ಅಸೌಖ್ಯದಲ್ಲೂ ಮ್ಯಾಚ್ ವಿನ್ನಿಂಗ್ ಆಟ ಆಡಿದ್ದ ಯುವರಾಜ್ ಸಿಂಗ್
ಹೊಸದಿಲ್ಲಿ, ಮಾ.20: ಭಾರತದ ಕ್ರಿಕೆಟ್ ತಂಡದ ಮಾಜಿ ಆಲ್ರೌಂಡರ್ ಯುವರಾಜ್ ಸಿಂಗ್ ಅಸೌಖ್ಯದಲ್ಲೂ ವಿಶ್ವಕಪ್ನಲ್ಲಿ ಆಡಿದ್ದ ಸಾಹಸದ ಆಟಕ್ಕೆ ಶುಕ್ರವಾರ 9 ವರ್ಷ ತುಂಬಿದೆ.
ಯುವಿ 2011, ಮಾರ್ಚ್ 20 ರಂದು 50 ಓವರ್ಗಳ ವಿಶ್ವಕಪ್ನ ಗ್ರೂಪ್ ಹಂತದ ಪಂದ್ಯದಲ್ಲಿ ವೆಸ್ಟ್ ಇಂಡೀಸ್ ವಿರುದ್ದ 113 ರನ್(10ಬೌ, 2ಸಿ) ಗಳಿಸಿ ತಂಡಕ್ಕೆ 268 ರನ್ಸೇರಿಸಲು ನೆರವಾಗಿದ್ದರು.
ಟಾಸ್ ಜಯಿಸಿದ್ದ ಭಾರತ ಬ್ಯಾಟಿಂಗ್ ಆಯ್ದುಕೊಂಡಿತ್ತು. ಭಾರತ 51ಕ್ಕೆ 2 ವಿಕೆಟ್ಗಳನ್ನು ಕಳೆದುಕೊಂಡು ಸಂಕಷ್ಟದಲ್ಲಿ ಸಿಲುಕಿಕೊಂಡಿದ್ದಾಗ ವಿರಾಟ್ ಕೊಹ್ಲಿಗೆ ಜೊತೆಯಾಗಿ ಯುವಿ ಇನಿಂಗ್ಸ್ ಕಟ್ಟಿದ್ದರು. ಇವರು ಮೂರನೇ ವಿಕೆಟ್ಗೆ 122 ರನ್ಗಳ ಜೊತೆಯಾಟ ನೀಡಿದ್ದರು. ಇದು ಭಾರತದ ಹಲವು ಉತ್ತಮ ಇನಿಂಗ್ಸ್ ಗಳ ಪೈಕಿ ಒಂದೆನಿಸಿಕೊಂಡಿದೆ. ಕೊಹ್ಲಿ 59 ರನ್ ಗಳಿಸಿ ಔಟಾಗಿದ್ದರು. ಆದರೆ ಯುವರಾಜ್ ಸಿಂಗ್ ಆಟ ಮುಂದುವರಿಸಿ ಶತಕ ದಾಖಲಿಸಿದ್ದರು.
ಯುವರಾಜ್ಗೆ ಅಸೌಖ್ಯದ ನಡುವೆ ಬ್ಯಾಟಿಂಗ್ ನಡೆಸುವುದು ಸವಾಲಾಗಿತ್ತು. ಆಡುವಾಗ ಹಲವು ಬಾರಿ ವಾಂತಿಯಾಗಿತ್ತು. ಆದರೆ ಅವರು ಈ ಕಾರಣಕ್ಕಾಗಿ ತನ್ನ ಆಟದಿಂದ ಹಿಂದೆ ಸರಿಯಲಿಲ್ಲ. ಕ್ರೀಡಾಭಿಮಾನಿಗಳಿಗೆ ಅವರ ಆಟ ನೆನಪಿನಲ್ಲಿ ಅಚ್ಚಳಿಯದೆ ಇಂದಿಗೂ ಉಳಿದುಕೊಂಡಿದೆ. ಆಲ್ರೌಂಡರ್ ಯುವರಾಜ್ ಬ್ಯಾಟಿಂಗ್ನಲ್ಲಿ ಮಿಂಚಿದ್ದು ಮಾತ್ರವಲ್ಲದೆ ಬೌಲಿಂಗ್ನಲ್ಲೂ ತನ್ನ ಕೈಚಳಕ ಪ್ರದರ್ಶಿಸಿದರು. ವಿಂಡೀಸ್ನ ಡೆವೊನ್ ಥಾಮಸ್ ಮತ್ತು ಆ್ಯಂಡ್ರೆ ರಸೆಲ್ ವಿಕೆಟ್ ಉಡಾಯಿಸಿದರು. ಭಾರತ ಈ ಪಂದ್ಯದಲ್ಲಿ 80 ರನ್ಗಳ ಭರ್ಜರಿ ಜಯ ಗಳಿಸಿತ್ತು.
2011ರ ವಿಶ್ವಕಪ್ ಯುವಿ ಪಾಲಿಗೆ ಸ್ಮರಣೀಯವಾಗಿದೆ. ಟೂರ್ನಿಯಲ್ಲಿ ಒಟ್ಟು 362 ರನ್ ಮತ್ತು 15 ವಿಕೆಟ್ ಪಡೆದಿದ್ದರು. ಭಾರತ ವಿಶ್ವಕಪ್ ಗೆಲ್ಲುವಲ್ಲಿ ಪ್ರಮುಖ ಪಾತ್ರ ವಹಿಸಿದ್ದ ಯುವರಾಜ್ ಸರಣಿಶ್ರೇಷ್ಠ ಪ್ರಶಸ್ತಿಗೆ ಭಾಜನರಾಗಿದ್ದರು.