ಉ.ಪ್ರ.: ಅಪ್ರಾಪ್ತ ವಯಸ್ಸಿನ ಬಾಲಕಿಯ ಮೇಲೆ ಸಾಮೂಹಿಕ ಅತ್ಯಾಚಾರ
ನಗ್ನವಾಗಿ ನಡೆದುಕೊಂಡು ಮನೆಗೆ ಹೋದ ವೀಡಿಯೊ ವೈರಲ್
ಮೊರದಾಬಾದ್(ಉತ್ತರಪ್ರದೇಶ), ಸೆ. 22: ಐವರು ದುಷ್ಕರ್ಮಿಗಳು 15 ವರ್ಷದ ಬಾಲಕಿಯ ಮೇಲೆ ಸಾಮೂಹಿಕ ಅತ್ಯಾಚಾರ ನಡೆಸಿದ ಹಾಗೂ ಅನಂತರ ಆಕೆ ನಗ್ನವಾಗಿ ನಡೆದುಕೊಂಡು ಮನೆಗೆ ತಲುಪಿದ ಘಟನೆ ಮೊರದಾಬಾದ್ ಜಿಲ್ಲೆಯ ಭೋಜ್ಪುರ ಪೊಲೀಸ್ ಠಾಣಾ ವ್ಯಾಪ್ತಿಯಿಂದ ವರದಿಯಾಗಿದೆ.
ಘಟನೆ ನಡೆದ 15 ದಿನಗಳ ಬಳಿಕ ವೀಡಿಯೊ ವೈರಲ್ ಆಗಿದ್ದು, ಸಾಮಾಜಿಕ ಮಾಧ್ಯಮಲ್ಲಿ ಆಘಾತದ ಅಲೆಯನ್ನೇ ಸೃಷ್ಟಿಸಿದೆ. 30 ಸೆಕೆಂಡ್ಗಳ ವೀಡಿಯೊದಲ್ಲಿ ಬಾಲಕಿ ನಗ್ನವಾಗಿ ರಸ್ತೆಯಲ್ಲಿ ನಡೆದುಕೊಂಡು ಹೋಗುತ್ತಿರುವುದು ಕಂಡು ಬಂದಿದೆ.
“ಆಕೆ ಮನೆಗೆ ಹಿಂದಿರುಗಿದಾಗ ತೀವ್ರ ರಕ್ತಸ್ರಾವವಾಗುತ್ತಿತ್ತು. ಆಕೆ ನಡೆದ ಘಟನೆಯನ್ನು ನಮಗೆ ತಿಳಿಸಿದಳು’’ ಎಂದು ಬಾಲಕಿಯ ಮಾವ ತಿಳಿಸಿದ್ದಾರೆ.
“ಅನಂತರ ನಾವು ದೂರು ದಾಖಲಿಸಲು ಪೊಲೀಸರನ್ನು ಸಂಪರ್ಕಿಸಿದೆವು. ಆದರೆ, ಘಟನೆಯನ್ನು ಜಿಲ್ಲಾ ಪೊಲೀಸ್ ಮುಖ್ಯಸ್ಥ ಎಸ್ಎಸ್ಪಿ ಹೇಮಂತ್ ಕುಟಿಯಾಲ್ ಅವರ ಗಮನಕ್ಕೆ ತರುವ ವರೆಗೆ ಪೊಲೀಸರು ಯಾವುದೇ ಕ್ರಮ ತೆಗೆದುಕೊಳ್ಳಲಿಲ್ಲ. ಅನಂತರ ಸೆಪ್ಟಂಬರ್ 7ರಂದು ಎಫ್ಐಆರ್ ದಾಖಲಿಸಿದರು ಎಂದು ಅವರು ಹೇಳಿದ್ದಾರೆ.
‘‘ಬಾಲಕಿ ಸಮೀಪದ ಗ್ರಾಮದಲ್ಲಿ ನಡೆಯುತ್ತಿರುವ ಜಾತ್ರೆಗೆ ತೆರಳಿದ್ದಳು. ಈ ಸಂದರ್ಭ ಐವರು ಆಕೆಯನ್ನು ಅಪಹರಣಗೈದು ಅತ್ಯಾಚಾರ ಎಸಗಿದ್ದಾರೆ. ಆಕೆಯ ಬೊಬ್ಬೆ ಕೇಳಿ ಗ್ರಾಮಸ್ಥರು ಸ್ಥಳಕ್ಕೆ ಧಾವಿಸಿದ್ದಾರೆ. ಈ ಸಂದರ್ಭ ಐವರು ಆರೋಪಿಗಳು ಆಕೆಯ ಬಟ್ಟೆ ಹಾಗೂ ಇತರ ವಸ್ತುಗಳೊಂದಿಗೆ ಪರಾರಿಯಾಗಿದ್ದಾರೆ’’ ಎಂದು ಮೊರದಾಬಾದ್ ಪೊಲೀಸರು ತಿಳಿಸಿದ್ದಾರೆ.
