varthabharthi


ತಿಳಿ ವಿಜ್ಞಾನ

ಬಿಟ್ಟೂ ಬಿಡದೆ ಕಾಡುವ ಬಿಟ್ ಕಾಯಿನ್

ವಾರ್ತಾ ಭಾರತಿ : 14 Nov, 2021
ಆರ್.ಬಿ.ಗುರುಬಸವರಾಜ

ಜನರು ದೈನಂದಿನ ವಹಿವಾಟಿಗೆ ಹಣ ಬಳಸುವುದು ಅನಿವಾರ್ಯವಾಗಿದೆ. ಹಣದ ಬಳಕೆಯಿಂದ ವ್ಯಾಪಾರ ಮತ್ತು ವಹಿವಾಟು ಹೆಚ್ಚು ಸುಲಭವಾಗಿದೆ. ಕೆಲವು ವೇಳೆ ಹಣದ ಅತಿಯಾದ ಬಳಕೆ ಮತ್ತು ದುರ್ಬಳಕೆಯು ಆರ್ಥಿಕ ಕುಸಿತಕ್ಕೆ ಕಾರಣವಾಗುತ್ತದೆ. 1983ರಲ್ಲಿ ಡೇವಿಡ್ ಚಾಮ್ ಅವರು ಬರೆದ ಸಂಶೋಧನಾ ಪ್ರಬಂಧವು ಡಿಜಿಟಲ್ ನಗದು ಕಲ್ಪನೆಯನ್ನು ಪರಿಚಯಿಸಿತು. 1989ರಲ್ಲಿ ಅವರು ಆಮ್‌ಸ್ಟರ್‌ಡ್ಯಾಮ್‌ನಲ್ಲಿ ಇಲೆಕ್ಟ್ರಾನಿಕ್ ನಗದು ಕಂಪೆನಿಯಾದ ‘ಡಿಜಿಕ್ಯಾಶ್’ ಅನ್ನು ಸ್ಥಾಪಿಸಿದರು. ಇದು ಸ್ಥಾಪನೆಯಾದ ಎರಡೇ ವರ್ಷದಲ್ಲಿ ದಿವಾಳಿಯಾಯಿತು. 1996ರಲ್ಲಿ ‘ಇ-ಚಿನ್ನ’ ಎಂಬ ಡಿಜಿಟಲ್ ಹಣ ವ್ಯಾಪಕವಾಗಿ ಬಳಕೆಯಾಗತೊಡಗಿತು. 2008ರ ವೇಳೆಗೆ ಹಲವಾರು ಮಿಲಿಯನ್ ಬಳಕೆದಾರರನ್ನು ಹೊಂದಿದ್ದ ಇ-ಚಿನ್ನವನ್ನು ಯು.ಎಸ್. ಸರಕಾರ ಬಂದ್ ಮಾಡಿತು. 1997ರಲ್ಲಿ ಕೋಕಾ-ಕೋಲಾ ಕಂಪೆನಿ ಮೊಬೈಲ್ ಪಾವತಿ ಬಳಸಿಕೊಂಡು ವಿತರಣಾ ಯಂತ್ರಗಳಿಂದ ಖರೀದಿಸಲು ಅವಕಾಶ ನೀಡಿತು. 1998ರಲ್ಲಿ ಪೇ-ಪಾಲ್ ಹೆಸರಿನಲ್ಲಿ ಡಿಜಿಟಲ್ ಹಣದ ಸೇವೆ ಪ್ರಾರಂಭವಾಯಿತು. 2009ರಲ್ಲಿ ಕ್ರಿಪ್ಟೋಕರೆನ್ಸಿ ಎಂದು ಕರೆಯುವ ಬ್ಲಾಕ್‌ಚೈನ್ ಆಧಾರಿತ ಡಿಜಿಟಲ್ ಕರೆನ್ಸಿಗಳು ಜಾರಿಗೆ ಬಂದವು. 2008ರ ಜಾಗತಿಕ ಆರ್ಥಿಕ ಕುಸಿತದ ನಂತರ, 2009ರಲ್ಲಿ ಕ್ರಿಪ್ಟೋಕರೆನ್ಸಿಯ ಮೊದಲ ರೂಪವು ಬಿಟ್‌ಕಾಯಿನ್ ರೂಪದಲ್ಲಿ ಹೊರಹೊಮ್ಮಿತು. ಇದನ್ನು ಮೊದಲು ಪರಿಚಯಿಸಿದ್ದು ನಕಾಮೊಟೊ.

