varthabharthi


ಆರೋಗ್ಯ

ನಿಮಗೆ ಆಗಾಗ್ಗೆ ಎದೆನೋವು ಕಾಡುತ್ತದೆಯೇ? ಕಾರಣಗಳು ಮತ್ತು ಲಕ್ಷಣಗಳು ಇಲ್ಲಿವೆ

ವಾರ್ತಾ ಭಾರತಿ : 4 Jan, 2021

ಕೆಲವೊಮ್ಮೆ ತುಂಬ ಸಮಯ ಇರುತ್ತದೆ. ಎದೆನೋವಿಗೆ ಹಲವಾರು ಕಾರಣಗಳಿವೆ. ಅದು ವ್ಯಕ್ತಿಯು ತುರ್ತಾಗಿ ಆಸ್ಪತ್ರೆಗೆ ಧಾವಿಸುವಂತೆ ಮಾಡುವ ಅತ್ಯಂತ ಸಾಮಾನ್ಯ ಕಾರಣಗಳಲ್ಲೊಂದಾಗಿದೆ. ಎದೆನೋವು ಕುತ್ತಿಗೆಯ ಕೆಳಗೆ ಮತ್ತು ಡಯಫ್ರಾಮ್ ಅಥವಾ ವಪೆಯ ಮೇಲಿನ ಜಾಗದಲ್ಲಿ ಕಾಣಿಸಿಕೊಳ್ಳುತ್ತದೆ. ಎದೆನೋವುಗಳಿಗೆ ಮನೆಯಲ್ಲಿಯೇ ಚಿಕಿತ್ಸೆ ಪಡೆಯಬಹುದು ಅಥವಾ ಸ್ಥಿತಿ ತೀರ ಹದಗೆಟ್ಟಿದ್ದರೆ ಆಸ್ಪತ್ರೆ ಭೇಟಿ ಅಗತ್ಯವಾಗಬಹುದು. ಎದೆನೋವು ಎದೆ ಭಾರವಾದ, ಬಿಗಿತ,ಉರಿ ಮತ್ತು ಸೂಜಿಯಿಂದ ಚುಚ್ಚಿದಂತಹ ಅನುಭವದಂತಹ ಲಕ್ಷಣಗಳನ್ನು ಹೊಂದಿದೆ.

 ಎದೆನೋವು ವ್ಯಕ್ತಿಯಿಂದ ವ್ಯಕ್ತಿಗೆ ಭಿನ್ನವಾಗಿರುತ್ತದೆ. ಸೌಮ್ಯದಿಂದ ಹಿಡಿದು ಸೂಜಿಯಿಂದ ಚುಚ್ಚಿದಂತಹ,ಬಿಟ್ಟು ಬಿಟ್ಟು ಬರುವ ನಿಯಂತ್ರಿಸಲಾಗದ ನೋವಿನವರೆಗೆ,ಹೀಗೆ ಅದು ವಿವಿಧ ಸ್ವರೂಪಗಳಲ್ಲಿ ಕಾಣಿಸಿಕೊಳ್ಳುತ್ತದೆ. ಎದೆನೋವಿನ ಅವಧಿ ಮತ್ತು ತೀವ್ರತೆ ಪ್ರತಿ ವ್ಯಕ್ತಿಗೂ ವಿಶಿಷ್ಟವಾಗಿರುತ್ತದೆ.

