varthabharthi


ಅಂತಾರಾಷ್ಟ್ರೀಯ

ಶ್ರೀಲಂಕಾ ಸಂಸತ್ ಚುನಾವಣೆ: ಮಹಿಂದ ರಾಜಪಕ್ಸೆ ನೇತೃತ್ವದ ಎಸ್‌ಎಲ್‌ಪಿಪಿ ಪಕ್ಷಕ್ಕೆ ಭರ್ಜರಿ ಜಯ

ವಾರ್ತಾ ಭಾರತಿ : 7 Aug, 2020

ಕೊಲಂಬೊ (ಶ್ರೀಲಂಕಾ), ಆ. 7: ಶ್ರೀಲಂಕಾದಲ್ಲಿ ಬುಧವಾರ ನಡೆದ ಸಂಸದೀಯ ಚುನಾವಣೆಯಲ್ಲಿ ದೇಶವನ್ನು ಆಳುತ್ತಿರುವ ರಾಜಪಕ್ಸ ಸಹೋದರರ ಮಿತ್ರಕೂಟವು ಮೂರನೇ ಎರಡು ಬಹುಮತದಿಂದ ಅಧಿಕಾರಕ್ಕೆ ಬಂದಿದೆ ಹಾಗೂ ಆ ಮೂಲಕ ಅಧಿಕಾರದ ಮೇಲಿನ ಹಿಡಿತವನ್ನು ಬಲಪಡಿಸಲು ಈ ಸಹೋದರರಿಗೆ ಸಹಾಯ ಮಾಡಿದೆ. ಶುಕ್ರವಾರ ಮುಂಜಾನೆ ಫಲಿತಾಂಶವನ್ನು ಪ್ರಕಟಿಸಲಾಗಿದೆ.

ಪ್ರಧಾನಿ ಮಹಿಂದ ರಾಜಪಕ್ಸರ ಶ್ರೀಲಂಕಾ ಪೊಡುಜನ ಪಾರ್ಟಿ (ಎಸ್‌ಎಲ್‌ಪಿಪಿ)ಯೊಂದೇ 225 ಸದಸ್ಯ ಬಲದ ಸಂಸತ್ತಿನಲ್ಲಿ 146 ಸ್ಥಾನಗಳನ್ನು ಗೆದ್ದಿದೆ ಹಾಗೂ ಅದಕ್ಕೆ ಕನಿಷ್ಠ 5 ಮಿತ್ರಪಕ್ಷಗಳ ಬೆಂಬಲವಿದೆ.

ಕಳೆದ ವರ್ಷದ ನವೆಂಬರ್‌ನಲ್ಲಿ ನಡೆದ ಅಧ್ಯಕ್ಷೀಯ ಚುನಾವಣೆಯಲ್ಲಿ ಜಯ ಗಳಿಸಿರುವ ಗೋತಬಯ ರಾಜಪಕ್ಸ ಮತ್ತು ಅವರ ಸಹೋದರ ಹಾಗೂ ಪ್ರಧಾನಿ ಮಹಿಂದ ರಾಜಪಕ್ಸ ಸಂವಿಧಾನವನ್ನು ಬದಲಾಯಿಸುವ ಭರವಸೆಯನ್ನು ನೀಡಿದ್ದರು. ಈ ಭರವಸೆಯನ್ನು ಜಾರಿಗೆ ತರಬೇಕಾದರೆ ಅವರಿಗೆ ಮೂರನೇ ಎರಡು ‘ಸೂಪರ್’ ಬಹುಮತದ ಅಗತ್ಯವಿದೆ.

ಹಿಂದಿನ ಸರಕಾರವು ಅಧ್ಯಕ್ಷರ ಅಧಿಕಾರಗಳನ್ನು ಮೊಟಕುಗೊಳಿಸುವುದಕ್ಕೆ ಸಂಬಂಧಿಸಿದ ಸಾಂವಿಧಾನಿಕ ಬದಲಾವಣೆಗಳನ್ನು ಜಾರಿಗೊಳಿಸಿತ್ತು. ಅದನ್ನು ಹಿಂದಕ್ಕೆ ಪಡೆಯಲು ರಾಜಪಕ್ಸ ಸಹೋದರರು ಪ್ರಯತ್ನಿಸುತ್ತಿದ್ದಾರೆ.