ಅನಾಮಧೇಯ ಗುಂಪು ಅಥವಾ ವ್ಯಕ್ತಿಯಿಂದ ವ್ಯಕ್ತಿಗೆ ಸುಲಭವಾದ ದಿನನಿತ್ಯದ ವಹಿವಾಟಿಗಾಗಿ ಬಿಟ್‌ಕಾಯಿನ್ ಅನ್ನು ಮೊದಲ ಡಿಜಿಟಲ್ ಕರೆನ್ಸಿಯಾಗಿ ಪರಿಚಯಿಸಲಾಯಿತು. ಬ್ಯಾಂಕುಗಳು ಮತ್ತು ವಿತ್ತೀಯ ಸಂಸ್ಥೆಗಳಂತಹ ಮಧ್ಯವರ್ತಿಗಳಿಲ್ಲದೆ ಬಿಟ್‌ಕಾಯಿನ್ ಕಾರ್ಯನಿರ್ವಹಿಸುತ್ತದೆ. ಇದು ಸಹವರ್ತಿ ವಹಿವಾಟಿನ ಒಂದು ರೂಪವಾಗಿದ್ದು, ವಹಿವಾಟು ನಡೆಸುವವರ ಗುರುತನ್ನು ಬಹಿರಂಗಪಡಿಸುವ ಅಗತ್ಯವಿಲ್ಲ. ಪ್ರಸ್ತುತ ಜಾರಿಯಲ್ಲಿರುವ ವಿವಿಧ ಹಣಕಾಸಿನ ವಾಲೆಟ್‌ಗಳಿಗಿಂತ ಭಿನ್ನವಾಗಿ ಕಾರ್ಯನಿರ್ವಹಿಸುತ್ತದೆ. ಖರೀದಿದಾರ ಮತ್ತು ಮಾರಾಟಗಾರರ ಗುರುತನ್ನು ಬಹಿರಂಗಪಡಿಸದೆ, ವೈಯಕ್ತಿಕ ಡೇಟಾ ರಕ್ಷಣೆಯ ಸಮಸ್ಯೆಗಳಿಂದ ಮುಕ್ತವಾಗಿದೆ. ಬಿಟ್‌ಕಾಯಿನ್ ಪ್ಲಾಟ್‌ಫಾರ್ಮ್ ಕ್ರಿಪ್ಟೋಕರೆನ್ಸಿಯ ವ್ಯಾಪಾರ ಮತ್ತು ವಹಿವಾಟನ್ನು ಹೆಚ್ಚು ಸುಲಭ ಮತ್ತು ಹೆಚ್ಚು ಸ್ವತಂತ್ರವಾಗಿಸಿ, ವೈಯಕ್ತಿಕ ಮಾಹಿತಿ ಮತ್ತು ವಿವರಗಳಿಗೆ ಧಕ್ಕೆಯಾಗದಂತೆ ಮಾಡಿದೆ. ಧನಿಕರು ಈ ವಹಿವಾಟಿನ ವಿಧಾನವನ್ನು ಆರಿಸಿಕೊಳ್ಳುವುದರಿಂದ ಅವರು ಮುಕ್ತವಾಗಿ ಮತ್ತು ಅನಾಮಧೇಯವಾಗಿ ವಹಿವಾಟು ನಡೆಸಲು ಅರ್ಹರಾಗಿದ್ದಾರೆ.