ಎದೆನೋವಿನ ಲಕ್ಷಣಗಳು

ಎದೆನೋವು ಹೃದಯಾಘಾತದಂತಹ ಗಂಭೀರ ಹೃದಯ ಸಂಬಂಧಿತ ಸಮಸ್ಯೆಯನ್ನು ಅಥವಾ ಎದೆನೋವನ್ನುಂಟು ಮಾಡುವ ಇತರ ಯಾವುದೇ ಕಾರಣವನ್ನು ಸೂಚಿಸಬಹುದು. ನೋವಿನ ವಿಧ,ಅದಿರುವ ಜಾಗ,ನೋವಿನ ಅವಧಿ ಮತ್ತು ಆ ನಿರ್ದಿಷ್ಟ ನೋವಿಗೆ ಪರಿಣಾಮಕಾರಿ ಚಿಕಿತ್ಸೆಯನ್ನು ಆಧರಿಸಿ ಎದೆನೋವನ್ನು ನಿರ್ದಿಷ್ಟವಾಗಿ ಗುರುತಿಸಬಹುದು. ಇವು ಎದೆನೋವು ಗಂಭೀರವೇ ಅಥವಾ ಸಾಮಾನ್ಯ ಸ್ವರೂಪದ್ದೇ ಎನ್ನುವುದನ್ನು ಹೇಳಬಲ್ಲವು. ಎದೆಯ ಮಧ್ಯಭಾಗದಲ್ಲಿ ನೋವು, ಎದೆಯನ್ನು ಹಿಂಡಿದಂತೆ ಅಥವಾ ಭಾರವಾಗಿರುವಂತೆ ಅನ್ನಿಸುವುದು,ನೋವು ಭುಜಗಳು,ತೋಳುಗಳು,ದವಡೆ ಅಥವಾ ಬೆನ್ನಿಗೆ ವ್ಯಾಪಿಸುವುದು,ಅತಿಯಾಗಿ ಬೆವರುವಿಕೆ,ಶ್ರಮದ ಕೆಲಸ ಮಾಡಿದಾಗ ಕಾಣಿಸಿಕೊಳ್ಳುವ ಮತ್ತು ವಿಶ್ರಾಂತಿ ಪಡೆದಾಗ ಶಮನಗೊಳ್ಳುವ ಎದೆನೋವು ಇವೆಲ್ಲ ಗಂಭೀರ ಸ್ವರೂಪವನ್ನು ಸೂಚಿಸುತ್ತವೆ ಮತ್ತು ಇದನ್ನು ಖಂಡಿತ ಕಡೆಗಣಿಸಬಾರದು.

ಎದೆನೋವಿಗೆ ಕಾರಣಗಳು

ಎದೆನೋವಿನ ಹಿಂದೆ ಹಲವಾರು ಕಾರಣಗಳಿರಬಹುದು. ಹೃದಯದ ಅಪಧಮನಿಗಳಲ್ಲಿ ಅಡಚಣೆಗಳು ಹೃದಯದ ಸ್ನಾಯುಗಳಿಗೆ ರಕ್ತ ಮತ್ತು ಆಮ್ಲಜನಕದ ಪೂರೈಕೆಯನ್ನು ತಗ್ಗಿಸುತ್ತವೆ, ಇದು ಎದೆನೋವಿಗೆ ಪ್ರಮುಖ ಕಾರಣಗಳಲ್ಲೊಂದಾಗಿದೆ. ಚರ್ಮ,ಸ್ನಾಯು,ಮೂಳೆ ಅಥವಾ ಕೀಲುಗಳಿಂದ ಆರಂಭಗೊಳ್ಳುವ ಮಸ್ಕುಲೊಸ್ಕೆಲೆಟಲ್ ನೋವಿನಂತಹ ಇತರ ಕಾರಣಗಳೂ ಎದೆನೋವನ್ನುಂಟು ಮಾಡುತ್ತವೆ. ಅಲ್ಲದೆ ಜಠರದಲ್ಲಿ ಆಮ್ಲದ ಹಿಮ್ಮುಖ ಹರಿವು ಅಥವಾ ಆ್ಯಸಿಟಿಡಿ ಕೂಡ ಎದೆನೋವನ್ನುಂಟು ಮಾಡುವ ಸಾಮಾನ್ಯ ಕಾರಣವಾಗಿದೆ. ಇದು ಎದೆಯಲ್ಲಿ ನೋವು ಮತ್ತು ಉರಿಯನ್ನುಂಟು ಮಾಡುತ್ತದೆ. ಶ್ವಾಸಕೋಶಗಳನ್ನು ಆವರಿಸಿಕೊಂಡಿರುವ ಪೊರೆಯಲ್ಲಿ ಕಾಣಿಸಿಕೊಳ್ಳುವ ನೋವು ಎದೆಗೆ ವ್ಯಾಪಿಸುವುದೂ ಇನ್ನೊಂದು ಕಾರಣವಾಗಿದೆ.

