varthabharthi


ಆರೋಗ್ಯ

ಪ್ರತಿ ದಿನ ಒಂದು ತುಂಡು ಬೆಲ್ಲ ತಿಂದರೆ ಏನಾಗುತ್ತದೆ?

ವಾರ್ತಾ ಭಾರತಿ : 11 Dec, 2020

ಪ್ರತಿ ದಿನ ಊಟದೊಂದಿಗೆ ಒಂದು ತುಂಡು ಬೆಲ್ಲ ತಿನ್ನುವುದರಿಂದ ಅದ್ಭುತ ಆರೋಗ್ಯಲಾಭಗಳು ನಮ್ಮದಾಗುತ್ತವೆ ಎನ್ನುವುದು ನಿಮಗೆ ಗೊತ್ತೇ? ಬೆಲ್ಲ ತಿನ್ನುವುದು ಜೀರ್ಣಕ್ರಿಯೆಗೆ ವೇಗ ನೀಡುವುದರ ಜೊತೆಗೆ ಇತರ ಹಲವಾರು ಕಾಯಿಲೆಗಳಿಗೆ ಉತ್ತಮ ಚಿಕಿತ್ಸೆಯಾಗಿದೆ. ಬೆಲ್ಲ ಆರೋಗ್ಯಕರ ಮಾತ್ರವಲ್ಲ, ಅದು ಸಕ್ಕರೆಗಿಂತ ಅಗ್ಗ ಮತ್ತು ರುಚಿಕರವೂ ಆಗಿದೆ.

ಬೆಲ್ಲ ಪೋಷಕಾಂಶಗಳ ಆಗರವಾಗಿದೆ ಮತ್ತು ಇದೇ ಕಾರಣದಿಂದ ಅದು ಸುರಕ್ಷಿತ ಮತ್ತು ಆರೋಗ್ಯಕರವಾಗಿದೆ. ಪ್ರೋಟಿನ್,ಕೊಬ್ಬು,ಪೊಟ್ಯಾಷಿಯಂ, ರಂಜಕ,ಮ್ಯಾಗ್ನೀಷಿಯಂ,ಮ್ಯಾಂಗನೀಸ್,ಕಬ್ಬಿಣ,ಬಿ ವಿಟಾಮಿನ್‌ಗಳು, ಕ್ಯಾಲ್ಸಿಯಂ, ತಾಮ್ರ ಮತ್ತು ಸತುವು ಬೆಲ್ಲದಲ್ಲಿ ಹೇರಳವಾಗಿವೆ.

ಆಸಕ್ತಿಯ ವಿಷಯವೆಂದರೆ ಬೆಲ್ಲವನ್ನು ರಿಫೈನ್ಡ್ ಸಕ್ಕರೆಯು ತಯಾರಾಗುವ ಮೂಲದಿಂದಲೇ ಉತ್ಪಾದಿಸಲಾಗುತ್ತದೆ ಮತ್ತು ಹೆಚ್ಚುಕಡಿಮೆ ಸಕ್ಕರೆಯಲ್ಲಿ ಇರುವಷ್ಟೇ ಕ್ಯಾಲೊರಿಗಳನ್ನು ಒಳಗೊಂಡಿರುತ್ತದೆ,ಆದರೆ ಸಕ್ಕರೆಗಿಂತ ಹೆಚ್ಚು ಆರೋಗ್ಯಕರವಾಗಿದೆ. ಸಕ್ಕರೆಯು ಶೂನ್ಯ ಪೋಷಕಾಂಶಗಳೊಂದಿಗೆ ಕ್ಯಾಲೊರಿಗಳನ್ನು ಮಾತ್ರ ಹೊಂದಿದ್ದರೆ,ಬೆಲ್ಲವು ಕೆಲವು ವಿಟಾಮಿನ್‌ಗಳು ಮತ್ತು ಖನಿಜಗಳನ್ನೂ ಹೊಂದಿರುತ್ತದೆ ಎನ್ನುವುದು ಇದಕ್ಕೆ ಕಾರಣವಾಗಿದೆ. ಆದರೆ ಬೆಲ್ಲವನ್ನು ನಿಮ್ಮ ಮನಸ್ಸಿಗೆ ಬಂದಂತೆ ತಿನ್ನುವುದಲ್ಲ,ಅದಕ್ಕೂ ಒಂದು ಮಿತಿಯಿದೆ ಎನ್ನುವುದು ನೆನಪಿರಲಿ.ನೀವು ದಿನಕ್ಕೆ ಹೆಚ್ಚೆಂದರೆ 5ರಿಂದ 10 ಗ್ರಾಮ್ ಬೆಲ್ಲವನ್ನು ಸೇವಿಸಬಹುದು. ಬೆಲ್ಲ ಸೇವಿಸುವುದರ ಆರೋಗ್ಯಲಾಭಗಳು ಇಲ್ಲಿವೆ....

