varthabharthi


ಬುಡಬುಡಿಕೆ

ಕೇಂದ್ರದ ವರಿಷ್ಠರ ಸಿಡಿಗಳೇನಾದರೂ ಇದೆಯಾ ಸಾರ್?

ವಾರ್ತಾ ಭಾರತಿ : 17 Jan, 2021
*ಚೇಳಯ್ಯ, chelayya@gmail.com

ಸಿಡಿಯೂರಪ್ಪನವರು ಸಿಡಿಮಿಡಿಗೊಳ್ಳುತ್ತಾ ಕುಳಿತಿರುವಾಗ ಅಲ್ಲಿಗೆ ಪತ್ರಕರ್ತ ಎಂಜಲು ಕಾಸಿಯ ಆಗಮನವಾಯಿತು. ‘‘ಸಾರ್...ಸಿಡಿ...’’ ಎಂದದ್ದೇ ತಡ ಸಿಡಿಯೂರಪ್ಪನವರು ಸಿಡಿದರು ‘‘ನೋಡ್ರೀ...ಸಿಡಿ ಆಚರಣೆ ವೌಢ್ಯ ವಿರೋಧಿ ಕಾನೂನಿನ ವ್ಯಾಪ್ತಿಯಲ್ಲಿ ಬರುತ್ತದೆ...ಸಿಡಿ ಆಚರಿಸಿದವರನ್ನು ಜೈಲಿಗೆ ತಳ್ಳಲಾಗುತ್ತದೆ....’’
‘‘ಆ ಸಿಡಿ ಅಲ್ಲ ಸಾರ್...ಇದು ಯತ್ನಾಳ್ ಅವರ ಸಿಡಿ....’’ ಕಾಸಿ ತಿದ್ದುವುದಕ್ಕೆ ಪ್ರಯತ್ನಿಸಿದ.

