ಮಾತೃಪೂರ್ಣ-ಪುಷ್ಠಿ ಯೋಜನೆಗಳಡಿ ಮನೆ ಬಾಗಿಲಿಗೆ ಆಹಾರ ಧಾನ್ಯ: 48.29 ಲಕ್ಷ ಫಲಾನುಭವಿಗಳಿಗೆ ಆಹಾರ ಪದಾರ್ಥ ವಿತರಣೆ
ಬೆಂಗಳೂರು, ಮೇ 9: ಮಾತೃಪೂರ್ಣ, ಪುಷ್ಠಿ ಸೇರಿದಂತೆ ವಿವಿಧ ಯೋಜನೆಗಳಡಿ ರಾಜ್ಯದ 48.29 ಲಕ್ಷ ಫಲಾನುಭವಿಗಳಿಗೆ ಆಹಾರ ಪದಾರ್ಥವನ್ನು ಮಹಿಳಾ ಮತ್ತು ಮಕ್ಕಳ ಅಭಿವೃದ್ಧಿ ಇಲಾಖೆಯು ಅಂಗನವಾಡಿ ಕಾರ್ಯಕರ್ತೆಯರ ಮೂಲಕ ಮನೆ ಬಾಗಿಲಿಗೆ ತಲುಪಿಸಿದೆ.
ಕೊರೋನ ವೈರಸ್ ಭೀತಿ ಹಿನ್ನೆಲೆ ಲಾಕ್ಡೌನ್ ಘೋಷಿಸಲಾಗಿದ್ದು, ಮಹಿಳೆಯರು ಮತ್ತು ಮಕ್ಕಳ ಅಪೌಷ್ಟಿಕತೆ ನಿವಾರಿಸಲು ಇಲಾಖೆಯಿಂದ ಮನೆ ಬಾಗಿಲಿಗೆ ಆಹಾರ ಪದಾರ್ಥಗಳ ಕಿಟ್ಅನ್ನು ವಿತರಿಸಲಾಗಿದೆ.
6 ತಿಂಗಳಿಂದ 3 ವರ್ಷದ 22.59 ಲಕ್ಷ ಮಕ್ಕಳು, 3 ವರ್ಷದಿಂದ 6 ವರ್ಷದ 16.04 ಲಕ್ಷ ಮಕ್ಕಳು, 4.19 ಲಕ್ಷ ಗರ್ಭಿಣಿಯರು, 4.02 ಲಕ್ಷ ಬಾಣಂತಿಯರು, 1.28 ಲಕ್ಷ ಅಂಗನವಾಡಿ ಕಾರ್ಯಕರ್ತೆಯರು ಹಾಗೂ ಸಹಾಯಕಿಯರು ಸೇರಿ ಒಟ್ಟಾರೆ 48 ಲಕ್ಷಕ್ಕೂ ಅಧಿಕ ಫಲಾನುಭವಿಗಳಿಗೆ ಆಹಾರ ಪದಾರ್ಥ ಒಳಗೊಂಡ ಕಿಟ್ ವಿತರಿಸಲಾಗಿದೆ.
