varthabharthi


ರಾಷ್ಟ್ರೀಯ

ವಿಶ್ವಸಂಸ್ಥೆಯ ಸಾರ್ವಜನಿಕ ಸೇವಾ ಪ್ರಶಸ್ತಿಗೆ ಒಡಿಶಾದ 'ಮೊ ಬಸ್'

ವಾರ್ತಾ ಭಾರತಿ : 23 Jun, 2022

(Photo credit: CRUT website)

ವಿಶ್ವಸಂಸ್ಥೆ: ಒಡಿಶಾದ ಸಾರ್ವಜನಿಕ ಸಾರಿಗೆ ಸೇವೆ, ಪ್ರತಿಷ್ಠಿತ ವಿಶ್ವಸಂಸ್ಥೆಯ ಪ್ರಶಸ್ತಿಗೆ ಪಾತ್ರವಾದ 10 ಜಾಗತಿಕ ಉಪಕ್ರಮಗಳಲ್ಲಿ ಸೇರಿದೆ. ಕೋವಿಡ್-19 ಸಾಂಕ್ರಾಮಿಕದಿಂದ ಚೇತರಿಸಿಕೊಳ್ಳುತ್ತಿರುವ ಜಗತ್ತಿಗೆ ನೆರವಾಗುವ ಪ್ರಯತ್ನ ಮತ್ತು ಪಾತ್ರಕ್ಕಾಗಿ ಈ ಗೌರವ ಸಂದಿದೆ.

ಕ್ಯಾಪಿಟಲ್ ರೀಜನ್ ಅರ್ಬನ್ ಟ್ರಾನ್ಸ್‍ಪೋರ್ಟ್ ಇಂಡಿಯಾ, ಯುಎನ್ ಪಬ್ಲಿಕ್ ಸರ್ವೀಸ್ ಅವಾರ್ಡ್‍ಗೆ ಪಾತ್ರವಾಗಿದೆ ಎಂದು ವಿಶ್ವಸಂಸ್ಥೆ ಬುಧವಾರ ಪ್ರಕಟಿಸಿದೆ. ಬ್ರೆಝಿಲ್, ಕೆನಡಾ, ಭಾರತ, ಐರ್ಲೆಂಡ್, ಪನಾಮಾ, ಫಿಲಿಫೀನ್ಸ್, ಪೋಲಂಡ್, ಸೌದಿ ಅರೇಬಿಯಾ, ಥಾಯ್ಲೆಂಡ್ ಮತ್ತು ಉಕ್ರೇನ್‍ನ ಹತ್ತು ಉಪಕ್ರಮಗಳನ್ನು ಈ ಗೌರವಕ್ಕೆ ಆಯ್ಕೆ ಮಾಡಲಾಗಿದೆ. ಸಾರ್ವಜನಿಕ ಸೇವಾ ವಿತರಣೆಯಲ್ಲಿ ಪ್ರದರ್ಶಿಸಿದ ನಾವೀನ್ಯತೆಗಾಗಿ ಈ ಗೌರವ ನೀಡಲಾಗಿದೆ ಎಂದು ವಿಶ್ವಸಂಸ್ಥೆ ಹೇಳಿದೆ. ವಿಶ್ವಸಂಸ್ಥೆಯ ಆರ್ಥಿಕ ಮತ್ತು ಸಾಮಾಜಿಕ ವ್ಯವಹಾರಗಳ ಸಂಸ್ಥೆ ಬುಧವಾರ ವರ್ಚುವಲ್ ಸಮಾರಂಭದಲ್ಲಿ ಪ್ರಶಸ್ತಿ ಪ್ರದಾನ ಮಾಡಿದೆ.

ಕೋವಿಡ್-19 ಸಾಂಕ್ರಾಮಿಕದಿಂದ ಜಗತ್ತು ಚೇತರಿಸಿಕೊಳ್ಳಲು ನೆರವಾದ 10 ಉಪಕ್ರಮಗಳನ್ನು ಈ ಬಾರಿ ಪ್ರಶಸ್ತಿಗೆ ಆಯ್ಕೆ ಮಾಡಲಾಗಿದೆ. ಈ ಉಪಕ್ರಮಗಳು ಮಕ್ಕಳನ್ನು ಸುರಕ್ಷಿತವಾಗಿರಿಸಲು, ಲಿಂಗ ಸಮಾನತೆಯನ್ನು ತರಲು ಮತ್ತು ನೀರಿನ ಅಡಿಯ ಜೀವಜಗತ್ತನ್ನು ಸಂರಕ್ಷಿಸಲು ನೆರವಾಗಿವೆ ಎಂದು ವಿಶ್ವಸಂಸ್ಥೆ ಹೇಳಿದೆ.

ವಿಶ್ವಸಂಸ್ಥೆಯ ಸಾರ್ವಜನಿಕ ಸೇವಾ ದಿನಾಚರಣೆ ಸಮಾರಂಭದಲ್ಲಿ 2022ನೇ ಸಾಲಿನ ಪ್ರಶಸ್ತಿಯನ್ನು ವಿಶ್ವಸಂಸ್ಥೆಯ ಅಧೀನ ಮಹಾಕಾರ್ಯದರ್ಶಿ ಲಿಯೂ ಝೆನ್‍ಮಿನ್ ಪ್ರಕಟಿಸಿದರು.

‘ವಾರ್ತಾ ಭಾರತಿ’ ನಿಮಗೆ ಆಪ್ತವೇ ? ಇದರ ಸುದ್ದಿಗಳು ಮತ್ತು ವಿಚಾರಗಳು ಎಲ್ಲರಿಗೆ ಉಚಿತವಾಗಿ ತಲುಪುತ್ತಿರಬೇಕೇ? 

ಬೆಂಬಲಿಸಲು ಇಲ್ಲಿ  ಕ್ಲಿಕ್ ಮಾಡಿ

Comments (Click here to Expand)