‘‘ನೋಡಿ ಕಾಸಿಯವರೇ......ಇನ್ನೊಮ್ಮೆ ಆ ಯತ್ನಾಳ್ ಹೆಸರು ಹೇಳಿದರೆ ನಿಮ್ಮನ್ನು ಸಿಡಿ ಕಂಬಕ್ಕೆ ಏರಿಸಿ ನಾನು ಇನ್ನೊಮ್ಮೆ ಜೈಲಿಗೆ ಹೋಗುತ್ತೇನೆ...’’ ಸಿಡಿಯೂರಪ್ಪ ಎಚ್ಚರಿಸಿದರು. ‘‘ಆದರೂ ನೋಡಲಾಗದ ಸಿಡಿ ಅವರ ಬಳಿ ಇದೆಯಂತೆ....’’ ಕಾಸಿ ರಾಗ ಎಳೆದ.
 ‘‘ನೋಡಲಾಗದ ಸಿಡಿ ಆಗಿದ್ದ ಮೇಲೆ ಅವರು ನೋಡಿದ್ದು ಹೇಗೆ? ಅದರಲ್ಲೇ ಗೊತ್ತಾಗುತ್ತದೆ ಅವರ ಆರೋಪ ಸುಳ್ಳು ಎನ್ನುವುದು....’’ ಸಿಡಿಯೂರಪ್ಪರು ಮೀಸೆ ನೀವಿ ಹೇಳಿದರು.
‘‘ನೋಡಲಾಗದ ದೃಶ್ಯಗಳಿವೆಯಂತೆ....’’ ಕಾಸಿ ಮೆಲ್ಲಗೆ ಹೇಳಿದ.
‘‘ನೋಡಲಾಗದ ದೃಶ್ಯಗಳೆಂದರೆ ಸಚಿವರ ಪ್ರಮಾಣ ವಚನ ಸಿಡಿ ಇರಬೇಕು. ಸಚಿವ ಸ್ಥಾನ ಸಿಗದೇ ಇದ್ದವರಿಗೆ ಉಳಿದವರು ಪ್ರಮಾಣವಚನ ಮಾಡುವುದನ್ನು ನೋಡುವುದು ಕಷ್ಟ...’’
‘‘ಅದಲ್ಲ ಸಾರ್....ದೇವರ ದೃಶ್ಯಗಳು....’’ ಕಾಸಿ ಮತ್ತೆ ವಿವರಿಸಲು ಯತ್ನಿಸಿದ.
‘‘ಯಾರು ಹೇಳಿದರೂ ನಾನು ದೇವಸ್ಥಾನಕ್ಕೆ ಹೋಗಿಯೇ ಹೋಗುತ್ತೇನೆ. ಸಿದ್ದರಾಮಯ್ಯರ ತರ ಮಾಂಸ ತಿಂದುಕೊಂಡು ದೇವರ ಕೋಣೆಗೆ ಹೋಗಿಲ್ಲ....ನನ್ನತ್ರ ಸಿದ್ದರಾಮಯ್ಯ ಗೋಮಾಂಸ ತಿನ್ನುವ ಸಿಡಿಗಳು ಇವೆ....ಅದನ್ನು ಬಿಡುಗಡೆ ಮಾಡುತ್ತೇನೆ....’’
‘‘ಆ ದೇವರ ಚಿತ್ರಗಳಲ್ಲ ಸಾರ್...ಇದು....ಮಕ್ಕಳು ನೋಡಬಾರದ ದೇವರ ಚಿತ್ರಗಳು ಸಾರ್....’’ ಕಾಸಿ ಮತ್ತೆ ವಿವರಿಸಿದ.
‘‘ನನ್ನ ಮಕ್ಕಳು ನೋಡಬಾರದ ಚಿತ್ರಗಳ ಸಿಡಿಗಳೋ? ಗೊತ್ತಾಯಿತು ಬಿಡಿ....ಅವರೇನು ನೋಡಲ್ಲ ಅದನ್ನು....’’ ಸಿಡಿಯೂರಪ್ಪ ಸಮಾಧಾನದಿಂದ ಹೇಳಿದರು.
‘‘ಆದರೆ ನಾಡಿನ ಜನರಿಗೆಲ್ಲ ತೋರಿಸ್ತಾರಂತೆ...’’ ಕಾಸಿ ಆತಂಕದಿಂದ ಹೇಳಿದ.
‘‘ನೋಡ್ರಿ....ಈಗ ಸಿಡಿ ಪ್ಲೇಯರ್‌ಗಳೇ ಇಲ್ಲ. ಮತ್ತೆ ಸಿಡಿಯನ್ನು ಹೇಗೆ ತೋರಿಸ್ತಾರಂತೆ...?’’ ಸಿಡಿಯೂರಪ್ಪ ಸವಾಲು ಹಾಕಿದರು.
‘‘ಪೆನ್‌ಡ್ರೈವ್‌ನಲ್ಲಿ ಹಾಕಿ ತೋರಿಸಬಹುದು ಸಾರ್...’’ ಕಾಸಿ ಅನುಮಾನ ಮುಂದಿಟ್ಟ.
‘‘ನೋಡ್ರೀ...ಅವರು ಹೇಳಿರುವುದು ಸಿಡಿ. ಇದೀಗ ಪೆನ್‌ಡ್ರೈವ್ ಎಂದು ಮಾತು ಬದಲಿಸಿದರೆ ಹೇಗೆ....ಅದೇನೇ ಇರಲಿ, ಅವರು ಸಿಡಿ ತೋರಿಸಿದರೆ ನನ್ನಲ್ಲೂ ನೋಡ ಬಾರದ ಸಿಡಿಗಳಿವೆ....ಎಲ್ಲ ಚಿತ್ರಮಂದಿರಗಳಲ್ಲಿ ಅದನ್ನು ಬಿಡುಗಡೆ ಮಾಡುತ್ತೇನೆ ಅಷ್ಟೇ....ಯಾವುದು ಶತದಿನೋತ್ಸವ ಓಡತ್ತೋ ನೋಡಿಯೇ ಬಿಡೋಣ....’’ ಸಿಡಿಯೂರಪ್ಪ ಸವಾಲು ಹಾಕಿದರು.
‘‘ನಿಮ್ಮ ಕೈಯಲ್ಲಿರುವ ಸಿಡಿಯಲ್ಲಿ ಏನೇನಿದೆ ....’’ ಕಾಸಿ ಕುತೂಹಲದಿಂದ ಕೇಳಿದ.
‘‘ಏನಿರತ್ತೆ? ನೋಡಬಾರದ್ದೇ ಇರತ್ತೆ....’’ ಸಿಡಿಯೂರಪ್ಪ ಸಿಡಿದು ಉತ್ತರಿಸಿದರು.


