varthabharthi



ಕ್ರೀಡೆ

ಫ್ರೆಂಚ್ ಓಪನ್ ಮುಚ್ಚಿದ ಬಾಗಿಲುಗಳ ಹಿಂದೆ ನಡೆಯುವ ಸಾಧ್ಯತೆ

ವಾರ್ತಾ ಭಾರತಿ : 11 May, 2020

ಪ್ಯಾರಿಸ್, ಮೇ 11: ಫ್ರೆಂಚ್ ಓಪನ್ ಗ್ರ್ಯಾಂಡ್ ಸ್ಲಾಮ್ ಟೆನಿಸ್ ಟೂರ್ನಿಯನ್ನು ಸೆಪ್ಟಂಬರ್ 20ರಿಂದ ಅಕ್ಟೋಬರ್4ರ ತನಕ ಮುಂದೂಡುವ ಏಕಪಕ್ಷೀಯ ನಿರ್ಧಾರದ ಬಗ್ಗೆ ಎಫ್‌ಎಫ್‌ಟಿಗೆ ‘‘ಯಾವುದೇ ಪಶ್ಚಾತ್ತಾಪವಿಲ್ಲ’’ ಎಂದು ಫ್ರೆಂಚ್ ಟೆನಿಸ್ ಮುಖ್ಯಸ್ಥ ಬರ್ನಾರ್ಡ್ ಗೈಡಿಸೆಲ್ಲಿ ಹೇಳಿದ್ದಾರೆ.

 ಕೊರೋನ ವೈರಸ್ ಸಾಂಕ್ರಾಮಿಕ ರೋಗದಿಂದಾಗಿ ಈಗಾಗಲೇ ನಾಲ್ಕು ತಿಂಗಳು ಮುಂದೂಡಲ್ಪಟ್ಟಿರುವ ಫ್ರೆಂಚ್ ಓಪನ್ ಮುಚ್ಚಿದ ಬಾಗಿಲುಗಳ ಹಿಂದೆ ನಡೆಯ ಬಹುದು ಎಂದು ಬರ್ನಾರ್ಡ್ ಗೈಡಿಸೆಲ್ಲಿ ರವಿವಾರ ಅಭಿಪ್ರಾಯಪಟ್ಟರು.

ಎಲ್ಲಾ ಆಯ್ಕೆಗಳು ನಮ್ಮ ಮುಂದೆ ಇದೆ. ನಾವು ಯಾವುದೇ ಆಯ್ಕೆಯನ್ನು ತಳ್ಳಿಹಾಕಿಲ್ಲ ಎಂದು ಅವರು ಜರ್ನಲ್ ಡು ಡಿಮಾಂಚೆಗೆ ತಿಳಿಸಿದರು.

‘‘ಕ್ರೀಡಾಂಗಣದಲ್ಲಿ ಪಂದ್ಯಾವಳಿ ನಡೆಯಲಿದೆ ಮತ್ತು ಇದೇ ವೇಳೆ ಟಿವಿ ಪರದೆಗಳಲ್ಲಿ ಪಂದ್ಯಾವಳಿಯ ನೇರ ಪ್ರಸಾರ ನಡೆಯಲಿದೆ . ವಿಶ್ವದಾದ್ಯಂತ ಲಕ್ಷಾಂತರ ವೀಕ್ಷಕರು ಕಾಯುತ್ತಿದ್ದಾರೆ. ಮುಚ್ಚಿದ ಬಾಗಿಲುಗಳ ಹಿಂದೆ ಅದನ್ನು ಸಂಘಟಿಸುವುದರಿಂದ ವ್ಯಾಪಾರ ಮಾದರಿಯ ಒಂದು ಭಾಗ - ಟೆಲಿವಿಷನ್ ಹಕ್ಕುಗಳಿಗೆ ಮುಂದೆ ಹೋಗಲು ಅನುವು ಮಾಡಿಕೊಡುತ್ತದೆ. ಇದನ್ನು ಕಡೆಗಣಿಸಲಾಗುವುದಿಲ್ಲ’’ ಎಂದು ಹೇಳಿದರು.

ಕೊರೋನ ವೈರಸ್ ಸೋಂಕು ಹರಡು ವಿಕೆಯ ಕಾರಣದಿಂದಾಗಿ ಮಾರ್ಚ್ ಮಧ್ಯ ದಿಂದ ಎಲ್ಲಾ ಟೆನಿಸ್ ಚಟುವಟಿಕೆಗಳು ಸ್ಥಗಿತಗೊಂಡಿವೆ ಮತ್ತು ಜುಲೈ 13 ರವರೆಗೆ ಶೀಘ್ರವಾಗಿ ಪುನರಾರಂಭಗೊಳ್ಳುವುದಿಲ್ಲ ಎಂದು ಹೇಳಲಾಗುತ್ತಿದೆ.