ಕಿಟ್ನಲ್ಲಿ ಏನಿರುತ್ತದೆ?: ಅಂಗನವಾಡಿ ಮಕ್ಕಳಿಗೆ 15 ದಿನಕ್ಕೆ ಆಗುವಷ್ಟು ಆಹಾರಧಾನ್ಯ ಇರುವ ಕಿಟ್ನಲ್ಲಿ 4 ಮೊಟ್ಟೆ, 150 ಗ್ರಾಂ ಹಾಲಿನ ಪುಡಿ, 1.5 ಕೆ.ಜಿ. ಅಕ್ಕಿ, 600 ಗ್ರಾಂ ಬೇಳೆ, 100 ಗ್ರಾಂ ಪಾಕಿಟ್ನ ಹೆಸರುಕಾಳು ಸೇರಿದಂತೆ ವಿವಿಧ ಪೌಷ್ಠಿಕ ಆಹಾರ ಹೊಂದಿರಲಿದೆ. 6 ತಿಂಗಳಿಂದ 3 ವರ್ಷದೊಳಗಿನ ಮಕ್ಕಳಿಗೂ ಆಹಾರ ಪದಾರ್ಥ ಕಿಟ್ ನೀಡಲಿದ್ದು, ಅದರಲ್ಲಿ ಹಾಲಿನ ಪುಡಿ, ಪೌಷ್ಟಿಕಾಂಶ ಮತ್ತು ಕಬ್ಬಿಣಾಂಶ ಹೊಂದಿರುವ ಕಾಳುಗಳು ಇರಲಿವೆ. ಗರ್ಭಿಣಿಯರು ಹಾಗೂ ಬಾಣಂತಿಯರಿಗೆ ಅಕ್ಕಿ, ಬೇಳೆ, ಶೇಂಗಾ, ಒಣಮೆಣಸಿನಕಾಯಿ ಪುಡಿ ಸೇರಿ ಇನ್ನಿತರೆ ಪದಾರ್ಥಗಳಿರಲಿವೆ.
ಎಷ್ಟು ದಿನದವರೆಗೆ ಕಿಟ್ ವಿತರಣೆ?: ಲಾಕ್ಡೌನ್ ಘೋಷಣೆ ಎಲ್ಲಿಯವರೆಗೆ ಇರಲಿದೆ ಅಲ್ಲಿಯವರೆಗೂ ಆಹಾರ ಪದಾರ್ಥಗಳನ್ನು ನೀಡಲಾಗುತ್ತದೆ. ಪ್ರಸ್ತುತ ಮೇ 17ರವರೆಗೆ ವಿತರಿಸಲಾಗುತ್ತಿದ್ದು, ಒಂದು ವೇಳೆ ಲಾಕ್ಡೌನ್ ಮುಂದುವರಿದರೆ ಮುಂದಿನ ದಿನಗಳಲ್ಲಿಯೂ ಯೋಜನೆ ಮುಂದುವರಿಯುವ ಸಾಧ್ಯತೆ ಇದೆ ಎಂದು ಮಹಿಳಾ ಮತ್ತು ಮಕ್ಕಳ ಅಭಿವೃದ್ಧಿ ಇಲಾಖೆ ಅಧಿಕಾರಿ ತಿಳಿಸಿದ್ದಾರೆ.
60 ದಿನಕ್ಕೆ ಆಗುವಷ್ಟು ಆಹಾರ ಪದಾರ್ಥ ವಿತರಣೆ: ಲಾಕ್ಡೌನ್ ಘೋಷಣೆ ಆದ ದಿನದಿಂದ ಇಲ್ಲಿಯವರೆಗೆ ಆಹಾರ ಪದಾರ್ಥ ಕಿಟ್ ವಿತರಿಸಲಾಗಿದೆ. ಈವರಗೆ 40 ದಿನಕ್ಕಾಗುವಷ್ಟು ಆಹಾರಧಾನ್ಯ ವಿತರಿಸಲಾಗಿದ್ದು, ಇನ್ನೂ 20 ದಿನಕ್ಕಾಗುವಷ್ಟು ಪದಾರ್ಥ ವಿತರಿಸಲಿದ್ದಾರೆ. ಒಟ್ಟಾರೆ 60 ದಿನಕ್ಕಾಗುವಷ್ಟು ಪದಾರ್ಥ ವಿತರಣೆಯಾಗಲಿದೆ. ಇದಕ್ಕೂ ಒಂದು ಮಾನದಂಡವಿದೆ. ಪ್ರತಿದಿನ ಬಾಣಂತಿಯರಿಗೆ ಮಾತೃಪೂರ್ಣ ಯೋಜನೆಯಡಿ 21 ರೂ. ಆಹಾರ ವೆಚ್ಚವಾಗಲಿದ್ದು ಈ ಮೊತ್ತದಲ್ಲಿ ಆಹಾರಧಾನ್ಯ ವಿತರಿಸಲಿದ್ದಾರೆ.