ಕ್ರಿಪ್ಟೋಕರೆನ್ಸಿ ಮಾರುಕಟ್ಟೆ ವ್ಯವಸ್ಥೆಯು ಸಾಕಷ್ಟು ಸಂಕೀರ್ಣವಾಗಿದೆ ಮತ್ತು ಅರ್ಥಮಾಡಿಕೊಳ್ಳಲು ಸಾಕಷ್ಟು ಕಷ್ಟಕರವಾಗಿದೆ. ಈ ಉದ್ಯಮದಲ್ಲಿ ತೊಡಗಿದವರು ಮತ್ತು ಈ ಕ್ಷೇತ್ರದಲ್ಲಿ ಅಧ್ಯಯನ ಮಾಡುವ ಸಂಶೋಧಕರಿಗೂ ಇದನ್ನು ಅರ್ಥಮಾಡಿಕೊಳ್ಳಲು ತೊಂದರೆಯಾಗುತ್ತಿದೆ. ಬಿಟ್ ಕಾಯಿನ್ ಹೆಸರಿನ ಡಿಜಿಟಲ್ ನಾಣ್ಯವನ್ನು ಬಳಸುವ ಅಪಾಯ ಮತ್ತು ನ್ಯೂನತೆಗಳ ಬಗ್ಗೆ ಸಂಶೋಧಕರು ವಿಶ್ವದ ಗಮನಸೆಳೆದಿದ್ದಾರೆ. ನಕಾಮೊಟೊ 2009ರಲ್ಲಿ ಬಿಟ್‌ಕಾಯಿನ್ ಅನ್ನು ಪರಿಚಯಿಸಿದ ಆರಂಭದಲ್ಲಿ 50 ಬಿಟ್‌ಕಾಯಿನ್‌ಗಳನ್ನು ಚಲಾವಣೆಗೆ ತಂದರು. ಆರಂಭಿಕ ಹಂತದಲ್ಲಿ, ಪ್ರಪಂಚದಾದ್ಯಂತದ ಕಂಪ್ಯೂಟರ್ ಉತ್ಸಾಹಿಗಳಿಂದ ಮಾತ್ರ ಪ್ರಚೋದನೆ ಪಡೆದುಕೊಳ್ಳಲಾಯಿತು. 2010ರಲ್ಲಿ, ಗೋಕ್ಸ್ ಎಂಬ ಜಪಾನ್ ಕಂಪೆನಿಯು 4.951 ಸೆಂಟ್‌ಗಳಲ್ಲಿ 20 ನಾಣ್ಯಗಳನ್ನು ಬದಲಾಯಿಸುವ ಮೂಲಕ ಬಿಟ್‌ಕಾಯಿನ್ ಅನ್ನು ವ್ಯಾಪಾರ ಕಾರ್ಯವಿಧಾನವಾಗಿ ಬಳಸುವಲ್ಲಿ ವೇದಿಕೆಯನ್ನು ರಚಿಸಿತು. ಪ್ರಾರಂಭದಲ್ಲಿ ಅದರ ಒಟ್ಟು ಪರಿಮಾಣವು ಸರಿಸುಮಾರು ಒಂದು ಅಮೆರಿಕನ್ ಡಾಲರ್ ಆಗಿತ್ತು. ಬಿಟ್‌ಕಾಯಿನ್ ಬಳಕೆಯು ಹೆಚ್ಚಾದಂತೆ, ಬೆಲೆಯು ಮಹತ್ತರವಾಗಿ ಏರಿತು. ಪ್ರಸ್ತುತ ಒಂದು ಬಿಟ್‌ಕಾಯಿನ್ ಬೆಲೆ 64.5 ಅಮೆರಿಕನ್ ಡಾಲರ್. ಭಾರತದಲ್ಲಿ ಪ್ರಸ್ತುತ ಒಂದು ಬಿಟ್‌ಕಾಯಿನ್ ಬೆಲೆ 48 ಲಕ್ಷ ರೂಪಾಯಿಗಳು(11-11-2021ಕ್ಕೆ ಇದ್ದಂತೆ).

ಬಿಟ್‌ಕಾಯಿನ್ ಅನ್ನು ಪರಿಚಯಿಸಿದಾಗ ಉದ್ಭವಿಸುವ ದೊಡ್ಡ ಪ್ರಶೆಯೆಂದರೆ, ಈ ಕ್ರಿಪ್ಟೋಕರೆನ್ಸಿಗಳನ್ನು ನಿಜವಾದ ಹಣವೆಂದು ಪರಿಗಣಿಸಬಹುದೇ ಎಂಬುದಾಗಿತ್ತು. ಕೊಳ್ಳುವ ಶಕ್ತಿ, ವಹಿವಾಟಿನ ಸಾಮರ್ಥ್ಯ ಮತ್ತು ವಿನಿಮಯ ಮಾಧ್ಯಮ ಇವು ಹಣದ ಮೂರು ಮಾನದಂಡಗಳು. ಹಣವು ಸೈದ್ಧಾಂತಿಕವಾಗಿ ಈ ಎಲ್ಲಾ ಮಾನದಂಡಗಳನ್ನು ಪೂರೈಸಬೇಕು ಬಿಟ್‌ಕಾಯಿನ್ ಮತ್ತು ಇತರ ಕ್ರಿಪ್ಟೋಕರೆನ್ಸಿಗಳನ್ನು ಈ ಮೂರು ಮಾನದಂಡಗಳ ಅಡಿಯಲ್ಲಿ ಗಮನಿಸುವುದು ಚರ್ಚಾಸ್ಪದವಾಗಿದೆ. ಕೊಳ್ಳುವ ಶಕ್ತಿಯ ಸಾಮರ್ಥ್ಯದಿಂದಾಗಿ ಇದು ಅಂಗಡಿ ಮೌಲ್ಯವನ್ನು ಹೊಂದಿದೆ ಎಂದು ಒಬ್ಬರು ಪ್ರತಿಪಾದಿಸಬಹುದು, ಆದರೆ ಅನಿಶ್ಚಿತತೆಯ ಕಾರಣದಿಂದಾಗಿ, ಈಗ ಬಳಸುತ್ತಿರುವಂತೆ ಭವಿಷ್ಯದಲ್ಲಿ ಬಿಟ್‌ಕಾಯಿನ್ ಅನ್ನು ಬಳಸಬಹುದೇ ಎಂದು ಅಂದಾಜು ಮಾಡಲು ಸಾಧ್ಯವಿಲ್ಲ. ಕ್ರಿಪ್ಟೋಕರೆನ್ಸಿಯನ್ನು ವಿನಿಮಯದ ಮಾಧ್ಯಮಕ್ಕಾಗಿ ಬಳಸಬಹುದು ಎಂದು ಕೆಲವರು ಸಮರ್ಥಿಸಬಹುದು, ಆದರೆ ಇತರರಿಗೆ ವಿನಿಮಯ ಮಾಡಬಹುದಾದ ಸರಕುಗಳು ಸೀಮಿತವಾಗಿವೆ.

