಯಾವುದೇ ಆಶ್ಚರ್ಯವಿಲ್ಲ.

ಇದು ಅವರು ಹಿಂದೆ ಮಾಡಿದ ಸೇವೆಗೆ ಸಂದ ಗೌರವ ಮಾತ್ರವಲ್ಲ. ಮುಂದೆಯೂ ಮಾಡಲಿರುವ ಮೋದಿತ್ವದ ಸೇವೆಗೆ ಆಗಿರುವ ನೇಮಕಾತಿ ಎಂಬುದನ್ನು ಮರೆಯದಿರೋಣ.

ಹಾಗೆಯೇ ಈ ಅಧಃಪತನ ಕೇವಲ ವ್ಯಕ್ತಿಯದ್ದು ಮಾತ್ರವಲ್ಲ. ಮೋದಿತ್ವದ ಅವಧಿಯಲ್ಲಿ ಎಲ್ಲಾ ಪ್ರಜಾತಾಂತ್ರಿಕ ಸಂಸ್ಥೆಗಳ ಬಲಪಂಥೀಯರ ಕೈವಶವಾಗುತ್ತಿರುವ ಸಂಕೇತವೂ ಹೌದು...

‘ವಾರ್ತಾ ಭಾರತಿ’ ನಿಮಗೆ ಆಪ್ತವೇ ? ಇದರ ಸುದ್ದಿಗಳು ಮತ್ತು ವಿಚಾರಗಳು ಎಲ್ಲರಿಗೆ ಉಚಿತವಾಗಿ ತಲುಪುತ್ತಿರಬೇಕೇ? 

ಬೆಂಬಲಿಸಲು ಇಲ್ಲಿ  ಕ್ಲಿಕ್ ಮಾಡಿ

Comments (Click here to Expand)