varthabharthi


ನಿಮ್ಮ ಅಂಕಣ

ಹಿಂದುಳಿದ ವರ್ಗ: ಜಾತಿಗಳ ಹೊಸ ಸೇರ್ಪಡೆ ಹೇಗೆ?

ವಾರ್ತಾ ಭಾರತಿ : 30 Dec, 2020
ಕೆ. ಎನ್. ಲಿಂಗಪ್ಪ ಮಾಜಿ ಸದಸ್ಯ, ಕರ್ನಾಟಕ ರಾಜ್ಯ ಹಿಂದುಳಿದ ವರ್ಗಗಳ ಆಯೋಗ

ಹೊಸ ವಿಧಾನದಂತೆ, ಸಂವಿಧಾನದ ತಿದ್ದುಪಡಿ ಕಾಯ್ದೆಯನ್ವಯ ರಾಷ್ಟ್ರಪತಿಗಳು, ರಾಜ್ಯಪಾಲರ ಸಲಹೆ ಮೇರೆಗೆ ಯಾವುದೇ ರಾಜ್ಯಕ್ಕೆ ಸಂಬಂಧಿಸಿದ ಸಾಮಾಜಿಕವಾಗಿ ಮತ್ತು ಶೈಕ್ಷಣಿಕವಾಗಿ ಹಿಂದುಳಿದ, ವರ್ಗಗಳನ್ನು ಸಾರ್ವಜನಿಕ ಅಧಿಸೂಚನೆ ಹೊರಡಿಸುವುದರ ಮೂಲಕ ನಿರ್ದಿಷ್ಟ ಪಡಿಸುವರು(ಅನುಚ್ಛೇದ 342ಎ1). ಹೀಗೆ ಅಧಿಸೂಚನೆ ಮೂಲಕ ನಿರ್ದಿಷ್ಟ ಪಡಿಸಿದ ಹಿಂದುಳಿದ ವರ್ಗಗಳನ್ನು ಕೇಂದ್ರ ಪಟ್ಟಿಗೆ ಸೇರಿಸುವ ಅಥವಾ ಪಟ್ಟಿಯಿಂದ ಹೊರಗಿಡುವ ಅಧಿಕಾರವನ್ನು ಸಂಸತ್ ಹೊಂದಿದೆ(ಅನುಚ್ಛೇದ 342ಎ2). ಈ ಮೊದಲು ರಾಷ್ಟ್ರೀಯ ಆಯೋಗ, ಶಾಸನಾತ್ಮಕವಾಗಿ ಇದ್ದ ಸರಳ ವಿಧಾನ ಅನುಸರಿಸಿ ಕೇಂದ್ರ ಸರಕಾರಕ್ಕೆ ಶಿಫಾರಸು ಮಾಡುತ್ತಿತ್ತು. ಆದರೆ ಸಂವಿಧಾನ ತಿದ್ದುಪಡಿಯ ನಂತರ ಜಾತಿ-ಉಪಜಾತಿಗಳ ಹೊಸ ಸೇರ್ಪಡೆಗಳನ್ನು ಕೇಂದ್ರ ಪಟ್ಟಿಗೆ ಸೇರಿಸುವ ವಿಧಾನ ಜಟಿಲಗೊಂಡಿದೆ. ಸೇರ್ಪಡೆ ವಿಧಾನ ಜಟಿಲಗೊಳಿಸಲು ಇರುವ ಹಿಂದಿನ ತರ್ಕ ಮಾತ್ರ ನಿಗೂಢವಾಗಿದೆ.


ಇತ್ತೀಚಿನ ದಿನಗಳಲ್ಲಿ ವೀರಶೈವಲಿಂಗಾಯತ ಸಮುದಾಯವನ್ನು ಕೂಡಾ ಹಿಂದುಳಿದ ವರ್ಗಗಳ ಮೀಸಲಾತಿ ಪಟ್ಟಿಗೆ ಸೇರಿಸಬೇಕೆಂಬ ಒತ್ತಾಯ ಕೇಳಿಬರುತ್ತಿದೆ. ಆದರೆ, ಯಾವುದೇ ಸಮುದಾಯವನ್ನು ರಾಜ್ಯ ಸರಕಾರ ಕೇಂದ್ರ ಹಿಂದುಳಿದ ವರ್ಗಗಳ ಪಟ್ಟಿಗೆ ಸೇರಿಸಬೇಕೆಂದರೂ ಅಸ್ತಿತ್ವದಲ್ಲಿರುವ ಅಧಿನಿಯಮ-ನಿಯಮಗಳನ್ನು ಪಾಲಿಸಬೇಕು. ನಿಯಮ ಪಾಲಿಸದ ಪ್ರಕರಣಗಳಲ್ಲಿ ನ್ಯಾಯಾಲಯಗಳು ಮಧ್ಯಪ್ರವೇಶಿಸಿವೆ ಎಂಬುದನ್ನು ಮರೆಯುವ ಹಾಗಿಲ್ಲ.