ಕೆಲವು ವೇಳೆ ಹಣದ ಹೊರತಾಗಿಯೂ ವ್ಯಾಪಾರ ವಹಿವಾಟನ್ನು ಮಾಡಲಾಗಿರುವ ಬಗ್ಗೆ ಇತಿಹಾಸ ತಿಳಿಸುತ್ತದೆ. 2ನೇ ಮಹಾಯುದ್ಧದ ಕಠಿಣ ಸಮಯದಲ್ಲಿ ಸಿಗರೇಟ್‌ಗಳು ಹಣದ ಎಲ್ಲಾ ಮಾನದಂಡಗಳನ್ನು ಪೂರೈಸಿದ್ದವು ಎಂದು ರಾಡ್‌ಫೋರ್ಡ್ (1945) ವರದಿ ಮಾಡಿದೆ, ಯುದ್ಧ ಶಿಬಿರಗಳಲ್ಲಿನ ಕೈದಿಗಳು ಸಿಗರೇಟನ್ನು ವಹಿವಾಟಿಗೆ ಬಳಸುತ್ತಿದ್ದರು. ಹಿಂದಿನ ಕಾಲದಲ್ಲಿ, ರೋಮನ್ ಸಾಮ್ರಾಜ್ಯದ ಸಮಯದಲ್ಲಿ ಪಡೆಗಳ ವೇತನವನ್ನು ಉಪ್ಪಿನ ರೂಪದಲ್ಲಿ ಪಾವತಿಸಿದ ಉದಾಹರಣೆಗಳಿವೆ. ಆ ಸಮಯದಲ್ಲಿ ಅಡುಗೆ ಉಪ್ಪು ಮೌಲ್ಯವನ್ನು ಹೊಂದಿತ್ತು ಎಂದು ಪರಿಗಣಿಸಬಹುದು. ಇಂದು ಕಂಪ್ಯೂಟರ್ ಮತ್ತು ಇಂಟರ್ನೆಟ್‌ನ್ನು ಸಕ್ರಿಯಗೊಳಿಸಿದ ಜನರಿಗೆ ಕ್ರಿಪ್ಟೋಕರೆನ್ಸಿ ಹಣವೆಂದು ಪರಿಗಣಿಸಬಹುದು. ಪ್ರಪಂಚದಾದ್ಯಂತ ಇರುವ ಜನರ ಒಂದು ಸಣ್ಣ ಗುಂಪು ಮಾತ್ರ ಇಂಟರ್ನೆಟ್ ಸಾಧನಗಳಿಗೆ ಪ್ರವೇಶವನ್ನು ಹೊಂದಿದೆ ಎಂಬ ಅಂಶವು ಗಮನಾರ್ಹವಾದುದು. ಹಾಗಾಗಿ ಪ್ರಸ್ತುತ ಸಂದರ್ಭದಲ್ಲಿ, ಯುದ್ಧ ಶಿಬಿರದಲ್ಲಿರುವ ಕೈದಿ ಮತ್ತು ರೋಮನ್ ಪಡೆಗಳಂತೆಯೇ, ಕ್ರಿಪ್ಟೋಕರೆನ್ಸಿಯು ಇಂಟರ್ನೆಟ್ ಪ್ರವೇಶವನ್ನು ಹೊಂದಿರುವವರಿಗೆ ಮಾತ್ರ ಸೀಮಿತವಾಗಿದೆ. ಕ್ರಿಪ್ಟೋಕರೆನ್ಸಿಯನ್ನು ಆರಂಭದಲ್ಲಿ ಹೇಗೆ ಪಡೆಯಲಾಯಿತು ಅಥವಾ ಸ್ವೀಕರಿಸಲಾಯಿತು? ಎಂಬ ಪ್ರಶ್ನೆ ಉದ್ಭವಿಸುವುದು ಸಹಜ.