ಎರಡನೇ ವಿಶ್ವಯುದ್ಧದ ನಂತರ ಮೊದಲ ಬಾರಿಗೆ ವಿಂಬಲ್ಡನ್ ರದ್ದಾಗಿದೆ.ಆಗಸ್ಟ್ 31 ರಿಂದ ಸೆಪ್ಟೆಂಬರ್ 13 ರವರೆಗೆ ನ್ಯೂಯಾರ್ಕ್ ನಲ್ಲಿ ನಡೆಯಲಿರುವ ಯುಎಸ್ ಓಪನ್ ಭವಿಷ್ಯಕ್ಕೆ ಕತ್ತಲು ಆವರಿಸಿದೆ. ಸಂಘಟಕರು ಜೂನ್ ಮಧ್ಯದಲ್ಲಿ ನಿರ್ಧಾರ ತೆಗೆದುಕೊಳ್ಳುವ ಸಾಧ್ಯತೆ ಇದೆ. ಪ್ರತಿವರ್ಷ ಸುಮಾರು 5,00,000 ಅಭಿಮಾನಿಗಳು ಫ್ರೆಂಚ್ ಓಪನ್ ಟೆನಿಸ್ ಟೂರ್ನಿಗೆ ನಿಯಮಿತವಾಗಿ ಹಾಜರಾಗುತ್ತಾರೆ.

ಆದಾಗ್ಯೂ, 2020ರ ಆವೃತ್ತಿಯ ಬಗ್ಗೆ ಒಂದು ನಿರ್ಧಾರ ಹೊರಬಂದಿದ್ದು, ಪಂದ್ಯಾವಳಿಗೆ ಮೂಲ ದಿನಾಂಕಕ್ಕಾಗಿ ಖರೀದಿಸಿದ ಎಲ್ಲಾ ಟಿಕೆಟ್‌ಗಳನ್ನು ವರ್ಗಾವಣೆ ಮಾಡುವ ಬದಲು ಟಿಕೆಟ್ ಹಣ ಮರುಪಾವತಿ ಮಾಡಲು ಎಫ್‌ಎಫ್‌ಟಿ ನಿರ್ಧರಿಸಿದೆ.

‘‘ನಾನು ಎಟಿಪಿ ಅಧ್ಯಕ್ಷ ಆಂಡ್ರಿಯಾ ಗೌಡೆಂಜಿ, ಡಬ್ಲ್ಯುಟಿಎ ಅಧ್ಯಕ್ಷ ಸ್ಟೀವ್ ಸೈಮನ್ ಮತ್ತು ಐಟಿಎಫ್ ಮುಖ್ಯಸ್ಥ ಡೇವಿಡ್ ಹ್ಯಾಗರ್ಟಿ ಅವರೊಂದಿಗೆ ಸಂಪರ್ಕದಲ್ಲಿದ್ದೇನೆ ಮತ್ತು ಇದರ ಪ್ರಗತಿಯ ಬಗ್ಗೆ ಮುಂದಿನ ವಾರ ಚರ್ಚಿಸುವುದಾಗಿ ಗೈಡಿಸೆಲ್ಲಿ ಹೇಳಿದರು.

‘‘ನಾವು ಒಟ್ಟಿಗೆ ಕೆಲಸ ಮಾಡುತ್ತಿದ್ದೇವೆ, ಆದರೆ ವೇಳಾಪಟ್ಟಿಯನ್ನು ನಿಖರವಾಗಿ ನಿರ್ಧರಿಸಲು ಇನ್ನೂ ಸ್ವಲ್ಪ ಸಮಯ ಕಾಯಬೇಕಾಗಿದೆ ’’ ಎಂದರು.

ಶನಿವಾರ ರಾತ್ರಿಯ ವೇಳೆಗೆ ಫ್ರಾನ್ಸ್ ನಲ್ಲಿ ಕೊರೋನ ವೈರಸ್ ಸೋಂಕಿನಿಂದ ಸಾವನ್ನಪ್ಪಿದವರ ಸಂಖ್ಯೆ 26,310ಕ್ಕೆ ತಲುಪಿದೆ.

‘ವಾರ್ತಾ ಭಾರತಿ’ ನಿಮಗೆ ಆಪ್ತವೇ ? ಇದರ ಸುದ್ದಿಗಳು ಮತ್ತು ವಿಚಾರಗಳು ಎಲ್ಲರಿಗೆ ಉಚಿತವಾಗಿ ತಲುಪುತ್ತಿರಬೇಕೇ? 

ಬೆಂಬಲಿಸಲು ಇಲ್ಲಿ  ಕ್ಲಿಕ್ ಮಾಡಿ

Comments (Click here to Expand)