 ಕೇಂದ್ರ ಸರಕಾರದ ಹುದ್ದೆಗಳಿಗೆ ನೇಮಕ ಮಾಡಲು, ಸಂವಿಧಾನದ ಅನುಚ್ಛೇದ15(4)ರಂತೆ, ಸಾಮಾಜಿಕವಾಗಿ ಮತ್ತು ಶೈಕ್ಷಣಿಕವಾಗಿ ಹಿಂದುಳಿದ ವರ್ಗಗಳನ್ನು ಗುರುತಿಸುವ ಜವಾಬ್ದಾರಿ ಕೇಂದ್ರ ಸರಕಾರದ (ರಾಜ್ಯವೂ ಸೇರಿದಂತೆ) ಮೇಲೆಯೇ ಇರುತ್ತದೆ. ಸಂವಿಧಾನ ಜಾರಿಗೆ ಬಂದು, ಈ ವಿಷಯದ ಮೇಲೆ ಸಂವಿಧಾನಕ್ಕೆ ಮೊದಲನೇ ತಿದ್ದುಪಡಿ ಆದರೂ, ಬಹಳ ವರ್ಷಗಳ ಕಾಲ ಕೇಂದ್ರ ಸರಕಾರ ಹಿಂದುಳಿದವರನ್ನು ಗುರುತಿಸುವ ಕೆಲಸಕ್ಕೆ ಕೈ ಹಾಕಲಿಲ್ಲ. 1977ರಲ್ಲಿ ಅಧಿಕಾರಕ್ಕೆ ಬಂದ ಮೊರಾರ್ಜಿ ದೇಸಾಯಿ ಸರಕಾರ ಕೇಂದ್ರ ಸರಕಾರದ ಹುದ್ದೆಗಳ ಆಯ್ಕೆಗೆ ಹಿಂದುಳಿದ ವರ್ಗಗಳಿಗೆ ಮೀಸಲಾತಿ ನೀಡುವ ದಿಸೆಯಲ್ಲಿ ಆ ವರ್ಗಗಳನ್ನು ಗುರುತಿಸಲು ಒಂದು ಆಯೋಗ ರಚಿಸಲು ಮುಂದಾಯಿತು. ಜನವರಿ, 1978ರಲ್ಲಿ ರಾಷ್ಟ್ರಪತಿಗಳು ಬಿ.ಪಿ. ಮಂಡಲ್ ಅವರ ಅಧ್ಯಕ್ಷತೆಯಲ್ಲಿ ಆಯೋಗ ನೇಮಕ ಮಾಡಿದರು(ಅನುಚ್ಛೇದ 340). ಆಯೋಗ 1980ರ ಅಂತ್ಯದಲ್ಲಿ ಸರಕಾರಕ್ಕೆ ವರದಿ ಸಲ್ಲಿಸಿತು. ಇಡೀ ಭಾರತದ 3,743 ಜಾತಿ-ಉಪಜಾತಿಗಳನ್ನು ಸಾಮಾಜಿಕವಾಗಿ ಮತ್ತು ಶೈಕ್ಷಣಿಕವಾಗಿ ಹಿಂದುಳಿದ ವರ್ಗಗಳೆಂದು ಆಯೋಗ ಗುರುತಿಸಿದೆ. ಅವುಗಳಲ್ಲಿ ಕರ್ನಾಟಕದ 323 ಜಾತಿ-ಉಪಜಾತಿಗಳೂ ಸೇರಿವೆ. ಆಯೋಗದ ವರದಿ ಆಧರಿಸಿ ಕೇಂದ್ರ ಸರಕಾರ, ಹಿಂದುಳಿದ ವರ್ಗಗಳಿಗೆ ಮೀಸಲಾತಿ ಕಲ್ಪಿಸಿ 1992ರಲ್ಲಿ ಆದೇಶ ಹೊರಡಿಸಿತು. ಮೀಸಲಾತಿ ನೀಡಿರುವುದನ್ನು ಪ್ರಶ್ನಿಸಿದ (ಇಂದ್ರ ಸಹಾನಿ  ಭಾರತ ಸರಕಾರ) ಸಂದರ್ಭದಲ್ಲಿ, ಸರ್ವೋಚ್ಚ ನ್ಯಾಯಾಲಯ ನೀಡಿದ ಆದೇಶದನ್ವಯ, ರಾಷ್ಟ್ರೀಯ ಹಿಂದುಳಿದ ವರ್ಗಗಳ ಆಯೋಗದ ಕಾಯ್ದೆ, 1993 ಜಾರಿಗೆ ಬಂದು, ರಾಷ್ಟ್ರೀಯ ಹಿಂದುಳಿದ ವರ್ಗಗಳ ಶಾಶ್ವತ ಆಯೋಗ ಅಸ್ತಿತ್ವಕ್ಕೆ ಬಂದಿತು. ಆಯೋಗ ಅಂದಿನಿಂದ ಇಂದಿನವರೆಗೂ ಕಾಲಕಾಲಕ್ಕೆ ಕರ್ನಾಟಕದ 283 ಜಾತಿ-ಉಪಜಾತಿಗಳನ್ನು ಹಿಂದುಳಿದ ವರ್ಗಗಳ ಪಟ್ಟಿಗೆ ಸೇರಿಸಲು ಕೇಂದ್ರಸರಕಾರಕ್ಕೆ ಶಿಫಾರಸು ಮಾಡುತ್ತಾ ಬಂದಿದೆ. ಪ್ರಸ್ತುತ ಕೇಂದ್ರ ಸರಕಾರದ ಹಿಂದುಳಿದ ವರ್ಗಗಳ ಪಟ್ಟಿಯಲ್ಲಿ ಕರ್ನಾಟಕದ 606 ಜಾತಿ-ಉಪಜಾತಿಗಳು ಪಾಲು ಪಡೆದುಕೊಂಡಿವೆ.