‘‘ನಿಮ್ಮಲ್ಲಿರುವ ಸಿಡಿಗಳನ್ನು ಪತ್ರಕರ್ತರಿಗಾಗಿ ವಿಶೇಷ ಪ್ರದರ್ಶನ ಇಡಬಹುದಾ?’’ ಕಾಸಿ ಆಸೆಯಿಂದ ಕೇಳಿದ. ‘‘ಅಲ್ರೀ... ಪತ್ರಕರ್ತರೆಲ್ಲ ಬಟ್ಟೆಯಿಲ್ಲದೆ ಬಹಿರಂಗವಾಗಿ ಓಡಾಡ್ತ ಇದ್ದಾರೆ....ಇವರಿಗೆ ರಾಜಕಾರಣಿಗಳ ನೋಡಬಾರದ ಸಿಡಿ ನೋಡುವ ಆಸೆ....ಮೊದಲು ನೀವು ಬಟ್ಟೆ ಹಾಕಿಕೊಂಡು ಓಡಾಡಿ. ಬಳಿಕ ರಾಜಕಾರಣಿಗಳ ಸಿಡಿ ಬಗ್ಗೆ ಮಾತನಾಡಿ’’ ಸಿಡಿಯೂರಪ್ಪ ಕಾಸಿಗೆ ಕುಟುಕಿದರು. ‘‘ಸಾರ್... ಒಂದು ಸಿಡಿ ಕೊಡಿ. ಮನೆಯಲ್ಲಿ ಗುಟ್ಟಾಗಿ ನೋಡಿ ವಾಪಾಸ್ ಕೊಡ್ತೀನಿ....’’ ಕಾಸಿ ಮತ್ತೆ ಜೊಲ್ಲು ಸುರಿಸುತ್ತಾ ಕೇಳಿದ.
‘‘ನೋಡ್ರಿ....ಕುಮಾರಸ್ವಾಮಿಯವರು ನನ್ನ ಜೊತೆಗೆ ಸೇರಿ ಸರಕಾರ ಮಾಡಿರೋದು ಅಶ್ಲೀಲವಲ್ಲವೇನ್ರೀ? ಇದನ್ನೇ ಜನರು ಒಪ್ಪಿಕೊಂಡಿದ್ದಾರೆ. ಇನ್ನು ಬೇರೆ ನೋಡಬಾರದ್ದು ಏನಿರತ್ತೆ ಸಿಡಿಯಲ್ಲಿ?’’ ಸಿಡಿಯೂರಪ್ಪ ನಗುತ್ತಾ ಕೇಳಿದರು.
‘‘ನಿಮ್ಮ ಬಳಿ ಯಾವ್ಯಾವ ಸಿಡಿ ಇದೆ ಸಾರ್?’’ ಕಾಸಿ ಸಿಡಿಯನ್ನು ಬಿಡಲಿಲ್ಲ.
‘‘ನೋಡ್ರಿ....ಮೊನ್ನೆ ಬಂದು ನನ್ನ ಕೈಯಿಂದ ಪತ್ರಕರ್ತರೆಲ್ಲ ಗಿಫ್ಟ್ ತೆಗೊಂಡು ಹೋದ್ರಲ್ಲ...ಅದರ ಸಿಡಿ ಮಾಡಿಟ್ಟಿದ್ದೇನೆ....ನಿಮ್ಮ ಸಂಪಾದಕರಿಗೆ ಕಳುಹಿಸ್ಲಾ?’’ ಸಿಡಿಯೂರಪ್ಪ ಬಾಂಬ್ ಹಾಕಿದರು.
‘‘ಸಾರ್...ಬೇಡ ಸಾರ್ ಕೆಲಸ ಹೋಗತ್ತೆ....’’ ಕಾಸಿ ಅಂಗಲಾಚತೊಡಗಿದ.
‘‘ಹೇ...ಏನು ಹೋಗಲ್ಲರೀ....ನಿಮ್ಮ ಸಂಪಾದಕರ ಸಿಡಿ ನನ್ನ ಬಳಿ ಬೇರೆಯೇ ಇದೆ....’’ ಸಿಡಿಯೂರಪ್ಪರು ಸಮಾಧಾನಿಸಿದರು.
‘‘ಸಾರ್ ಈ ಬಾರಿ ಸಚಿವರ ಆಯ್ಕೆಗೆ ಯಾವ ಮಾನದಂಡ ಅನುಸರಿಸಿದ್ರಿ....’’ ಕಾಸಿ ಪ್ರಶ್ನೆ ಬದಲಾಯಿಸಿದ.
‘‘ಅದೇರಿ....ಎಲ್ಲ ಶಾಸಕರ ಸಾಧನೆಗಳನ್ನು ತರಿಸಿಕೊಂಡೆವು. ತರಿಸಿಕೊಂಡ ಸಿಡಿಯಲ್ಲಿ ಯಾವ ಯಾವ ಸಿಡಿಗಳು ಹೆಚ್ಚು ಹೆಚ್ಚು ನೋಡಬಾರದ್ದೋ ಅದಕ್ಕೆ ತಕ್ಕ ಹಾಗೆ ಸ್ಥಾನಗಳನ್ನು ಹಂಚಿದ್ದೇವೆ....’’ ಯಡಿಯೂರಪ್ಪ ಮುಕ್ತವಾಗಿ ಹಂಚಿಕೊಂಡರು.