ಬುಧವಾರ ನಡೆದ ಚುನಾವಣೆಯಲ್ಲಿ 1.62 ಕೋಟಿ ಮತದಾರರ ಪೈಕಿ ಸುಮಾರು 70 ಶೇಕಡ ಮಂದಿ ಮತ ಚಲಾಯಿಸಿದ್ದಾರೆ. ಈ ಪೈಕಿ ಮಹಿಂದ ಸಹೋದರರ ಪಕ್ಷವು ಸುಮಾರು 60 ಶೇಕಡ ಮತಗಳನ್ನು ಬಾಚಿಕೊಂಡಿದೆ.

ದೇಶದ ಪ್ರತಿಪಕ್ಷಗಳು ಛಿದ್ರವಾಗಿವೆ. ಮಾಜಿ ಪ್ರಧಾನಿ ರನಿಲ್ ವಿಕ್ರಮೆಸಿಂಘೆ ಚುನಾವಣೆಯಲ್ಲಿ ಸೋಲನುಭವಿಸಿದ್ದಾರೆ ಹಾಗೂ ಅವರ ಪಕ್ಷವು ಕೇವಲ ಒಂದು ಸ್ಥಾನವನ್ನು ಗಳಿಸಿದೆ. ನಿರ್ಗಮನ ಸಂಸತ್ತಿನಲ್ಲಿ ಅವರ ಪಕ್ಷವು 106 ಸ್ಥಾನಗಳನ್ನು ಹೊಂದಿತ್ತು.

ವಿಕ್ರಮೆಸಿಂಘೆಯ ಪಕ್ಷದಿಂದ ಸಿಡಿದು ಹೋಗಿರುವ ಸಜಿತ್ ಪ್ರೇಮದಾಸ ನೇತೃತ್ವದ ಪಕ್ಷವು 53 ಸ್ಥಾನಗಳೊಂದಿಗೆ ಎರಡನೇ ಸ್ಥಾನದಲ್ಲಿದೆ. ಸಜಿತ್ ಪ್ರೇಮದಾಸ, ದೇಶದ ಹತ್ಯೆಗೀಡಾಗಿರುವ ಅಧ್ಯಕ್ಷ ರಣಸಿಂಘೆ ಪ್ರೇಮದಾಸರ ಪುತ್ರನಾಗಿದ್ದಾರೆ.

ನರೇಂದ್ರ ಮೋದಿ ಅಭಿನಂದನೆ

ಪ್ರಧಾನಿ ನರೇಂದ್ರ ಮೋದಿ ಶುಕ್ರವಾರ ಶ್ರೀಲಂಕಾ ಪ್ರಧಾನಿ ಮಹಿಂದ ರಾಜಪಕ್ಸರಿಗೆ ಫೋನ್ ಮಾಡಿ, ಚುನಾವಣಾ ವಿಜಯಕ್ಕಾಗಿ ಅವರನ್ನು ಅಭಿನಂದಿಸಿದ್ದಾರೆ.

ಬಳಿಕ ಟ್ವಿಟರ್‌ನಲ್ಲಿ ಹೇಳಿಕೆಯೊಂದನ್ನು ನೀಡಿರುವ ಶ್ರೀಲಂಕಾ ಪ್ರಧಾನಿ, ಭಾರತದ ಪ್ರಧಾನಿ ಮೋದಿಯೊಂದಿಗೆ ನಿಕಟವಾಗಿ ಕೆಲಸ ಮಾಡುವುದನ್ನು ಎದುರು ನೋಡುತ್ತಿರುವುದಾಗಿ ಹೇಳಿದ್ದಾರೆ. ಉಭಯ ದೇಶಗಳು ‘‘ಸ್ನೇಹಿತರು ಮತ್ತು ಬಂಧುಗಳು’’ ಎಂಬುದಾಗಿ ಅವರು ಬಣ್ಣಿಸಿದ್ದಾರೆ.

‘ವಾರ್ತಾ ಭಾರತಿ’ ನಿಮಗೆ ಆಪ್ತವೇ ? ಇದರ ಸುದ್ದಿಗಳು ಮತ್ತು ವಿಚಾರಗಳು ಎಲ್ಲರಿಗೆ ಉಚಿತವಾಗಿ ತಲುಪುತ್ತಿರಬೇಕೇ? 

ಬೆಂಬಲಿಸಲು ಇಲ್ಲಿ  ಕ್ಲಿಕ್ ಮಾಡಿ

Comments (Click here to Expand)