► ತೂಕ ಇಳಿಸಲು ನೆರವಾಗುತ್ತದೆ

ನೀವು ನಿಮ್ಮ ದೇಹತೂಕವನ್ನು ಇಳಿಸಿಕೊಳ್ಳಲು ಬಯಸಿದ್ದರೆ ನಿಮ್ಮ ದಿನನಿತ್ಯದ ಆಹಾರದಲ್ಲಿ ಒಂದು ತುಂಡು ಬೆಲ್ಲ ಸೇರಿಸಿಕೊಳ್ಳಿ. ಇದರಲ್ಲಿರುವ ಪೊಟ್ಯಾಷಿಯಂ ಪ್ರಬಲ ಖನಿಜವಾಗಿದ್ದು,ವಿದ್ಯುದ್ವಿಚ್ಛೇದ್ಯಗಳನ್ನು ಸಮತೋಲನಗೊಳಿಸಲು,ಚಯಾಪಚಯವನ್ನು ಹೆಚ್ಚಿಸಲು,ಜಲ ಧಾರಣವನ್ನು ನಿಯಂತ್ರಿಸಲು ಇತ್ಯಾದಿಗಳಿಗೆ ನೆರವಾಗುತ್ತದೆ. ಇವೆಲ್ಲ ಪ್ರಕ್ರಿಯೆಗಳು ತೂಕವನ್ನು ಕಡಿಮೆ ಮಾಡಲು ನೆರವಾಗುತ್ತವೆ.

► ನಿರೋಧಕತೆಯನ್ನು ಹೆಚ್ಚಿಸುತ್ತದೆ

ಬೆಲ್ಲದಲ್ಲಿ ಉತ್ಕರ್ಷಣ ನಿರೋಧಕ ಗುಣಗಳುಳ್ಳ ಸೆಲೆನಿಯಂ ಮತ್ತು ಸತುವಿನಿಂತಹ ಕೆಲವು ಅಗತ್ಯ ನಿರೋಧಕ ಖನಿಜಗಳಿದ್ದು.ಇವು ಫ್ರೀರ್ಯಾಡಿಕಲ್‌ಗಳುಂಟು ಮಾಡುವ ಹಾನಿಯನ್ನು ತಡೆಯುತ್ತವೆ ಮತ್ತು ಬ್ಯಾಕ್ಟೀರಿಯಾ ಹಾಗೂ ವೈರಸ್‌ಗಳ ವಿರುದ್ಧ ಶರೀರಕ್ಕೆ ರಕ್ಷಣೆಯನ್ನು ನೀಡುತ್ತವೆ. ಅಲ್ಲದೆ ಬೆಲ್ಲವು ಶರೀರದಲ್ಲಿ ಕೆಂಪು ರಕ್ತಕಣಗಳ ಸಂಖ್ಯೆಯನ್ನೂ ಹೆಚ್ಚಿಸುತ್ತದೆ.

► ರಕ್ತದೊತ್ತಡವನ್ನು ನಿಯಂತ್ರಿಸುತ್ತದೆ

ನೀವು ಅಧಿಕ ರಕ್ತದೊತ್ತಡದಿಂದ ಬಳಲುತ್ತಿದ್ದರೆ ನೀವು ಪ್ರತಿ ದಿನ ಬೆಲ್ಲವನ್ನು ಅಗತ್ಯವಾಗಿ ಸೇವಿಸಬೇಕು. ಅದು ಶರೀರದಲ್ಲಿ ಆಮ್ಲ ಮಟ್ಟಗಳನ್ನು ಕಾಯ್ದುಕೊಳ್ಳುವ ಮೂಲಕ ರಕ್ತದೊತ್ತಡವನ್ನು ಕ್ರಮಬದ್ಧಗೊಳಿಸುತ್ತದೆ. ಬೆಲ್ಲದಲ್ಲಿರುವ ಪೊಟ್ಯಾಷಿಯಂ ಮತ್ತು ಅಲ್ಪ ಪ್ರಮಾಣದಲ್ಲಿರುವ ಸೋಡಿಯಂ ಈ ಪ್ರಕ್ರಿಯೆಗೆ ನೆರವಾಗುತ್ತವೆ.