‘‘ಅತೃಪ್ತರ ಬಳಿಯೂ ಸಿಡಿಗಳು ಇವೆೆಯಂತಲ್ಲ ಸಾರ್...’’ ಕಾಸಿ ಕೇಳಿದ.
‘‘ಅದೆಲ್ಲ ಎಪ್ಪತ್ತರ ದಶಕದ ಸಿಡಿಗಳು. ಅದಕ್ಕೆಲ್ಲ ನಾವು ಸಚಿವ ಸ್ಥಾನ ಕೊಡಕ್ಕಾಗಲ್ಲ. ಏನಿದ್ದರೂ ನಿಗಮಗಳನ್ನು ಕೊಡಬಹುದು. ಇನ್ನಷ್ಟು ಅನುಭವಗಳನ್ನು ಪಡೆದು ಹೊಸ ಹೊಸ ಸಿಡಿಗಳನ್ನು ಸಂಪಾದಿಸಿಕೊಂಡು ಬರುವುದಕ್ಕೆ ಆದೇಶಿಸಿದ್ದೇವೆ....ಭವಿಷ್ಯದಲ್ಲಿ ಅವರು ತರುವ ಸಿಡಿಗಳನ್ನು ನೋಡಿ ಅದಕ್ಕೆ ತಕ್ಕ ಸ್ಥಾನಮಾನವನ್ನು ನೀಡಲಿದ್ದೇವೆ...’’ ಸಿಡಿಯೂರಪ್ಪರು ವಿವರಿಸಿದರು.
‘‘ಸರ್...ನೀವು ಇನ್ನೂ ಮುಖ್ಯಮಂತ್ರಿ ಸ್ಥಾನದಲ್ಲಿದ್ದೀರಲ್ಲ....ನಿಮ್ಮ ಬಳಿ ಕೇಂದ್ರದ ವರಿಷ್ಠರ ಸಿಡಿಗಳೇನಾದರೂ ಇದೆಯಾ ಸಾರ್?’’ ಕಾಸಿ ಅಚ್ಚರಿಯಿಂದ ಕೇಳಿದ.
ಸಿಡಿಯೂರಪ್ಪ ಮೀಸೆಯ ಮರೆಯಲ್ಲೇ ನಕ್ಕರು.
‘‘ಸರ್ ಎಚ್. ವಿಶ್ವನಾಥ್ ಅವರ ಸಿಡಿಯೇನಾದರೂ ನಿಮ್ಮ ಬಳಿಯಿದೆಯೇ?’’
 ‘‘ಆ ವಯ್ಯ ಎಲ್ಲ ಬಟ್ಟೆ ಕಳಚಿ ನಮ್ಮ ಪಕ್ಷಕ್ಕೆ ಬಂದಿದ್ದಾರೆ. ಅವರದು ತೋರಿಸುವುದಕ್ಕೆ ಏನೂ ಬಾಕಿ ಇಲ್ಲ....ಬಿಟ್ಬಿಡಿ ಅವರನ್ನು....ಸುಪ್ರೀಂಕೋರ್ಟ್‌ನಲ್ಲಿ ಅವರ ಸಿಡಿ ಬಹಿರಂಗವಾಗಿ ಪ್ರದರ್ಶನ ಮಾಡಿದ್ದೇವೆ’’ ಸಿಡಿಯೂರಪ್ಪ ಹೇಳಿ ನಕ್ಕರು.
‘‘ಸಾರ್...ಬೊಕ್ಕಸದಲ್ಲಿ ಹಣದ ಕೊರತೆಯಿದೆಯಂತೆ... ಹೇಗೆ ತುಂಬುತ್ತೀರಿ?’’
‘‘ನಮ್ಮಲ್ಲಿರುವ ಎಲ್ಲ ಸಿಡಿಗಳನ್ನು ಯಾವುದಾದರೂ ಪೋರ್ನ್ ಸೈಟ್‌ಗೆ ಮಾರಿ ಬೊಕ್ಕಸ ತುಂಬಬೇಕಾಗುತ್ತದೆ....ಆನ್‌ಲೈನ್‌ನಲ್ಲಿ ಸಿಡಿ ಹರಾಜಿಗಿಟ್ಟಿದ್ದೇವೆ....’’
ಬೊಕ್ಕಸ ಶೀಘ್ರದಲ್ಲೇ ತುಂಬಲಿದೆ ಎನ್ನುವುದು ಕೇಳಿ ಕಾಸಿಗೆ ಸಮಾಧಾನವಾಯಿತು.

‘ವಾರ್ತಾ ಭಾರತಿ’ ನಿಮಗೆ ಆಪ್ತವೇ ? ಇದರ ಸುದ್ದಿಗಳು ಮತ್ತು ವಿಚಾರಗಳು ಎಲ್ಲರಿಗೆ ಉಚಿತವಾಗಿ ತಲುಪುತ್ತಿರಬೇಕೇ? 

ಬೆಂಬಲಿಸಲು ಇಲ್ಲಿ  ಕ್ಲಿಕ್ ಮಾಡಿ

Comments (Click here to Expand)