ಇಂದು ನಾವು ಬಳಸುವ ಡಿಜಿಟಲ್ ಹಣ ಅಥವಾ ಫಿಯೆಟ್ ಹಣವು ಸಂಬಂಧಿಸಿದ ಕೇಂದ್ರ ಬ್ಯಾಂಕ್‌ನಿಂದ ನೀಡಲ್ಪಡುತ್ತದೆ, ಆದರೆ ಕ್ರಿಪ್ಟೋಕರೆನ್ಸಿಯನ್ನು ಕ್ರಿಪ್ಟೋಗ್ರಫಿ ತಂತ್ರಜ್ಞಾನವನ್ನು ಉಪಯೋಗಿಸಿಕೊಂಡು ಬ್ಲಾಕ್‌ಚೈನ್ ಮೂಲಕ ಬಳಕೆ ಮಾಡುವಂತೆ ರಚಿಸಲಾಗಿದೆ. ಇದು ಹೊಸ ಕ್ರಿಪ್ಟೋಕರೆನ್ಸಿಯನ್ನು ನೀಡುವ ವಿಧಾನವಾಗಿದೆ. ಬಳಕೆದಾರರು, ಡೆವಲಪರ್‌ಗಳು, ನೋಡ್ ನಿರ್ವಾಹಕರು ಮತ್ತು ವಿತರಿಸಿದ ಲೆಡ್ಜರ್‌ಗಳ ಕಾರ್ಯವನ್ನು ಖಚಿತಪಡಿಸುವ ಸಂವಹನಗಳನ್ನು ಒಳಗೊಂಡಿರುವ ವ್ಯವಸ್ಥೆಯೇ ಬ್ಲಾಕ್‌ಚೈನ್ ಸಿಸ್ಟಮ್.ಅಂತಹ ಬಳಕೆ ಪ್ರಕ್ರಿಯೆಗೆ ಬಳಕೆದಾರಿಕೆ ಸಾಫ್ಟ್‌ವೇರ್ ಮತ್ತು ಹಾರ್ಡ್ ವೇರ್ ಖರೀದಿಸಲು ಬಂಡವಾಳ ವೆಚ್ಚಗಳು ಬೇಕಾಗುತ್ತವೆ. ವಿವಿಧ ಅಲ್ಗಾರಿದಮ್ ಅನ್ನು ಬಳಸುವ ಇತರ ಕರೆನ್ಸಿಗಳ ಬಳಕೆದಾರಿಕೆಗೆ ಉನ್ನತ-ಮಟ್ಟದ ಮತ್ತು ಹೆಚ್ಚಿನ-ವೇಗದ ಗ್ರಾಫಿಕ್ ಕಾರ್ಡ್‌ಗಳ ಬಳಕೆಯ ಅಗತ್ಯವಿರುತ್ತದೆ. ಹೊಸ ಮೈನರಿಗಾಗಿ, ಕ್ರಿಪ್ಟೋಕರೆನ್ಸಿಯನ್ನು ಸಂಗ್ರಹಿಸಲು ಮತ್ತು ಸ್ವೀಕರಿಸಲು ಒಂದು ವ್ಯಾಲೆಟ್ ಮತ್ತು ಎನ್‌ಕ್ರಿಪ್ಟ್ ಮಾಡಿದ ಬ್ಯಾಂಕಿಂಗ್ ಅನ್ನು ಆನ್‌ಲೈನ್‌ನಲ್ಲಿ ನೋಂದಾಯಿಸುವ ಅಗತ್ಯವಿದೆ. ಬಳಕೆದಾರನು ಬ್ಲಾಕ್‌ಚೈನ್ ವ್ಯವಸ್ಥೆಯಲ್ಲಿನ ಒಗಟುಗಳನ್ನು ಪರಿಹರಿಸಲು ಸಾಧ್ಯವಾದಾಗ, ಡಿಜಿಟಲ್ ನಾಣ್ಯಗಳನ್ನು ಪುರಸ್ಕರಿಸಲಾಗುತ್ತದೆ ಮತ್ತು ಮೊದಲೇ ನಿರ್ಧರಿಸಿದ ವ್ಯಾಲೆಟ್‌ಗೆ ಹಣ ವರ್ಗಾಯಿಸಲಾಗುತ್ತದೆ.