‘‘376 ಡಿ (ಸಾಮೂಹಿಕ ಅತ್ಯಾಚಾರ), ಪೋಕ್ಸೊ ಕಾಯ್ದೆ ಅಡಿಯಲ್ಲಿ ಎಫ್ಐಆರ್ ದಾಖಲಿಸಲಾಗಿದೆ. ಓರ್ವನನ್ನು ಸೆಪ್ಟಂಬರ್ 15ರಂದು ಬಂಧಿಸಲಾಗಿದೆ. ಮುಂದಿನ ತನಿಖೆ ನಡೆಯುತ್ತಿದೆ’’ ಎಂದು ಹೆಚ್ಚುವರಿ ಪೊಲೀಸ್ ಅಧೀಕ್ಷಕ (ಗ್ರಾಮೀಣ) ಸಂದೀಪ್ ಕುಮಾರ್ ಮೀನಾ ಅವರು ಹೇಳಿದ್ದಾರೆ.
ಉತ್ತರಪ್ರದೇಶದಲ್ಲಿ ಸೆಪ್ಟಂಬರ್ನಲ್ಲಿ ದಾಖಲಾದ ಅತ್ಯಾಚಾರ ಪ್ರಕರಣಗಳು
*► ಸೆಪ್ಟಂಬರ್ 21- ಬರೇಲಿಯಲ್ಲಿ ಗರ್ಭಿಣಿ ಮಹಿಳೆಯ ಮೇಲೆ ಮೂವರಿಂದ ಅತ್ಯಾಚಾರ. ಇದರಿಂದ ಆಕೆಗೆ ಗರ್ಭಪಾತವಾಗಿತ್ತು.
*► ಸೆಪ್ಟಂಬರ್ 20 - ಲಕ್ನೋದಲ್ಲಿ 8 ವರ್ಷದ ದಲಿತ ಬಾಲಕಿಯ ಮೇಲೆ ಅತ್ಯಾಚಾರ ನಡೆಸಿ ಹತ್ಯೆ.
*► ಸೆಪ್ಟಂಬರ್ 18 - ಮುಝಪ್ಫರ್ನಗರದಲ್ಲಿ 16 ವರ್ಷದ ಬಾಲಕಿಯ ಮೇಲೆ ಯುವಕನಿಂದ ನಿರಂತರ ಅತ್ಯಾಚಾರ.
*► ಸೆಪ್ಟಂಬರ್ 17 - ಬುದೌನ್ನಲ್ಲಿ 15 ವರ್ಷದ ದಲಿತ ಬಾಲಕಿಯ ಮೇಲೆ ಅತ್ಯಾಚಾರ ನಡೆಸಿ ಹತ್ಯೆ.
*► ಸೆಪ್ಟಂಬರ್ 15 - ಪಿಲಿಭಿಟ್ನಲ್ಲಿ ಯುವತಿಯೋರ್ವಳನ್ನು 8 ದಿಗಳ ಕಾಲ ವಶದಲ್ಲಿರಿಸಿಕೊಂಡು ನಿರಂತರ ಅತ್ಯಾಚಾರ.
*► ಸೆಪ್ಟಂಬರ್ 15 - ಬಲ್ಲಿಯಾದಲ್ಲಿ 13 ವರ್ಷದ ದಲಿತ ಬಾಲಕಿಯ ಅತ್ಯಾಚಾರ.
*► ಸೆಪ್ಟಂಬರ್ 14 - ಲಖಿಂಪುರಖೇರಿಯಲ್ಲಿ 15 ಹಾಗೂ 17 ವರ್ಷದ ದಲಿತ ಬಾಲಕಿಯರ ಮೇಲೆ ಅತ್ಯಾಚಾರಗೈದು ಹತ್ಯೆ ಮಾಡಿ ಮರಕ್ಕೆ ನೇತು ಹಾಕಿದ ಯುವಕರು.
*► ಸೆಪ್ಟಂಬರ್ 11 - ಲಖಿಂಪುರಖೇರಿಯಲ್ಲಿ 15 ವರ್ಷದ ಬಾಲಕಿಯ ಮೇಲೆ ಸಾಮೂಹಿಕ ಅತ್ಯಾಚಾರ.
*► ಸೆಪ್ಟಂಬರ್ 7 - 16 ವರ್ಷದ ಬಾಲಕಿಯ ಮೇಲೆ ಇಬ್ಬರು ವ್ಯಕ್ತಿಗಳಿಂದ ಅತ್ಯಾಚಾರ.