ರಾಷ್ಟ್ರೀಯ ಹಿಂದುಳಿದ ವರ್ಗಗಳ ಆಯೋಗ, ಯಾವುದೇ ಸಂಸ್ಥೆ ಅಥವಾ ರಾಜ್ಯಸರಕಾರ, ಹಿಂದುಳಿದ ವರ್ಗಗಳ ಪಟ್ಟಿಗೆ ಯಾವುದೇ ಜಾತಿ- ಉಪಜಾತಿಯನ್ನು ಸೇರಿಸಲು ಕೋರಿಕೆ ಸಲ್ಲಿಸಿದ ಸಂದರ್ಭದಲ್ಲಿ, ಪರಿಶೀಲನೆಗೆ ಒಳಪಡಿಸಿ ಕೇಂದ್ರ ಸರಕಾರಕ್ಕೆ ಶಿಫಾರಸು ಮಾಡುವ ಅಧಿಕಾರ ಪಡೆದಿದೆ (ಕಲಂ 9/1). ಹಾಗೆಯೇ ಕೇಂದ್ರ ಸರಕಾರ ಕೂಡ ಕಾಯ್ದೆ ಜಾರಿಗೆ ಬಂದ ನಂತರದ ಪ್ರತಿ 10 ವರ್ಷಗಳಿಗೊಮ್ಮೆ ಹಿಂದುಳಿದ ವರ್ಗಗಳೆಂದು ಪಟ್ಟಿಯಲ್ಲಿ ಸ್ಥಾನ ಪಡೆಯಲು ಅನರ್ಹತೆಗೆ ಒಳಪಡುವಂತಹವುಗಳನ್ನು ಹೊರಹಾಕಲು ಆಯೋಗದೊಡನೆ ಸಮಾಲೋಚಿಸಿ ಪಟ್ಟಿಯನ್ನು ಪರಿಷ್ಕರಣೆಗೆ ಒಳಪಡಿಸುವ ಅಧಿಕಾರ ಪಡೆದಿರುತ್ತದೆ. (ಕಲಂ 11/1,2). ಆದರೆ ಈ ಪರಿಷ್ಕರಣ ಕಾರ್ಯವನ್ನು ಕೇಂದ್ರಸರಕಾರ ಎಂದೂ ಕೈಗೆತ್ತಿಕೊಂಡಿಲ್ಲ ಎಂಬುದು ಇಲ್ಲಿ ಉಲ್ಲೇಖನೀಯ. ಆಯೋಗ ಹಿಂದುಳಿದ ವರ್ಗಗಳ ಪಟ್ಟಿಗೆ ಆರ್ಹ ಜಾತಿಗಳನ್ನು ಸೇರ್ಪಡೆ ಮಾಡಲು ಕೇಂದ್ರ ಸರಕಾರಕ್ಕೆ ಕಾಯ್ದೆ ಜಾರಿಗೆ ಬಂದ ಲಾಗಾಯ್ತಿನಿಂದಲೂ ಶಿಫಾರಸು ಮಾಡುತ್ತಾ ಬಂದಿದೆ.