► ಉಸಿರಾಟ ಸಮಸ್ಯೆಗಳನ್ನು ತಡೆಯುತ್ತದೆ

ಬೆಲ್ಲದ ಸೇವನೆಯು ಅಸ್ತಮಾ ಮತ್ತು ಬ್ರಾಂಕೈಟಿಸ್‌ನಂತಹ ಹಲವಾರು ಉಸಿರಾಟ ಕಾಯಿಲೆಗಳನ್ನು ಶಮನಿಸಲು ನೆರವಾಗುತ್ತದೆ. ಫಲಿತಾಂಶಗಳು ತಕ್ಷಣ ಕಂಡು ಬರುವುದಿಲ್ಲ ಮತ್ತು ಎರಡು ವಾರಗಳ ನಿರಂತರ ಸೇವನೆಯ ಬಳಿಕವೇ ನಿರೀಕ್ಷಿತ ಪರಿಣಾಮ ದೊರೆಯುತ್ತದೆ.

► ಯಕೃತ್ತನ್ನು ಸ್ವಚ್ಛಗೊಳಿಸುತ್ತದೆ

ದಿನನಿತ್ಯ ಬೆಲ್ಲ ಸೇವಿಸುವುದರಿಂದ ಯಕೃತ್ತಿನಲ್ಲಿಯ ಹಾನಿಕಾರಕ ನಂಜು ಶರೀರದಿಂದ ಹೊರಹಾಕಲ್ಪಡುತ್ತದೆ ಮತ್ತು ಯಕೃತ್ತನ್ನು ಆರೋಗ್ಯಯುತ ವಾಗಿರಿಸುತ್ತದೆ.

► ಮಲಬದ್ಧತೆಯನ್ನು ತಡೆಯುತ್ತದೆ

ಬೆಲ್ಲವು ಪಚನ ಕ್ರಿಯೆಯು ಆರಂಭಗೊಳ್ಳಲು ಜೀರ್ಣ ಕಿಣ್ವಗಳನ್ನು ಕ್ರಿಯಾಶೀಲಗೊಳಿಸುತ್ತದೆ ಮತ್ತು ಕರುಳಿನ ಚಲನವಲನಗಳನ್ನು ಕ್ರಮಬದ್ಧಗೊಳಿಸುತ್ತದೆ. ಇದು ನೋವಿನಿಂದ ಕೂಡಿದ ಮಲವಿಸರ್ಜನೆಯಿಂದ ಪಾರಾಗಲು ನೆರವಾಗುತ್ತದೆ. ಬೆಲ್ಲವು ಮೂತ್ರವರ್ಧಕ ಗುಣಗಳನ್ನೂ ಹೊಂದಿದೆ.

► ಫ್ಲು ಲಕ್ಞಣಗಳಿಗೆ ಚಿಕಿತ್ಸೆ ನೀಡುತ್ತದೆ

ಋತುಮಾನದಲ್ಲಿ ಬದಲಾವಣೆಯೊಂದಿಗೆ ದುರ್ಬಲ ರೋಗ ನಿರೋಧಕ ಶಕ್ತಿಯುಳ್ಳವರು ಕೆಮ್ಮು,ಶೀತ,ಗಂಟಲು ಕೆರೆತ ಮತ್ತು ಇತರ ಫ್ಲೂ ಲಕ್ಷಣಗಳಿಂದ ಬಳಲತೊಡಗುತ್ತಾರೆ. ಬೆಲ್ಲ ಇವುಗಳನ್ನು ಶಮನಿಸುತ್ತದೆ.