ಎದೆನೋವನ್ನು ನಿಭಾಯಿಸಲು ಟಿಪ್ಸ್

 ಎದೆನೋವಿಗೆ ಚಿಕಿತ್ಸೆಯು ಅದಕ್ಕೆ ಕಾರಣವನ್ನೂ ಅವಲಂಬಿಸಿದೆ. ವೈದ್ಯರು ಮಾತ್ರ ಎದೆನೋವಿನ ವಿಧವನ್ನು ಗುರುತಿಸಿ ಅದಕ್ಕೆ ಮುಖ್ಯ ಕಾರಣವನ್ನು ಹೇಳಬಲ್ಲರು. ನೋವು ತೀವ್ರವಾಗಿದ್ದರೆ ಅಥವಾ ಹಲವಾರು ನಿಮಿಷಗಳ ಕಾಲ ಇದ್ದರೆ ವ್ಯಕ್ತಿಯನ್ನು ತುರ್ತಾಗಿ ಆಸ್ಪತೆಗೆ ಕರೆದೊಯ್ಯಬೇಕಾಗುತ್ತದೆ.

  ಮಸ್ಕುಲೊಸ್ಕೆಲೆಟಲ್ ಕಾರಣದಿಂದ ಎದೆನೋವು ಉಂಟಾಗಿದ್ದರೆ ಸಾದಾ ನೋವು ನಿವಾರಕ ಮಾತ್ರೆಯನ್ನು ಸೇವಿಸಿದರೆ ಸಾಕು ಅಥವಾ ನೋವನ್ನು ಶಮನಗೊಳಿಸುವ ಜೆಲ್ ಅನ್ನು ನೋವಿರುವ ಜಾಗದಲ್ಲಿ ಲೇಪಿಸಬಹುದು. ಆ್ಯಸಿಡಿಟಿಯಿಂದ ಎದೆನೋವು ಉಂಟಾಗಿದ್ದರೆ ಎಂಟಾಸಿಡ್ ಸೇವನೆಯಿಂದ ಶಮನಗೊಳ್ಳುತ್ತದೆ. ಹೃದಯಕ್ಕೆ ಸಂಬಂಧಿಸಿದ ಸಮಸ್ಯೆಯಿಂದ ಎದೆನೋವು ಉಂಟಾಗಿದ್ದರೆ ನೈಟ್ರೇಟ್‌ನಂತಹ ಔಷಧಿಯನ್ನು ಒಳಗೊಂಡಿರುವ ಮಾತ್ರೆಯನ್ನು ನಾಲಿಗೆಯ ಬುಡದಲ್ಲಿ ಇಟ್ಟುಕೊಳ್ಳುವುದರಿಂದ ನೋವು ಕಡಿಮೆಯಾಗುತ್ತದೆ.

ಈ ಸರಳ ಉಪಾಯಗಳಿಂದ ಎದೆನೋವು ಕಡಿಮೆಯಾಗದಿದ್ದರೆ ತಕ್ಷಣ ವೈದ್ಯರನ್ನು ಭೇಟಿಯಾಗುವುದು ಅಗತ್ಯವಾಗುತ್ತದೆ. ಎದೆನೋವು ನಿರಂತರವಾಗಿದ್ದರೆ ಮತ್ತು ಬಿಟ್ಟು ಬಿಟ್ಟು ಕಾಡುತ್ತಿದ್ದರೆ ವೈದ್ಯರು ಸೂಚಿಸಿದ ಔಷಧಿಗಳ ಸೇವನೆಯು ನೆರವಾಗುತ್ತದೆ. ದೈಹಿಕ ಶ್ರಮ ಮತ್ತು ಒತ್ತಡಗಳನ್ನು ನಿವಾರಿಸಿಕೊಳ್ಳುವ ಮೂಲಕ ಎದೆನೋವು ಉಂಟಾಗುವ ಸಾಧ್ಯತೆಯನ್ನು ಕಡಿಮೆ ಮಾಡಬಹುದು.

‘ವಾರ್ತಾ ಭಾರತಿ’ ನಿಮಗೆ ಆಪ್ತವೇ ? ಇದರ ಸುದ್ದಿಗಳು ಮತ್ತು ವಿಚಾರಗಳು ಎಲ್ಲರಿಗೆ ಉಚಿತವಾಗಿ ತಲುಪುತ್ತಿರಬೇಕೇ? 

ಬೆಂಬಲಿಸಲು ಇಲ್ಲಿ  ಕ್ಲಿಕ್ ಮಾಡಿ

Comments (Click here to Expand)