ಈ ಮಧ್ಯೆ ರಾಷ್ಟ್ರೀಯ ಹಿಂದುಳಿದ ವರ್ಗಗಳ ಆಯೋಗ, ಕಳೆದ ಕೆಲವು ವರ್ಷಗಳ ಹಿಂದೆ ಆಯೋಗಕ್ಕೆ ಸಾಂವಿಧಾನಿಕ ಸ್ಥಾನ-ಮಾನ ಕೋರಿ ಕೇಂದ್ರ ಸರಕಾರಕ್ಕೆ ಪ್ರಸ್ತಾವನೆ ಸಲ್ಲಿಸಿತ್ತು. ಪ್ರಸ್ತಾವನೆ ವಾಸ್ತವವಾಗಿ ಯುಪಿಎ ಸರಕಾರ ಅಧಿಕಾರದಲ್ಲಿದ್ದಾಗಲೇ ಬಂದುದಾಗಿತ್ತು. ಆದರೆ ಯುಪಿಎ ಸರಕಾರ ಪ್ರಸ್ತಾವನೆಯತ್ತ ಕಣ್ಣು ಹಾಯಿಸಲಿಲ್ಲ. ಆದರೆ 2014ರಲ್ಲಿ ಕೇಂದ್ರ ಸರಕಾರವನ್ನು ತನ್ನ ಕೈವಶ ಮಾಡಿಕೊಂಡ ಎನ್‌ಡಿಎ ಈ ದಿಸೆಯಲ್ಲಿ ಕಾರ್ಯೋನ್ಮುಖಗೊಂಡು ಸಂವಿಧಾನಕ್ಕೆ ತಿದ್ದುಪಡಿ ತರುವ ನಿಟ್ಟಿನಲ್ಲಿ ವಿಧೇಯಕವನ್ನು ಸಂಸತ್ತಿನಲ್ಲಿ ಮಂಡಿಸಿ 102ನೇ ತಿದ್ದುಪಡಿ ತರುವಲ್ಲಿ ಯಶಸ್ವಿಯಾಯಿತು. ಪರಿಣಾಮವಾಗಿ ಆಗಸ್ಟ್ 2018ರಲ್ಲಿ ಸಂವಿಧಾನ (102ನೇ ತಿದ್ದುಪಡಿ) ಕಾಯ್ದೆ ಅಸ್ತಿತ್ವಕ್ಕೆ ಬಂದಿತು. ಕಾಯ್ದೆ ಅಸ್ತಿತ್ವಕ್ಕೆ ಬಂದಿತಾದರೂ, ಈ ವರೆಗೂ ನಿಯಮಗಳನ್ನು ರೂಪಿಸದಿರುವುದು ಸೋಜಿಗದ ಸಂಗತಿ. ತಿದ್ದುಪಡಿಯಲ್ಲಿ ರಾಷ್ಟ್ರೀಯ ಹಿಂದುಳಿದ ವರ್ಗಗಳ ಆಯೋಗದ ಅಧ್ಯಕ್ಷರಿಗೆ ಸಾಂವಿಧಾನಿಕ ಸ್ಥಾನ-ಮಾನವೇನೋ ಲಭಿಸಿದೆ (ಅನುಚ್ಛೇದ 338ಬಿ).