► ಮುಟ್ಟಿನ ನೋವನ್ನು ತಗ್ಗಿಸುತ್ತದೆ

ಮುಟ್ಟಿನ ಸಂದರ್ಭದಲ್ಲಿ ಮಹಿಳೆಯರು ಅನುಭವಿಸುವ ನೋವನ್ನು ಬೆಲ್ಲದ ಸೇವನೆಯು ಕಡಿಮೆ ಮಾಡುತ್ತದೆ. ಅದು ಜಠರವನ್ನು ಶಮನಿಸುವ ಮೂಲಕ ಎಂಡಾರ್ಫಿನ್‌ಗಳನ್ನು ಬಿಡುಗಡೆಗೊಳಿಸುತ್ತದೆ,ತನ್ಮೂಲಕ ಮುಟ್ಟಿನ ನೋವನ್ನು ಶಮನಿಸಲು ನೆರವಾಗುತ್ತದೆ.

► ರಕ್ತವನ್ನು ಶುದ್ಧಗೊಳಿಸುತ್ತದೆ

ಬೆಲ್ಲವು ರಕ್ತವನ್ನು ಶುದ್ಧೀಕರಿಸುವ ಗುಣಗಳನ್ನು ಹೊಂದಿದೆ. ಹೀಗಾಗಿ ಪ್ರತಿದಿನ ಬೆಲ್ಲವನ್ನು ಸೇವಿಸುವ ಮೂಲಕ ರಕ್ತದಲ್ಲಿಯ ಅಶುದ್ಧತೆಗಳನ್ನು ನಿವಾರಿಸಬಹುದು.

► ರಕ್ತಹೀನತೆಯನ್ನು ತಡೆಯುತ್ತದೆ

ಶರೀರದಲ್ಲಿ ಕೆಂಪು ರಕ್ತಕಣಗಳು ಕಡಿಮೆಯಾದಾಗ ರಕ್ತಹೀನತೆಯುಂಟಾಗುತ್ತದೆ. ಇದು ಹಲವಾರು ಆರೋಗ್ಯ ಸಮಸ್ಯೆಗಳಿಗೆ ಕಾರಣವಾಗಬಲ್ಲದು. ರಕ್ತಹೀನತೆಯನ್ನು ಎದುರಿಸಲು ಶರೀರದಲ್ಲಿ ಕೆಂಪು ರಕ್ತಕಣಗಳ ಸಂಖ್ಯೆಯನ್ನು ಹೆಚ್ಚಿಸಬೇಕಾಗುತ್ತದೆ. ಬೆಲ್ಲದಲ್ಲಿ ಫಾಲೇಟ್ ಮತ್ತು ಕಬ್ಬಿಣ ಸಮೃದ್ಧವಾಗಿದ್ದು,ಇವು ಕೆಂಪು ರಕ್ತಕಣಗಳ ಪುನರುತ್ಪಾದನೆಗೆ ನೆರವಾಗುತ್ತವೆ.

► ಕರುಳಿನ ಆರೋಗ್ಯವನ್ನು ಹೆಚ್ಚಿಸುತ್ತದೆ

ಬೆಲ್ಲದಲ್ಲಿರುವ ಮ್ಯಾಗ್ನೀಷಿಯಂ ಕರುಳಿನ ಆರೋಗ್ಯಕ್ಕೆ ಪೂರಕವಾಗಿದೆ. ಅದು ಕರುಳು ಸೂಕ್ತವಾಗಿ ಕಾರ್ಯ ನಿರ್ವಹಿಸುವಂತೆ ಮತ್ತು ಆಹಾರವನ್ನು ಚೆನ್ನಾಗಿ ಜೀರ್ಣಿಸುವಂತೆ ಮಾಡುತ್ತದೆ.

‘ವಾರ್ತಾ ಭಾರತಿ’ ನಿಮಗೆ ಆಪ್ತವೇ ? ಇದರ ಸುದ್ದಿಗಳು ಮತ್ತು ವಿಚಾರಗಳು ಎಲ್ಲರಿಗೆ ಉಚಿತವಾಗಿ ತಲುಪುತ್ತಿರಬೇಕೇ? 

ಬೆಂಬಲಿಸಲು ಇಲ್ಲಿ  ಕ್ಲಿಕ್ ಮಾಡಿ

Comments (Click here to Expand)