ಅಪೌಷ್ಟಿಕತೆ ನಿವಾರಣೆಗಾಗಿ ಮಕ್ಕಳಿಗೆ ಮೊಟ್ಟೆ, ಕಾಳು: ಪ್ರತಿದಿನ ಮಕ್ಕಳನ್ನು ಅಂಗನವಾಡಿಗೆ ಕರೆದುಕೊಂಡು ಬಂದು ಮಕ್ಕಳಿಗೆ ಕಥೆಗಳು ಹೇಳಲಿದ್ದಾರೆ. ಮಧ್ಯಾಹ್ನ ಹಾಲು ಮತ್ತು ಬಿಸಿಯೂಟ ನೀಡುತ್ತಾರೆ. ಆದರೆ, ಲಾಕ್ಡೌನ್ನಿಂದಾಗಿ ಅಂಗನವಾಡಿಗಳನ್ನು ತಾತ್ಕಾಲಿಕವಾಗಿ ಬಂದ್ ಮಾಡಲಾಗಿದ್ದು, ಇದೇ ವೆಚ್ಚದಲ್ಲಿ ಮೊಟ್ಟೆ, ಹಾಲಿನ ಪುಡಿ ಸೇರಿದಂತೆ ಇತರೆ ಪದಾರ್ಥ ವಿತರಿಸಲಿದ್ದಾರೆ.
ಎಷ್ಟು ಮತ್ತು ಯಾರು ಫಲಾನುಭವಿಗಳು ?
* 6 ತಿಂಗಳಿಂದ 3 ವರ್ಷದ ಮಕ್ಕಳು- 22.59 ಲಕ್ಷ.
* 3 ವರ್ಷದಿಂದ 6 ವರ್ಷದ ಮಕ್ಕಳು- 16.04 ಲಕ್ಷ.
* ಗರ್ಭಿಣಿಯರು- 4.19 ಲಕ್ಷ.
* ಬಾಣಂತಿಯರು- 4.02 ಲಕ್ಷ.
* ಅಂಗನವಾಡಿಕಾರ್ಯಕರ್ತೆಯರು ಹಾಗೂ ಸಹಾಯಕಿಯರು- 1.28 ಲಕ್ಷ.
* ಇತರೆ- 17 ಸಾವಿರ.
ಮಹಿಳೆಯರು ಮತ್ತು ಮಕ್ಕಳ ಅಪೌಷ್ಟಿಕತೆ ನಿವಾರಣೆಗೆ ಇಲಾಖೆಯು ಫಲಾನುಭವಿಗಳ ಮನೆ ಮನೆಗೆ ಆಹಾರಧಾನ್ಯ ವಿತರಿಸಲು ಆರಂಭಿಸಿದ್ದು, ಸುಮಾರು 48 ಲಕ್ಷಕ್ಕೂ ಅಧಿಕ ಫಲಾನುಭವಿಗಳಿಗೆ ಅಂಗನವಾಡಿ ಕಾರ್ಯಕರ್ತೆಯರು ಕಿಟ್ ವಿತರಿಸಿದ್ದಾರೆ. ಈ ಮೂಲಕ ಅತ್ಯುತ್ತಮ ಕಾರ್ಯಕ್ಕೆ ಕಾರ್ಯಕರ್ತೆಯರು ಸಾಕ್ಷಿಯಾಗಿದ್ದಾರೆ.
-ಕೆ.ಎ. ದಯಾನಂದ, ಮಹಿಳಾ ಮತ್ತು ಮಕ್ಕಳ ಅಭಿವೃದ್ಧಿ ಇಲಾಖೆಯ ರಾಜ್ಯ ನಿರ್ದೇಶಕ