ಆದರೆ ಎನ್‌ಡಿಎ ಸರಕಾರ ಹಿಂದುಳಿದ ವರ್ಗಗಳ ಆಯೋಗಕ್ಕೆ ಸಾಂವಿಧಾನಿಕ ಸ್ಥಾನ-ಮಾನ ಕೊಡುವ ನೆಪದಲ್ಲಿ ಹಿಂದುಳಿದ ವರ್ಗಗಳ ಪಟ್ಟಿಗೆ ಜಾತಿ-ಉಪಜಾತಿಗಳ ಹೊಸ ಸೇರ್ಪಡೆಗೆ ಶಿಫಾರಸು ಮಾಡಲು ಇದ್ದ ಅಧಿಕಾರವನ್ನು ಕಸಿದುಕೊಂಡಿದೆ. ಹೊಸ ವಿಧಾನದಂತೆ ಸಂವಿಧಾನದ ತಿದ್ದುಪಡಿ ಕಾಯ್ದೆಯನ್ವಯ ರಾಷ್ಟ್ರಪತಿಗಳು ರಾಜ್ಯಪಾಲರ ಸಲಹೆ ಮೇರೆಗೆ ಯಾವುದೇ ರಾಜ್ಯಕ್ಕೆ ಸಂಬಂಧಿಸಿದ ಸಾಮಾಜಿಕವಾಗಿ ಮತ್ತು ಶೈಕ್ಷಣಿಕವಾಗಿ ಹಿಂದುಳಿದ ವರ್ಗಗಳನ್ನು, ಸಾರ್ವಜನಿಕ ಅಧಿಸೂಚನೆ ಹೊರಡಿಸುವುದರ ಮೂಲಕ ನಿರ್ದಿಷ್ಟ ಪಡಿಸುವರು(ಅನುಚ್ಛೇದ 342ಎ1). ಹೀಗೆ ಅಧಿಸೂಚನೆ ಮೂಲಕ ನಿರ್ದಿಷ್ಟ ಪಡಿಸಿದ ಹಿಂದುಳಿದ ವರ್ಗಗಳನ್ನು ಕೇಂದ್ರ ಪಟ್ಟಿಗೆ ಸೇರಿಸುವ ಅಥವಾ ಪಟ್ಟಿಯಿಂದ ಹೊರಗಿಡುವ ಅಧಿಕಾರವನ್ನು ಸಂಸತ್ ಹೊಂದಿದೆ (ಅನುಚ್ಛೇದ 342ಎ2). ಈ ಮೊದಲು ರಾಷ್ಟ್ರೀಯ ಆಯೋಗ ಶಾಸನಾತ್ಮಕವಾಗಿ ಇದ್ದ ಸರಳ ವಿಧಾನ ಅನುಸರಿಸಿ ಕೇಂದ್ರ ಸರಕಾರಕ್ಕೆ ಶಿಫಾರಸು ಮಾಡುತ್ತಿತ್ತು. ಆದರೆ ಸಂವಿಧಾನ ತಿದ್ದುಪಡಿಯ ನಂತರ ಜಾತಿ-ಉಪಜಾತಿಗಳ ಹೊಸ ಸೇರ್ಪಡೆಗಳನ್ನು ಕೇಂದ್ರ ಪಟ್ಟಿಗೆ ಸೇರಿಸುವ ವಿಧಾನ ಜಟಿಲಗೊಂಡಿದೆ. ಸೇರ್ಪಡೆ ವಿಧಾನ ಜಟಿಲಗೊಳಿಸಲು ಇರುವ ಹಿಂದಿನ ತರ್ಕ ಮಾತ್ರ ನಿಗೂಢವಾಗಿದೆ. ಯಾವುದೇ ಜಾತಿ-ಉಪಜಾತಿಯನ್ನು ಕೇಂದ್ರಪಟ್ಟಿಗೆ ಸೇರಿಸುವಲ್ಲಿ, ಈ ಮುನ್ನ ರಾಜ್ಯಗಳ ಪಾತ್ರ ಪ್ರಧಾನವಾಗಿತ್ತು. ಪ್ರಸ್ತುತ ರಾಜ್ಯಗಳ ಪಾತ್ರಗಳ ಬಗ್ಗೆ ಸ್ಪಷ್ಟತೆಯೇ ಇಲ್ಲ. ಇಂತಹ ಸಂದಿಗ್ಧ ಪರಿಸ್ಥಿತಿಯಲ್ಲಿ ರಾಜ್ಯಗಳು ಯಾವ ಕ್ರಮ ಅನುಸರಿಸಬೇಕು ಎಂಬುದನ್ನು ಕೇಂದ್ರ ಸರಕಾರ ತಿಳಿಯಪಡಿಸಬೇಕಿದೆ. ಅಂತೂ ಜಾತಿಗಳ ಹೊಸ ಸೇರ್ಪಡೆಗೆ ದುರ್ಗಮ ಸ್ಥಿತಿ ಬಂದೊದಗಿದೆ. ದುರ್ಬಲ ಜಾತಿಗಳು ಇಂತಹ ದುರ್ಗಮ ಹಾದಿ ಸವೆಸಿ ಗುರಿ ಮುಟ್ಟುವುದಾದರೂ ಹೇಗೆ ಎಂಬುದು ಯಕ್ಷ ಪ್ರಶ್ನೆ!

