ಸಾಲದ ಕಂತು ವಿನಾಯಿತಿ ಹೆಸರಲ್ಲಿ ಸಾವಿರಾರು ರೂ. ದೋಚುತ್ತಿದ್ದಾರೆ....ಎಚ್ಚರ !
ಸಾಂದರ್ಭಿಕ ಚಿತ್ರ
ಬೆಂಗಳೂರು, ಎ.5: ಕೊರೋನ ಸೋಂಕು ತಡೆಗಟ್ಟುವ ನಿಟ್ಟಿನಲ್ಲಿ ರಾಷ್ಟ್ರವ್ಯಾಪಿ ಲಾಕ್ಡೌನ್ ಘೋಷಿಸಿರುವ ಹಿನ್ನೆಲೆ ಭಾರತೀಯ ರಿಸರ್ವ್ ಬ್ಯಾಂಕ್(ಆರ್ ಬಿಐ) ಗೃಹ ಮತ್ತು ವಾಹನ ಸಾಲ ಸೇರಿ ವಿವಿಧ ಸಾಲಗಳಿಗೆ 3 ತಿಂಗಳ ಕಾಲ ಇಎಂಐ ಪಾವತಿಗೆ ವಿನಾಯಿತಿ ನೀಡಬೇಕೆಂದು ಎಲ್ಲ ಬ್ಯಾಂಕ್ಗಳಿಗೂ ಸೂಚಿಸಿದೆ.
ಕೆಲ ಬ್ಯಾಂಕ್ಗಳು ಇದನ್ನು ಕಡ್ಡಾಯವಾಗಿ ಜಾರಿಗೊಳಿಸಿದರೆ, ಇನ್ನು ಕೆಲವು ಬ್ಯಾಂಕ್ಗಳು ಗ್ರಾಹಕರ ಅಭಿಪ್ರಾಯಕ್ಕೆ ಬಿಟ್ಟಿವೆ. ಆದರೆ, ಈ ಪ್ರಕ್ರಿಯೆಯನ್ನು ದುರುಪಯೋಗಪಡಿಸಿಕೊಂಡು ಸೈಬರ್ ಕಳ್ಳರು ಗ್ರಾಹಕರ ಬ್ಯಾಂಕಿನ ನಗದು ಕಳವು ಮಾಡುವ ಆತಂಕ ಮನೆ ಮಾಡಿದೆ. ನಿರ್ದಿಷ್ಟ ಗ್ರಾಹಕರನ್ನು ಸಂಪರ್ಕಿಸುತ್ತಿರುವ ಸೈಬರ್ ಕಳ್ಳರು, ಬ್ಯಾಂಕ್ ಖಾತೆಗಳಿಗೆ ಸಂಬಂಧಪಟ್ಟಂತೆ ವಿವರ ಪಡೆದು, ಖಾತೆಗಳಿಂದ ಹಣ ದೋಚುತ್ತಿದ್ದಾರೆ. ಈ ಸಂಬಂಧ ಹಲವು ದೂರುಗಳು ಸೈಬರ್ ಕ್ರೈಂ ಪೊಲೀಸ್ ಠಾಣೆಗಳಲ್ಲಿ ದಾಖಲಾಗುತ್ತಿದೆ ಎಂದು ವರದಿಯಾಗಿದೆ.
ಈ ಕುರಿತು ರವಿವಾರ ಟ್ವೀಟ್ ಮಾಡಿರುವ ಐಪಿಎಸ್ ಅಧಿಕಾರಿ ಡಿ.ರೂಪಾ, ಬ್ಯಾಂಕ್ ಇಎಂಐ ಹೆಸರಿನಲ್ಲಿ ಮೊಬೈಲ್ ಮೂಲಕ ಸಂಪರ್ಕಿಸಿ ಯಾರಾದರೂ ನಿಮ್ಮ ಖಾತೆ ವಿವರ ಹಾಗೂ ಒಟಿಪಿ ಕೇಳಿದರೆ, ನೀಡಬಾರದು ಎಂದು ಸಲಹೆ ನೀಡಿದ್ದಾರೆ.
There's is a new cyber fraud that's come to light. Modus operandi is,customers get calls requesting for OTP to postpone their EMI. Once OTP is shared,amount is withdrawn. Requesting all to spread this message .@CyberDost .@CybercrimeCID .@KarnatakaVarthe .@BlrCityPolice .@bommai
— D Roopa IPS (@D_Roopa_IPS) April 5, 2020