ಕ್ರಿಪ್ಟೋಕರೆನ್ಸಿಯ ವಹಿವಾಟು ಸಂಪೂರ್ಣಗೊಳ್ಳಲು ತಜ್ಞರ ಅನುಮೋದನೆ ಅಗತ್ಯ. ಇದಕ್ಕೆ ಮೈನಿಂಗ್ ಎಂದು ಹೆಸರು. ಇದನ್ನು ನಡೆಸುವ ತಜ್ಞರಿಗೆ ಮೈನರ್ ಎಂದು ಕರೆಯುತ್ತಾರೆ. ಬಿಟ್‌ಕಾಯಿನ್ ಸಹ ಇಂತಹ ಎಲ್ಲಾ ಪ್ರಕ್ರಿಯೆಗಳನ್ನು ಒಳಗೊಂಡಿದೆ. ಅನೇಕ ಕ್ರಿಪ್ಟೋಕರೆನ್ಸಿ ಪ್ರೊಟೋಕಾಲ್‌ಗಳ ಪ್ರಕಾರ, ಗಣಿಗಾರಿಕೆಯು ಈ ಹಿಂದೆ ಅಂಗೀಕರಿಸಲ್ಪಟ್ಟ ಬ್ಲಾಕ್‌ಗೆ ಲಿಂಕ್ ಮಾಡಿ ವಹಿವಾಟನ್ನು ಮೌಲ್ಯೀಕರಿಸುವ ಮೂಲಕ ಕಾರ್ಯನಿರ್ವಹಿಸುತ್ತದೆ. ಬ್ಲಾಕ್‌ಚೈನ್ ತಂತ್ರಜ್ಞಾನವು ತನ್ನ ಘಟಕದಲ್ಲಿ ಪ್ರತಿ ವಹಿವಾಟನ್ನು ದಾಖಲಿಸುತ್ತದೆ. ಪ್ರತಿ ಬ್ಲಾಕ್ ಮತ್ತು ಅದರ ಹಿಂದಿನ ಬ್ಲಾಕ್‌ನಲ್ಲಿ ವಿಶಿಷ್ಟ ಗುರುತಿನ ಪುರಾವೆಯನ್ನು ನಿಗದಿಪಡಿಸಲಾಗಿದೆ. ಇದನ್ನು ಕೆಲಸದ ಪ್ರೊಟೋಕಾಲ್ ಪುರಾವೆ ಎಂದು ಕರೆಯಲಾಗುತ್ತದೆ. ಇದು ಕೆಲಸದ ಪುರಾವೆಯು ವಹಿವಾಟನ್ನು ಪರಿಶೀಲಿಸುವ ಮತ್ತು ಅದರ ಬಗ್ಗೆ ಇತರರಿಗೆ ತಿಳಿಸುವ ಪ್ರೊಟೋಕಾಲ್ ಆಗಿದೆ. ಬಳಕೆದಾರರು ಅವರೇ ನಿಜವಾದ ಬಳಕೆದಾರರು ಎಂಬ ಗುರುತುಗಳು ಮೌಲ್ಯೀಕರಿಸುವ ಅಥವಾ ಸಾಬೀತುಪಡಿಸುವ ಕೆಲಸವನ್ನು ಮಾಡಬೇಕು. ಈ ಕೆಲಸಗಳು ಅಲ್ಗಾರಿದಮ್ ಮತ್ತು ಪಝಲ್ ಆಧಾರಿತ ಕಂಪ್ಯೂಟರ್ ಗಣಿತ ಪ್ರಕ್ರಿಯೆಯಿಂದ ಪರಿಹರಿಸಬಹುದು. ವಿವಿಧ ರೀತಿಯ ಡಿಜಿಟಲ್ ಹಣ ಪಾವತಿ ವ್ಯವಸ್ಥೆಯಲ್ಲಿ ಕೇಂದ್ರ ಬ್ಯಾಂಕ್ ಮಧ್ಯವರ್ತಿಯಾಗಿರುತ್ತದೆ. ಆದರೆ ಬಿಟ್‌ಕಾಯಿನ್‌ನಂತಹ ಕ್ರಿಪ್ಟೋಕರೆನ್ಸಿ ವ್ಯವಸ್ಥೆಯಲ್ಲಿ ಯಾವುದೇ ಬ್ಯಾಂಕ್ ಮಧ್ಯವರ್ತಿಯಾಗಿ ಕೆಲಸ ಮಾಡುವುದಿಲ್ಲ. ಇಲ್ಲಿ ನೇರವಾಗಿ ಇಂಟರ್ನೆಟ್ ಆಧಾರಿತವಾಗಿ ಕಂಪ್ಯೂಟರ್‌ನಿಂದ ಕಂಪ್ಯೂಟರ್‌ಗೆ ಹಣ ವರ್ಗಾವಣೆಯಾಗುತ್ತದೆ.