ಸಂವಿಧಾನ ತಿದ್ದುಪಡಿಯ ಪರಿಣಾಮ, ಹೊಸ ತಿದ್ದುಪಡಿ ಕಾಯ್ದೆ ಅಸ್ತಿತ್ವಕ್ಕೆ ಬಂದ ನಂತರ ಕರ್ನಾಟಕದಲ್ಲಿ ಈ ತನಕ ಯಾವುದೇ ಜಾತಿ ಅಥವಾ ಉಪಜಾತಿಯನ್ನು ಹಿಂದುಳಿದ ವರ್ಗವೆಂದು ಪರಿಗಣಿಸಿ ಕೇಂದ್ರಪಟ್ಟಿಗೆ ಸೇರಿಸಿರುವುದಿಲ್ಲ. ಆದರೆ, ವೀರಶೈವಲಿಂಗಾಯತ ಸಮುದಾಯವನ್ನು ಕೇಂದ್ರ ಹಿಂದುಳಿದ ವರ್ಗಗಳ ಪಟ್ಟಿಗೆ ಸೇರಿಸುವ ದಿಸೆಯಲ್ಲಿ ಹಬ್ಬಿದ ಸುದ್ದಿ ಮುನ್ನೆಲೆಗೆ ಬಂದು ರಾಜ್ಯದಲ್ಲಿ ಸಂಚಲನ ಉಂಟು ಮಾಡಿದೆ. ಜನಸಂಖ್ಯಾ ಬಾಹುಳ್ಯ ಹೊಂದಿರುವ ಆ ಸಮುದಾಯದ ನಾಯಕರೊಬ್ಬರು ಅಧಿಕಾರಸ್ಥಾನದಲ್ಲಿರುವುದರಿಂದ ಸುದ್ದಿ ಕರ್ನಾಟಕದ ತುಂಬೆಲ್ಲ ಹರಡಿದೆ. ಬಹುಶಃ, ಮತ್ಯಾವುದೇ ಜನಸಂಖ್ಯೆಯಲ್ಲಿ ಸ್ವಲ್ಪವೇ ಇರುವ ಅಶಕ್ತ ಸಮುದಾಯ ಆ ಜಾಗದಲ್ಲಿ ಇದ್ದಿದ್ದರೆ, ಅದು ಸುದ್ದಿಯೇ ಆಗುತ್ತಿರಲಿಲ್ಲ.