ಇಲ್ಲಿ ಯಾವುದೇ ವ್ಯಕ್ತಿಯ ಹೆಸರಾಗಲೀ ಅಥವಾ ಬ್ಯಾಂಕಿನ ಹೆಸರಾಗಲೀ ದಾಖಲಾಗುವುದಿಲ್ಲ. ಬದಲಾಗಿ ಇಬ್ಬರು ಬಿಟ್‌ಕಾಯಿನ್ ವಾಲೆಟ್ ಹೊಂದಿರುವ ವ್ಯಕ್ತಿಗಳ ನಡುವೆ ವಹಿವಾಟು ನಡೆಯುತ್ತದೆ. ಇದು ಒಂದು ರೀತಿಯ ಅನಾಮಧೇಯ ವಹಿವಾಟು. ಇಲ್ಲಿ ಲಕ್ಷಗಟ್ಟಲೆ, ಕೋಟಿಗಟ್ಟಲೆ ಹಣದ ವಹಿವಾಟು ನಡೆದರೂ ಯಾರಿಗೂ ತಿಳಿಯುವುದೇ ಇಲ್ಲ. ಆದರೆ ಇಂತಹ ಎಲ್ಲಾ ವಹಿವಾಟಿನ ಮೂಲವನ್ನು ಬ್ಲಾಕ್‌ಚೈನ್ ವ್ಯವಸ್ಥೆಯ ಮೂಲಕ ಪತ್ತೆ ಹಚ್ಚಬಹುದು. ಇದಕ್ಕೆ ಉನ್ನತ ಸಾಮರ್ಥ್ಯದ ಕಂಪ್ಯೂಟರ್ ಮತ್ತು ಇಂಟರ್‌ನೆಟ್ ಸೇವೆ ಹಾಗೂ ತಜ್ಞರ ಕುಶಲತೆ ಬೇಕಾಗುತ್ತದೆ. ಇತರ ಡಿಜಿಟಲ್ ಹಣದ ವಹಿವಾಟಿನಂತೆ ಬಿಟ್‌ಕಾಯಿನ್ ವ್ಯವಹಾರಕ್ಕೂ ಆನ್‌ಲೈನ್‌ನಲ್ಲಿ ಖಾತೆ ಆರಂಬಿಸುವುದು ಅಗತ್ಯ. ಬಿಟ್‌ಕಾಯಿನ್ ಹೂಡಿಕೆಗೆ ಲಕ್ಷಾಂತರ ರೂಪಾಯಿಗಳ ಅಗತ್ಯವಿಲ್ಲ. ಕೇವಲ ನೂರು ರೂಪಾಯಿ ಹೂಡಿಕೆಯಲ್ಲಿ ಬಿಟ್‌ಕಾಯಿನ್‌ನ ಒಂದು ಭಾಗ ಖರೀದಿ ಮಾಡಬಹುದು. ವಿವಿಧ ಡಿಜಿಟಲ್ ವಾಲೆಟ್‌ಗಳಿಗಿರುವಂತೆ ಪ್ರತಿ ಬಿಟ್‌ಕಾಯಿನ್ ಹಾಗೂ ಪ್ರತಿ ಬಿಟ್‌ಕಾಯಿನ್ ವಹಿವಾಟಿಗೆ ಒಂದು ವಿಳಾಸ ಇರುತ್ತದೆ. ಇದರಲ್ಲಿ ಬಿಟ್‌ಕಾಯಿನ್ ವಾಲೆಟ್‌ನಲ್ಲಿರುವಷ್ಟೇ ಮೌಲ್ಯವನ್ನು ವರ್ಗಾವಣೆ ಮಾಡಬಹುದು.

ಬಿಟ್‌ಕಾಯಿನ್‌ನ ಪ್ರತಿ ವಹಿವಾಟು ಬ್ಲಾಕ್‌ಚೈನ್‌ನಲ್ಲಿ 64 ಅಕ್ಷರ ಹಾಗೂ ಸಂಖ್ಯೆಗಳ ಸಂಯೋಜನೆ ಕೋಡ್‌ನ ರೂಪದಲ್ಲಿ ದಾಖಲಾಗುತ್ತದೆ. ಇಂತಹ ಕೋಡ್ ಹೊಂದಿರುವ ಒಂದೇ ವಿಳಾಸವನ್ನು ಬೇರೆಯವರಿಗೂ ನೀಡಲು ಅವಕಾಶವಿದೆ. ಹೀಗೆ ಒಂದೇ ಕೋಡ್ ವಿಳಾಸವನ್ನು ಇನ್ನೊಬ್ಬರಿಗೆ ನೀಡುವುದೇ ವಂಚನೆ. ಕೋಡ್‌ನ ಬಳಕೆಯಿಂದ ಮೂಲ ವಿಳಾಸದಾರರ ಖಾತೆಯಿಂದ ವಹಿವಾಟು ನಡೆಯುತ್ತದೆ. ಬಿಟ್‌ಕಾಯಿನ್‌ನ ವ್ಯವಹಾರವು ಸಂಪೂರ್ಣಗೊಳ್ಳಲು 15-20 ನಿಮಿಷ ಬೇಕಾಗುತ್ತದೆ. ಪ್ರತಿ ವಹಿವಾಟಿಗೆ ಮೈನರ್‌ಗಳ ಅನುಮೋದನೆ ಅಗತ್ಯ. ವಹಿವಾಟಿನ ಅನುಮೋದನೆಗೆ ಪ್ರಬಲ ಹಾಗೂ ದುಬಾರಿ ಕಂಪ್ಯೂಟರ್‌ಗಳು, ಹೆಚ್ಚು ವಿದ್ಯುತ್ ಬೇಕಾಗುತ್ತವೆ. ತಂತ್ರಜ್ಞಾನದಲ್ಲಿ ಚಾಕಚಕ್ಯತೆ ಹೊಂದಿದವರು ಮಾತ್ರ ಮೈನರ್‌ಗಳಾಗಿರುತ್ತಾರೆ. ಬಹುತೇಕವಾಗಿ ಈ ಮೈನರ್‌ಗಳೇ ವಂಚಕರಾಗಿದ್ದಾರೆ. ವಿಶ್ವದಲ್ಲಿ ಒಟ್ಟು 30 ಕೋಟಿ ಕ್ರಿಪ್ಟೋಕರೆನ್ಸಿ ಬಳಕೆದಾರರು ಇದ್ದಾರೆ. ಇದರಲ್ಲಿ ಭಾರತೀಯರ ಸಂಖ್ಯೆ 10.03 ಕೋಟಿ. 2018ರಲ್ಲಿ ಭಾರತದಲ್ಲಿ ಬ್ಯಾಂಕ್‌ಗಳು ಅಥವಾ ಹಣಕಾಸು ಸಂಸ್ಥೆಗಳು ಕ್ರಿಪ್ಟೋಕರೆನ್ಸಿ ವಹಿವಾಟಿಗೆ ಅವಕಾಶ ನೀಡದಂತೆ ರಿಸರ್ವ್ ಬ್ಯಾಂಕ್ ತಡೆ ನೀಡಿತ್ತು. ಆದರೆ 2020ರಲ್ಲಿ ಸುಪ್ರಿಂ ಕೋರ್ಟ್ ತಡೆಯನ್ನು ತೆರವುಗೊಳಿಸಿ ಡಿಜಿಟಲ್ ವಹಿವಾಟಿಗೆ ಅವಕಾಶ ನೀಡಿತ್ತು. ಭಾರತದಲ್ಲಿ ಕ್ರಿಪ್ಟೋಕರೆನ್ಸಿ ವಹಿವಾಟಿಗೆ ಮಾನ್ಯತೆ ಇಲ್ಲದಿದ್ದರೂ ಕಂಪೆನಿಗಳು ಕ್ರಿಪ್ಟೋಕರೆನ್ಸಿ ಮೂಲಕ ಗಳಿಸಿದ ಅಥವಾ ನಷ್ಟದ ಹಣದ ಮಾಹಿತಿ ನೀಡುವುದು ಕಡ್ಡಾಯ ಎಂದು ಸರಕಾರ ಎಚ್ಚರಿಸಿದೆ. ಕ್ರಿಪ್ಟೋಕರೆನ್ಸಿ ಮತ್ತು ಡಿಜಿಟಲ್ ಕರೆನ್ಸಿ ನಿಯಂತ್ರಣ ಮಸೂದೆ-2021ನ್ನು ಸಂಸತ್ತಿನಲ್ಲಿ ಮಂಡಿಸಲಾಗಿದೆ. ಅದು ಚಳಿಗಾಲದ ಅಧಿವೇಶನದಲ್ಲಿ ಚರ್ಚೆಗೆ ಬರಲಿದೆ. ಜನರು ಆದಾಯ ತೆರಿಗೆ ಮಾಹಿತಿ ಸಲ್ಲಿಸುವಾಗ ಕ್ರಿಪ್ಟೋಕರೆನ್ಸಿ ಮಾಹಿತಿಯನ್ನು ನೀಡಬೇಕೆಂಬ ಅಂಶ ಮಸೂದೆಯಲ್ಲಿದೆ. ಸದ್ಯ ಆದಾಯ ತೆರಿಗೆಯಲ್ಲಿ ಕ್ರಿಪ್ಟೋಕರೆನ್ಸಿ ತೆರಿಗೆ ಇಲ್ಲ. ಭವಿಷ್ಯದಲ್ಲಿ ಅದಕ್ಕೆ ತೆರಿಗೆ ಹಾಕುವ ಸಾಧ್ಯತೆಗಳನ್ನು ತಳ್ಳಿಹಾಕುವಂತಿಲ್ಲ. ಇಂತಹ ದೃಢನಿರ್ಧಾರಗಳು ಜಾರಿಗೆ ಬರುವ ಮೂಲಕ ದೇಶದ ಆರ್ಥಿಕ ಸಂಪತ್ತನ್ನು ಲೂಟಿ ಮಾಡುವ ಲೂಟಿಕೋರರಿಗೆ ಕೈಕೋಳ ತೊಡಿಸಿ ಕಂಬಿ ಎಣಿಸುವಂತಾಗಬೇಕು.

‘ವಾರ್ತಾ ಭಾರತಿ’ ನಿಮಗೆ ಆಪ್ತವೇ ? ಇದರ ಸುದ್ದಿಗಳು ಮತ್ತು ವಿಚಾರಗಳು ಎಲ್ಲರಿಗೆ ಉಚಿತವಾಗಿ ತಲುಪುತ್ತಿರಬೇಕೇ? 

ಬೆಂಬಲಿಸಲು ಇಲ್ಲಿ  ಕ್ಲಿಕ್ ಮಾಡಿ

Comments (Click here to Expand)