ಸದ್ಯ ಕರ್ನಾಟಕದ ಹಲವಾರು ಅಲಕ್ಷಿತ-ಅರ್ಹ ಜಾತಿ-ಉಪಜಾತಿಗಳು ಕೇಂದ್ರ ಹಿಂದುಳಿದ ವರ್ಗಗಳ ಪಟ್ಟ್ಟಿಯಲ್ಲಿ ಸ್ಥಾನ ಪಡೆಯಲು ಸಾಧ್ಯವಾಗಿಲ್ಲ. ರಾಜ್ಯದ ಹಿಂದುಳಿದ ವರ್ಗಗಳ ಪಟ್ಟಿಯಲ್ಲಿ ಅತ್ಯಂತ ಹಿಂದುಳಿದ ವರ್ಗಗಳೆಂದು(ಪ್ರವರ್ಗ-1 ಮತ್ತು 2ಎ) ಪರಿಗಣಿಸಿ ವರ್ಗೀಕರಿಸಿರುವ ಕೆಲವು ಜಾತಿ-ಉಪಜಾತಿಗಳು ಕೇಂದ್ರ ಪಟ್ಟಿಯಲ್ಲಿ ಸೇರಿರುವುದಿಲ್ಲ. ಅವುಗಳನ್ನು ಪಟ್ಟಿಗೆ ಸೇರಿಸುವ ಪ್ರಯತ್ನವೇ ನಡೆದಿರುವುದಿಲ್ಲ. ಪಟ್ಟಿಗೆ ಸೇರಬೇಕಾದ ಕೆಲ ಜಾತಿ-ಉಪಜಾತಿಗಳು ಹೀಗಿವೆ- ದೇವದಾಸಿ, ಲಾಡರು, ಜೆಟ್ಟಿ, ತೆಲುಗು ಗೌಡ, ದೊಗ್ರ, ಗುಳ್ಳಿ, ಕನಕನ್, ಉಷ್ಟಮ, ಬವಂದಿ, ಮಲಯ, ಅಗಮುಡಿ, ಸೋಮವಂಶ ಕ್ಷತ್ರಿಯ, ಮುಂತಾದ 23 ಜಾತಿಗಳು, ಹಾಗೆಯೇ ಮುತ್ರಾಚ, ಭೈರಾಗಿ, ಡವರಿ, ಗುಸಾಯಿ, ಬುಂಡೆ-ಬೆಸ್ತ, ಕಬ್ಬೇರ, ಗೋಣಿಗಮನೆ, ಗೌರಿಗ, ಜೀನಾಗಾರ, ತೇವರ್, ಕಲಾರಿ, ಕಲ್ಲುಕುಟಿಗ ಉಪ್ಪಾರ, ಸ್ವಕುಲಸಾಲಿ, ತುಳುವ, ಗೌಳಿ, ಕಾಡುಗೊಲ್ಲ, ಕ್ಷೌರಿಕ, ಗೆಜ್ಜೆಗಾರ,.. ಮುಂತಾದ 108 ಉಪಜಾತಿಗಳು. ಇವೆಲ್ಲವೂ ಅಸಹಾಯಕ-ಅಮಾಯಕ ಜಾತಿ-ಉಪಜಾತಿಗಳು. ವೀರಶೈವ-ಲಿಂಗಾಯತ ಸಮುದಾಯವನ್ನು ಅರ್ಹತೆ ಇದ್ದಲ್ಲಿ ಕೇಂದ್ರ ಹಿಂದುಳಿದ ವರ್ಗಗಳ ಪಟ್ಟಿಯಲ್ಲಿ ಸೇರಿಸಲು ಯಾರೂ ತಕರಾರು ತೆಗೆಯುವ ಸಂಭವವಿಲ್ಲ. ಹಾಗೆಯೇ ಅತ್ಯಂತ ಹಿಂದುಳಿದ ಜಾತಿ-ಉಪಜಾತಿಗಳನ್ನೂ ಗಣನೆಗೆ ತೆಗೆದುಕೊಂಡು ಕೇಂದ್ರ ಹಿಂದುಳಿದ ವರ್ಗಗಳ ಪಟ್ಟಿಯಲ್ಲಿ ಸೇರಿಸಲು ರಾಜ್ಯ ಸರಕಾರ ಮುಂದಾಗಬೇಕು. ಆದರೆ ಸಂವಿಧಾನ ತಿದ್ದುಪಡಿಯ ಪರಿಣಾಮವಾಗಿ ಬದಲಾದ ಕ್ಲಿಷ್ಟ ವಿಧಾನದಿಂದ ಕೇಂದ್ರ ಹಿಂದುಳಿದ ವರ್ಗಗಳ ಪಟ್ಟಿಗೆ ಜಾತಿಗಳ ಹೊಸ ಸೇರ್ಪಡೆ ಸುಲಭ ಸಾಧ್ಯವಲ್ಲ!

‘ವಾರ್ತಾ ಭಾರತಿ’ ನಿಮಗೆ ಆಪ್ತವೇ ? ಇದರ ಸುದ್ದಿಗಳು ಮತ್ತು ವಿಚಾರಗಳು ಎಲ್ಲರಿಗೆ ಉಚಿತವಾಗಿ ತಲುಪುತ್ತಿರಬೇಕೇ? 

ಬೆಂಬಲಿಸಲು ಇಲ್ಲಿ  ಕ್ಲಿಕ್ ಮಾಡಿ

Comments (Click here to Expand)